ភ្នំពេញៈ ក្នុងរយៈពេល ២១ ថ្ងៃ គិតចាប់ពីថ្ងៃទី ១ ដល់ថ្ងៃទី ២១ មិថុនា ការរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោក យានយន្តចូលគោលដៅមានចំនួន ១២៥ ១២២គ្រឿង ក្នុងនោះរកឃើញយានយន្តល្មើសសរុបចំនួន ១៣ ៨៨០ គ្រឿង មានម៉ូតូចំនួន ១០ ៧៥៩ គ្រឿង ត្រូវបានផាកពិន័យតាមអនុក្រឹត្យលេខ៣៩ អនក្រ.បក នៅទូទាំងប្រទេស។
របាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិ ស្តីពីការរឹតបន្ដឹងច្បាប់ស្ដីពីចរាចរណ៍ផ្លូវគោក នៅថ្ងៃទី ២១ ខែ មិថុនា ឆ្នាំ ២០២១ ឲ្យដឹងថា បើធៀបនឹងខែឧសភា គិតពីថ្ងៃទី ១ ដល់ថ្ងៃទី ២៦ ឧសភា ការឃាត់ឲ្យយានយន្តចូលគោលដៅមានចំនួន ១៥០ ៥៤០ គ្រឿង។ ក្នុងនោះរកឃើញយានយន្តល្មើសសរុបចំនួន ៨ ៦២៩គ្រឿង មានម៉ូតូចំនួន ៥ ៧០៣ គ្រឿង ត្រូវបានផាកពិន័យតាមអនុក្រឹត្យលេខ៣៩ អនក្រ.បក នៅទូទាំងប្រទេស។
របាយការណ៍នេះបញ្ជាក់ថា ក្នុងរយៈពេល ២១ ថ្ងៃ នៃខែមិថុនានេះ ឃើញថា ការអនុវត្តតាមអនុក្រឹត្យថ្មីក្នុងការផាកពិន័យយានយន្តល្មើស បានដំណើរការទៅយ៉ាងល្អប្រសើរ ទទួលបានការគាំទ្រ។ ពិសេសអ្នកប្រើប្រាស់ផ្លូវទាំងអស់ បានចូលរួមគោរពច្បាប់ចរាចរណ៍យ៉ាងល្អប្រសើរ។
ដោយឡែក នៅថ្ងៃទី ២១ ខែ មិថុនា ឆ្នាំ ២០២១ នេះ កម្លាំងសមត្ថកិច្ច បានដាក់គោលដៅសរុប ១៤៣ គោលដៅ មានយានយន្តចូលគោលដៅចំនួន ៤ ៤៧៩ គ្រឿង ម៉ូតូចំនួន ៣ ២១៦ គ្រឿង។ ក្នុងនោះរកឃើញយានយន្តល្មើសសរុបចំនួន ៨២០ គ្រឿង មានម៉ូតូចំនួន ៦៦៧ គ្រឿង ត្រូវបានផាកពិន័យតាមអនុក្រឹត្យលេខ៣៩ .អនក្រ.បក នៅទូទាំងប្រទេស។
ភ្នំពេញ ប៉ុស្តិ៍ មិនអាចទាក់ទងទៅលោក ហ៊ឹម យ៉ាន អគ្គស្នងការរងនគរបាលជាតិ ដើម្បីអត្ថាធិប្បាយបន្ថែមបានទេ នៅថ្ងៃនេះ។ ប៉ុន្តែលោកប្រាប់ ភ្នំពេញ ប៉ុស្តិ៍ កាលពីចុងខែឧសភាថា បើទោះបីស្ថិតក្នុងស្ថានភាពប្រទេសកម្ពុជា កំពុងប្រយុទ្ធប្រឆាំងនឹងជំងឹកូវីដ ១៩ ក៏កម្លាំងនគរបាលចរាចរណ៍ផ្លូវគោកនៅតែបន្តអនុវត្តច្បាប់ និងផ្សព្វផ្សាយច្បាប់ជូនដល់ប្រជាពលរដ្ឋផងដែរ។
លោក ហ៊ឹម យ៉ាន ថ្លែងថា៖«យើងនៅតែឃើញការស្លាប់ និងរបួសដែលបង្កឡើងដោយគ្រោះថ្នាក់ចរាចរណ៍មាន ជារាល់ថ្ងៃ ជាពិសេសក្នុងពេលបើកឱ្យមានចរាចរណ៍ឡើងវិញ បន្ទាប់ពីបិទខ្ទប់ មានអ្នកស្លាប់ពី ៦ ទៅ ៨ នាក់»៕