រតនគិរីៈ រដ្ឋបាលខេត្ដរតនគិរីកំពុងរឹតបន្តឹងការអនុវត្ដវិធានការសុខាភិបាលនៅភូមិសាស្ដ្រក្រុងបានលុង បន្ទាប់ពីមានករណីផ្ទុះឆ្លងរីករាលដាលទ្រង់ទ្រាយធំនៅក្នុងសហគមន៍ចាប់ថ្ងៃទី ១៨-១៩ ខែមិថុនាចំនួន ១០៤ នាក់បន្ថែមទៀត។ នេះបើតាមលោក ញ៉ែម សំអឿន អភិបាលរង និងជាអ្នកនាំពាក្យរដ្ឋបាលខេត្ដ។
លោក ញ៉ែម សំអឿន ប្រាប់ ភ្នំពេញប៉ុស្ដិ៍ នៅថ្ងៃទី ១៩ មិថុនាថា ចាប់តាំងពីផ្ទុះការឆ្លងរីករាលដាលជំងឺកូវីដ ១៩ រហូតមក ខេត្ដរតនគិរី រកឃើញករណីឆ្លងចំនួន ១០៤ នាក់សុទ្ធជាករណីនាំចូលពីខេត្ដផ្សេងៗ និងពីប្រទេសថៃ។ ទើបរយៈពេល ២ ថ្ងៃ គឺនៅថ្ងៃទី ១៨-១៩ ខែមិថុនានេះបានផ្ទុះករណីឆ្លងចូលដល់សហគមន៍ក្នុងក្រុងបានលុងរកឃើញអ្នកឆ្លងសរុបចំនួន ១០៤ ករណីហើយ។
លោកថ្លែងថា កន្លងមកខេត្តបានអនុវត្ដនូវវិធានការការពារទាក់ទងនឹងការទប់ស្កាត់ការឆ្លងរីករាលដាលជំងឺកូវីដ តាមការណែនាំរបស់រាជរដ្ឋាភិបាល និងក្រសួងសុខាភិបាល។ ផ្លូវចូលខេត្ដសំខាន់ៗ គឺយើងបានដាក់ប៉ុស្ដិ៍ពិនិត្យសុខភាព។ «ចំពោះអ្នកដែលបានធ្វើដំណើរពីខេត្ដផ្សេងចូលមក គឺយើងពិនិត្យសុខភាព វាស់កម្ដៅ និងសាកសួរព័ត៌មានពីពួកគាត់។ ប្រសិនបើពួកគាត់មកពីតំបន់ដែលប្រឈមហានិភ័យឆ្លងកូវីដ ១៩ ខ្លាំងយើងយកសំណាកពួកគាត់ទៅពិនិត្យ»។
បើតាមលោក សំអឿន ដើម្បីទប់ស្កាត់ឆ្លងរាលដាលនៅក្នុងសហគមន៍នៅថ្ងៃ ១៩ មិថុនាគណៈបញ្ជាការឯកភាពខេត្ដបានដឹកនាំកិច្ចប្រជុំ ដើម្បីរៀបចំផែនការទប់ស្កាត់ការឆ្លងរីករាលដាលបន្ត និងឈានទៅកំណត់តំបន់ដែលត្រូវបិទខ្ទប់ផងដែរ។
លោកឱ្យដឹងថា នៅពេលរាជរដ្ឋាភិបាលទទួលបានវ៉ាក់សាំង និងផ្ដល់ដល់រដ្ឋបាលខេត្ដ ដើម្បីចាក់ជូនដល់ពលរដ្ឋក្នុងពេលឆាប់ៗ។
រហូតដល់បច្ចុប្បន្ន ខេត្ដរតនគិរីទើបបានរកឃើញករណីឆ្លងសរុបជាង ១០០ នាក់ ប៉ុន្តែមិនទាន់មានករណីស្លាប់ ដោយសារជំងឺកូវីដ ១៩ ទេ៕