.jpg)
សមត្ថកិច្ចពេលចុះទៅពិនិត្យនៅផ្ទះដែលមានករណីមនុស្សស្លាប់ដោយសង្ស័យពុលស្រា កាលពីថ្ងៃទី ១៩ មិថុនា ។ រូបថត មន្ទីរព័ត៌មានខេត្តព្រៃវែង
ព្រៃវែងៈ សមត្ថកិច្ចស្រុកពារាំងខេត្ដព្រៃវែង កំពុងស្រាវជ្រាវលើករណីសង្ស័យពុលស្រាសស្រាថ្នាំ ដែលបណ្តាលឱ្យមនុស្សចំនួន ៤ នាក់បានស្លាប់ជាបន្តបន្ទាប់ កាលពីថ្ងៃទី ១៩ខែមិថុនា នៅភូមិយោត ឃុំមេសរប្រចណ្ឌ ស្រុកពារាំង។ នេះបើតាមលោក ឡុង ប៊ុនធឿន អធិការស្រុកពារាំងប្រាប់ ភ្នំពេញ ប៉ុស្ដិ៍ នាព្រឹកនេះ។
បើតាមរបាយការណ៍មន្ទីរព័ត៌មានខេត្ដព្រៃវែងកាលពីថ្ងៃទី ១៩ មិថុនា ជនរងគ្រោះទី១- ឈ្មោះ ឆួន ពៅ ភេទប្រុស អាយុ ៥៣ ឆ្នាំ ទី២- ឈ្មោះ សឺន ផន ភេទប្រុស អាយុ ៣១ ឆ្នាំ ទី៣- ឈ្មោះ ចយ ភេទប្រុស អាយុ ៤៥ ឆ្នាំ និងទី៤- ឈ្មោះ ហ៊ាន ណេន ភេទប្រុស អាយុ ៤៧ ឆ្នាំ។
លោក ឡុង ប៊ុនធឿន បានឱ្យដឹងថា ក្នុងចំណោមជនរងគ្រោះទាំងអស់គឺមានម្នាក់បានស្លាប់ពេលក្រុមគ្រួសារបញ្ជូនដល់មន្ទីរពេទ្យ ចំណែកជនរងគ្រោះ៣នាក់ផ្សេងទៀតគឺបានស្លាប់នៅផ្ទះរបស់ពួកគេ។
លោកថ្លែងថា៖ «ចំពោះមូលហេតុនៃការស្លាប់របស់ជនរងគ្រោះទាំង ៤ នាក់ខាងលើនេះ ទាំងសមត្ថកិច្ចនិងមន្ត្រីជំនាញសុខាភិបាលកំពុងតែចុះស្រាវជ្រាវ ប៉ុន្តែរហូតមកទល់ពេលនេះគេនៅមិនទាន់អាចបញ្ជាក់បាននៅឡើយទេគឺគ្រាន់តែសង្ស័យថា ជាករណីពុលស្រា ដោយសារមុនពេលស្លាប់ជនរងគ្រោះទាំងអស់សុទ្ធតែបានផឹកស្រាសស្រាថ្នាំដូចគ្នា»៕
