ភ្នំពេញៈ រដ្ឋមន្ត្រីការបរទេស និងអភិវឌ្ឍន៍នៃចក្រភពអង់គ្លេស លោក ដូមីនិក រ៉ាអាប់ (Dominic Raab) នឹងបំពេញទស្សនកិច្ចនៅកម្ពុជានៅថ្ងៃទី ២៣ ខែមិថុនា ដើម្បីជំរុញចំណងមិត្តភាពរវាងប្រទេសទាំង ២។
សេចក្តីប្រកាសព័ត៌មានក្រសួងការបរទេសបញ្ជាក់កាលពីថ្ងៃទី ២១ ខែមិថុនា ថា លោក ប្រាក់ សុខុន រដ្ឋមន្ត្រីការបរទេសកម្ពុជា និងលោក រ៉ាអាប់ នឹងមានកិច្ចប្រជុំទ្វេភាគីដែលផ្តោតការពិភាក្សាលើទិដ្ឋភាពផ្សេងៗនៃកិច្ចសហប្រតិបត្តិការទ្វេភាគី ព្រមទាំងបញ្ហាតំបន់ និងអន្តរជាតិដែលជាប្រយោជន៍និងកង្វល់រួម។
សេចក្តីប្រកាសព័ត៌មានបញ្ជាក់ថា៖ «ទស្សនកិច្ចផ្លូវការរបស់ ឯកឧត្តម ដូមីនិក រ៉ាអាប់ នៅកម្ពុជា នឹងជួយរួមចំណែកជំរុញ និងពង្រឹងបន្ថែមទៀតនូវទំនាក់ទំនងទ្វេភាគីរវាងប្រទេសទាំងពីរ និងជាការបោះជំហានទៅមុខនៅក្នុងកិច្ចសហប្រតិបត្តិការពហុភាគីក្នុងក្របខ័ណ្ឌអាស៊ាន»។
លោក រ៉ាអាប់ នឹងមានជំនួបជាមួយលោក សាយ សំអាល់ រដ្ឋមន្ត្រីក្រសួងបរិស្ថាន ហើយក៏នឹងទស្សនាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលឯកសារកម្ពុជាផងដែរ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាប្រាប់ ភ្នំពេញ ប៉ុស្តិ៍ កាលពីថ្ងៃទី ២១ ខែមិថុនាថា ទំនាក់ទំនងរវាងប្រទេសទាំង ២ កន្លងមកមានភាពល្អប្រសើរ និងមានការរីកចម្រើន ដោយសារតែប្រទេសទាំងពីរមានក្របខណ្ឌទំនាក់ទំនងក្នុងយន្តការពហុភាគី និងទ្វេភាគី។ ទំនាក់ទំនងទ្វេភាគីកន្លងមកនេះមានជំហរវិជ្ជមានគួរឱ្យកត់សម្គាល់នៅត្រង់ថា អង់គ្លេសរក្សាភាពអនុគ្រោះសម្រាប់ EBA ដល់កម្ពុជាដដែល បន្ទាប់ពីចាកចេញពីសហភាពអឺរ៉ុប។
លោកថ្លែងថា ក្នុងក្របខណ្ឌពហុភាគី អង់គ្លេសត្រូវស្នើសុំដៃគូសន្ទនាជាមួយអាស៊ាន ហើយនេះជាយន្តការពហុភាគីបន្ថែមសម្រាប់លើកកម្ពស់ទំនាក់ទំនងរវាងប្រទេសទាំងពីរហើយឆ្នាំក្រោយនេះកម្ពុជានឹងធ្វើជាប្រធានអាស៊ាន។
លោក ភា ថ្លែងថា៖ «ដូច្នេះ ចង់ឬមិនចង់ ការជជែកគ្នាមុនរវាងអង់គ្លេសនិងកម្ពុជាជុំវិញភាពជាដៃគូអង់គ្លេស-អាស៊ាន គឺជារឿងមួយចាំបាច់ ហើយគោលបំណងដែលគាត់មកនេះក៏ប្រហែលជាត្រូវតែជជែករឿងហ្នឹងផងដែរ»។
លោកបន្តថា ការនាំចេញរបស់កម្ពុជាទៅអង់គ្លេសមានទំហំធំជាងគេក្នុងបណ្តាប្រទេសដែលកម្ពុជា ត្រូវនាំចេញទៅសហភាពអឺរ៉ុប។
លោក ភា ថ្លែងថា៖ «យើងសង្ឃឹមថា ដំណើរទស្សនកិច្ចនេះនឹងជំរុញឱ្យមានការផ្លាស់ប្តូរពាណិជ្ជកម្មហ្នឹងកាន់តែមានទំហំធំឡើងថែមទៀត ជាពិសេសបើសិនជាលោករដ្ឋមន្ត្រីការបរទេសអង់គ្លេសមកអះអាងជាថ្មីម្តងទៀត អំពីការរក្សានូវភាពអនុគ្រោះខាងពាណិជ្ជកម្មសម្រាប់កម្ពុជា អាហ្នឹងវាជាទម្ងន់មួយបន្ថែមទៀតដែលធ្វើឱ្យយើងមានឧត្តមភាពសម្រាប់ការនាំចេញទៅទីផ្សារអឺរ៉ុប ជាពិសេសគឺអង់គ្លេសហ្នឹងឯង»៕