.jpg)
ជនសង្ស័យជាឧត្តមសេនីយ៍ (កណ្តាល) ពេលនាំខ្លួនទៅសាលាដំបូងរាជធានីភ្នំពេញ។ រូបថត នគរបាល
ជុំវិញករណីនេះ លោក ប្លង់ សុផល អ្នកនាំពាក្យអយ្យការ អមសាលាដំបូងរាជធានីភ្នំពេញ បានបដិសេធផ្ដល់អត្ថាធិប្បាយ ដោយអះអាងថា ករណីនោះ កំពុងស្ថិតក្រោមការស៊ើបអង្កេត និងស៊ើបសួររបស់ចៅក្រមស៊ើបសួរនៅឡើយ។
ចំណែកលោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ បានថ្លែងថា ករណីនេះ ចៅក្រមស៊ើបសួរកំពុងចំណាត់ការតាមនីតវិធី។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានថ្លែងនៅល្ងាចថ្ងៃទី ២១ ខែមិថុនានេះថា លោកហង្ស វណ្ណៈ អាយុ ៤១ ឆ្នាំ បម្រើការងារជាមន្ត្រីនគរបាលជាតិ នៃក្រសួងមហាផ្ទៃ មានឋានៈជាឧត្តមសេនីយ៍ទោត្រូវបានកម្លាំងនគរបាល ការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ចាប់ខ្លួនកាលពីថ្ងៃទី ១៧ ខែមិថុនា ឆ្នាំ ២០២១ នៅវេលាម៉ោង ១១:៣០ នាទីព្រឹក នៅចំណុចភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល តាមដីកាបង្គាប់ឲ្យចាប់ខ្លួនរបស់លោក ម៉ៅ ស៊ីណា ចៅក្រមស៊ើបសួរសាលាដំបូងរាជធានីភ្នំពេញ។
ក្នុងដីកាបង្គាប់ឲ្យចាប់ខ្លួននោះជនសង្ស័យ ឈ្មោះ ហង្ស វណ្ណៈ ត្រូវបានលោក ម៉ៅ ស៊ីណា ចោទប្រកាន់ពីបទ«ឆបោក» ប្រព្រឹត្តនៅចំណុចស្ថានីយ៍ប្រេងឥន្ទនៈសូគីម៉ិច លើមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី ២ ខែ កញ្ញា ឆ្នាំ ២០១៦ ដែលបទល្មើសព្រហ្មទណ្ឌនេះ មានចែងឱ្យផ្តន្ទាទោសតាម បញ្ញត្តិមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ ។
លោកសុសីហាបានថ្លែងថា៖ «ក្រោយការឃាត់ខ្លួន ជនសង្ស័យត្រូវបានកម្លាំងនគរបាលជំនាញ បញ្ជូនទៅកាន់តុលាការដើម្បីចំណាត់ការបន្តតាមនីតិវិធីច្បាប់។ បច្ចុប្បន្នជនសង្ស័យកំពុងស្ថិតក្រោមការស៊ើបសួររបស់ចៅក្រមស៊ើបសួរ»។
បើតាមលោក សុខសីហា ជនសង្ស័យត្រូវបានប្រជាពលរដ្ឋម្នាក់ ប្តឹងចោទប្រកាន់ថា បានយកលុយរបស់គាត់ចំនួន ២ម៉ឺន២ ពាន់ដុល្លារអាមេរិក ជាថ្នូរជួយរត់ការឲ្យគាត់បានចូលបម្រើការងារក្នុងក្របខណ្ឌជាមន្ត្រីនគរបាលជាតិ ប៉ុន្តែមិនបានសម្រេចតាមការសន្យា ហើយបានគេចវេសមិនជួបដោះស្រាយជាមួយជនរងគ្រោះ ដែលជាដើមបណ្តឹងដោយសន្តិវិធី៕
