.jpg)
អ្នកដំណើរចូលទៅខេត្តសៀមរាប ត្រូវបានតម្រូវឲ្យចុះឈ្មោះតាមរយៈទូរស័ព្ទដៃ ដើម្បីបង្ការការឆ្លងកូវីដ ១៩។ រូបថត រដ្ឋបាលខេត្តសៀមរាប
សៀមរាបៈ រដ្ឋបាលខេត្តសៀមរាបចាប់ដំណើរការកម្មវិធីចុះឈ្មោះ ដោយខ្លួនឯងនៅច្រកព្រំប្រទល់ខេត្តសៀមរាប តាមរយៈតំណភ្ជាប់ srprovince.com/login ដើម្បីបង្កភាពងាយស្រួល និងចំណេញពេលវេលាដល់អ្នកដំណើរដែលមានបំណងធ្វើដំណើរចូលភូមិសាស្ត្រខេត្តសៀមរាប ដើម្បីងាយស្រួលតាមដាន និងទប់ស្កាត់ការឆ្លងថ្មីនៃជំងឹកូវីដ ១៩។
លោក ទៀ សីហា អភិបាលខេត្តសៀមរាប នៅថ្ងៃទី ២១ ខែមិថុនា នេះ បានឱ្យដឹងថា ការដាក់ឱ្យដំណើរការកម្មវិធីចុះឈ្មោះដោយខ្លួនឯងក្នុងប្រព័ន្ធចុះឈ្មោះចូលភូមិសាស្ត្រខេត្តសៀមរាបនេះត្រវបានធ្វើឡើងចាប់ពីថ្ងៃទី ២១ មិថុនា នេះ តទៅសម្រាប់ឱ្យអ្នកដែលមានបំណងធ្វើដំណើរឆ្លងកាត់ភូមិសាស្ត្រខេត្តសៀមរាបធ្វើការចុះឈ្មោះ។
លោកអភិបាលខេត្ត បញ្ជាក់ដែរថា ម្យ៉ាងទៀតនោះ ជាការល្អប្រសើរ ប្រសិនបើអ្នកដំណើរគ្រប់រូប ដែលមានបំណងឆ្លងកាត់ខេត្តសៀមរាប បានបំពេញឈ្មោះមុនពេលមកដល់គោលដៅព្រំប្រទល់ ឬប៉ុស្តិ៍ត្រួតពិនិត្យ។ ដោយឡែក ចំពោះអ្នកមិនទាន់យល់ច្បាស់ពីការប្រើប្រាស់ ឬបំពេញទិន្ន័យ រដ្ឋបាលខេត្តសៀមរាបមានមន្ត្រីនៅចាំសម្របសម្រួលណែនាំនៅច្រកនីមួយៗតែម្តង។
ជាមួយគ្នានេះ សម្រាប់អ្នកដំណើរ មិនមានទូរស័ព្ទដៃទំនើប (Smart Phone) រដ្ឋបាលខេត្ត អនុញ្ញាតឱ្យមានការចុះឈ្មោះតាមធម្មតា។
អ្នកធ្វើដំណើរអាចចូលទៅក្នុង Website តាម srprovince.com/login ឬកម្មវិធី Scan QR រួចចុះឈ្មោះតាមរយៈ Facebook ឬ E-mail(Gmail) ដោយបំពេញព័ត៌មានផ្ទាល់ខ្លួន និងកំណត់ត្រាយានយន្ត បំពេញលេខអត្តសញ្ញាណប័ណ្ណ ឈ្មោះ ភេទ អាយុ សញ្ជាតិ និងលេខទូរស័ព្ទ។
អ្នកធ្វើដំណើរត្រូវបង្កើតកំណត់ត្រាឆ្លងកាត់ខេត្ត ដោយបញ្ចូលព័ត៌មានផ្ទាល់ខ្លួន និងអ្នករួមដំណើរជាមួយ និងទាញយក QR Code ភ្ជាប់ជាមួយអត្តសញ្ញាណប័ណ្ណ បង្ហាញទៅមន្ត្រីព្រំប្រទល់៕
