ភ្នំពេញៈ មន្ទីរប្រឆាំងគ្រឿងញៀននៃអគ្គស្នងការដ្ឋាន នគរបាលជាតិនៅថ្ងៃទី ២០ ខែមិថុនាបានបញ្ជូនជនសង្ស័យ ៤ នាក់ទៅសាលាដំបូងរាជធានីភ្នំពេញ បន្ទាប់ពីពួកគេបានក្លែងខ្លួនធ្វើជាកងកម្លាំងសមត្ថកិច្ចប្រយុទ្ធប្រឆាំងគ្រឿងញៀន ហើយបានធ្វើសកម្មភាពចាប់ប្រជាពលរដ្ឋ ជំរិតយកប្រាក់។
លោក អ៊ិន សុង អ្នកនាំពាក្យនៃមន្ទីរប្រឆាំងគ្រឿងញៀនប្រាប់ភ្នំពេញប៉ុស្តិ៍នៅថ្ងៃទី ២០ មិថុនា ឆ្នាំ ២០២១ ថា ជនសង្ស័យទាំង ៤ នេះត្រូវបានបញ្ជូនទៅដល់ដៃព្រះរាជអាជ្ញានៃអយ្យការសាលាដំបូងរាជធានីភ្នំពេញហើយ ។ ពួកគេអាចប្រឈមពីបទចោទ បង្ខាំងមនុស្សខុសច្បាប់ ឬចាប់ជំរិតទារប្រាក់។ លោកបន្តថា ជនសង្ស័យទាំង ៤ នាក់នេះបានធ្វើសកម្មភាពចាប់អ្នកញៀនគ្រឿងញៀន និងប្រជាពលរដ្ឋស្លូតត្រង់រស់នៅក្នុងទីក្រុងភ្នំពេញដែលមិនពាក់ព័ន្ធនឹងបទល្មើសហើយជំរិតទារប្រាក់។ ដោយឡែក ចំពោះការក្លែងបន្លំ ឬក្លែងខ្លួនជាសមត្ថកិច្ចនគរបាល ក៏ត្រូវតែចោទដែរ ប៉ុន្តែ បញ្ហានេះ អាស្រ័យទៅលើព្រះរាជអាជ្ញាជាអ្នកសម្រេច បើពិនិត្យមើលឃើញករណីនេះវាពាក់ព័ន្ធនឹងបទល្មើស។
តាមរបាយការណ៍របស់មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានឱ្យដឹងថា កាលពីថ្ងៃទី ១៧ ខែមិថុនា ឆ្នាំ ២០២១ វេលាម៉ោង ២៤ និង ០០ នាទីនៅចំណុច ភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ កម្លាំងជំនាញនៃមន្ទីរប្រឆាំងបទល្មើសគ្រឿងញៀន (ក៤) បានសហការស្រាវជ្រាវឈានទៅបង្ក្រាបជាក់ស្តែងក្រុមក្លែងខ្លួនជាសមត្ថកិច្ចនគរបាលនៃមន្ទីរប្រឆាំងបទល្មើសគ្រឿងញៀនធ្វើសកម្មភាពចាប់ប្រជាពលរដ្ឋសម្លុតយកប្រាក់ជាច្រើនលើកនៅភូមិសាស្ត្ររាជធានីភ្នំពេញ នាពេលកន្លងមក។
ក្នុងប្រតិបត្តិការសមត្ថកិច្ចនៃមន្ទីរប្រឆាំងបទល្មើសគ្រឿងញៀនឃាត់ខ្លួនជនសង្ស័យ ៤ នាក់ក្នុងនោះមានឈ្មោះ កេត វីរីយ៉ា ភេទប្រុសអាយុ ៣៥ ឆ្នាំ ជាមេខ្លោងឈ្មោះ សយ តុលា ភេទប្រុស អាយុ ៣២ ឆ្នាំ ផាន់ វីរ:ភក្តី ភេទ ប្រុស អាយុ ៣១ ឆ្នាំ និង សល់ ភារៈ ភេទប្រុស អាយុ ៣១ ឆ្នាំ ពួកគេទាំង ៣ ជាអ្នកសមគំនិត។
ក្នុងប្រតិបត្តិការនេះដែរ សមត្ថកិច្ចបានចាប់ឃាត់វត្ថុតាងមួយចំនួនរួមមាន រថយន្ត ១ គ្រឿង ម៉ូតូ ២ គ្រឿង អាវុធខ្លី (ជ័រ) ១ ដើម វិទ្យុទាក់ទងម៉ាកម៉ូតូរ៉ូឡា ១ គ្រឿង ឯកសណ្ឋាននគរបាល ២ កំប្លេ និង អាវ ១ មួកនគរបាល ១ ខ្សែក្រវាត់នគរបាល ១ អាវក្រោះ ១ មានស្លាកសញ្ញានគរបាលគ្រឿងញៀន អាវកាក់ ១ មានស្លាកសញ្ញានគរបាលគ្រឿងញៀន កាបូបដៃមានសញ្ញានគរបាលគ្រឿងញៀន ១ កាតនគរបាលក្លែងក្លាយ ចំនួន ៣ សន្លឹក កាតសារព័ត៌មានកំពង់សោមប៉ុស្តិ៍ ១ សន្លឹក ឧបករណ៍តេស្តរកសារធាតុញៀន ១ កាតកម្លាំងនគរបាលមូលដ្ឋានសម្ងាត់ក្លែងក្លាយ ២ សន្លឹក (ក ៧ ក ៥) កាតសម្គាល់អាវុធខ្លី ១ សន្លឹក អត្តសញ្ញាណប័ណ្ណសញ្ជាតិខ្មែរ ១ សន្លឹក និងកាតចាក់វ៉ាក់សាំង កូវីដចំនួន ១ សន្លឹក៕