.jpg)
ប៉ូលិសចុះត្រួតពិនិត្យទីតាំងផលិតស្រាស ក្រោយពុលស្លាប់ប្រជាពលរដ្ឋ ៤ នាក់ នៅស្រុកពារាំង។ រូបថត ប៉ូលិស
ព្រៃវែងៈ លទ្ធផលជំហានដំបូងពីមន្ទីរពិសោធន៍បានបង្ហាញថា សំណាកស្រាសមួយចំនួនក្នុងចំណោមសំណាកស្រាសសរុបចំនួន ១១ នៅឃុំមេសរប្រចាន់ ស្រុកពារាំង គឺមានជាតិមេតាណុលក្នុងកម្រិតខ្ពស់ ដែលអាចបង្កឱ្យអ្នកផឹកពុលស្លាប់។ នេះបើតាមអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប)។
ការយកសំណាកស្រាសទៅធ្វើពិសោធន៍នេះ គឺបានធ្វើឡើង បន្ទាប់ពីពលរដ្ឋចំនួន ៤ នាក់មានលំនៅក្នុងភូមិយោត ឃុំមេសរប្រចាន់ ស្រុកពារាំង រួមមានឈ្មោះ ឆួន ពៅ អាយុ ៥៣ ឆ្នាំ, ស៊ឺន ផន អាយុ ៣១ ឆ្នាំ, ស៊ឺន ចយ អាយុ ៤៥ ឆ្នាំ និងឈ្មោះ ហ៊ាន ណេន ភេទប្រុស អាយុ ៤៧ ឆ្នាំបានស្លាប់ជាបន្តបន្ទាប់ សង្ស័យជាករណីពុលស្រា ព្រោះតាមការអះអាងរបស់សាច់ញាតិ មុនពេលពួកគេស្លាប់គឺបានផឹកស្រាស និងស្រាថ្នាំ។
លោក ផាន អូន អគ្គនាយកនៃអគ្គនាយកដ្ឋាន កបប ប្រាប់ភ្នំពេញប៉ុស្តិ៍នៅថ្ងៃទី ២១ មិថុនាថា យោងតាមលទ្ធផលពីមន្ទីរពិសោធន៍ក្នុងជំហានបឋមនេះ សំណាកស្រាសមួយចំនួនក្នុងចំណោមសំណាកស្រាស និងស្រាថ្នាំសរុបចំនួន ១១ សំណាក ដែលយកទៅពីឃុំ មេសរប្រចាន់ មានសារធាតុមេតាណុលចន្លោះពី ៦ ភាគរយ ទៅ ៧,៥ ភាគរយ ដែលអាចបង្កឲ្យអ្នកផឹកស្រានោះពុលស្លាប់។
លោកបញ្ជាក់ថា៖ «ព្រោះតែករណីនេះ នៅថ្ងៃទី ២០ ខែមិថុនា ឆ្នាំ ២០២១ ក្រុមការងារយើងបានធ្វើការងារដល់ម៉ោង ៨ យប់ ដើម្បីពិនិត្យសំណាកស្រាដែលសមត្ថកិច្ចមូលដ្ឋាន និងសាខា ក.ប.ប ខេត្តព្រៃវែងបានផ្ដល់មក ហើយយើងបានរកឃើញមានសារធាតុមេតាណុលខ្ពស់ គឺកម្រិតពី ៦ ទៅ ៧,៥ ភាគរយ ដែលអាចបង្កឲ្យអ្នកផឹកស្រានោះពុលស្លាប់បាន»។
លោក អ៊ុត សុភាព ប្រធានសាខា ក.ប.ប ខេត្តព្រៃវែងបានប្រាប់ភ្នំពេញប៉ុស្តិ៍ថា៖ «តាមលទ្ធផលនៃការធ្វើតេស្តិ៍រកមេរោគកូវីដ ១៩ ដោយឧបករណ៍ Rapid Test របស់មន្ត្រីមន្ទីរសុខាភិបាលខេត្តព្រៃវែង ជនរងគ្រោះទាំងអស់មិនមានវិជ្ជមានកូវីដ ១៩ នោះទេ។ ការសង្ស័យថា ពួកគេស្លាប់ដោយករណីពុលស្រា ក្នុងជំហានបឋមនេះក៏ដោយសារសាច់ញាតិរបស់ពួកគេបានអះអាងថា ពួកគេមុនស្លាប់បានផឹកស្រាស និងស្រាថ្នាំច្រើនពេក»។
បន្ទាប់ពីមានការសង្ស័យទៅលើករណីពុលស្រា ក្រុមការងាររបស់លោកបានចុះសហការជាមួយអាជ្ញាធរមូលដ្ឋាន ធ្វើការស្រាវជ្រាវ និងប្រមូលសំណាកស្រាពីទីតាំងបិតស្រា និងតៀមលក់ស្រាស និង ស្រាថ្នាំសរុបចំនួន ១១ សំណាកពីក្នុងភូមិសាស្ត្រនៃតំបន់កើតហេតុនោះ បញ្ជូនទៅកាន់មន្ទីរពិសោធន៍របស់អគ្គនាយកដ្ឋាន ក.ប.ប ក្នុងរាជធានីភ្នំពេញ ដើម្បីពិសោធស្វែងរកការពិត។
លោក ឡុង ប៊ុនធឿន អធិការស្រុកពារាំងបានថ្លែងនៅថ្ងៃទី ២១ ខែមិថុនាថា បន្ទាប់ពីមានករណីអ្នកផឹកស្រាសស្លាប់ ៤ នាក់ អាជ្ញាធរស្រុកពារាំង បានសម្រេចហាមឃាត់ការផលិត ការនាំចេញនាំចូល និងការលក់ចែកចាយបន្តនូវផលិតផលស្រាស និងស្រាថ្នាំនៅទូទាំងស្រុកពារាំងទាំងមូល ជាពិសេសក្នុងមូលដ្ឋានឃុំមេសរប្រចាន់។ លោកនិយាយថា៖ «នៅពេលនេះ ក្រុមកម្លាំងសមត្ថកិច្ចយើង កំពុងសហការជាមួយមន្ត្រីជំនាញ សាខា ក.ប.ប ខេត្ត ចុះអង្កេតស្រាវជ្រាវលើករណីនេះ ខណៈគ្រួសារជនរងគ្រោះមិនបានបង្ហាញពីអត្តសញ្ញាណនៃប្រភពស្រា ដែលជនរងគ្រោះបានទិញយកមកផឹកនោះទេ»។
បើតាមលោក ប៊ុនធឿន មកទល់ពេលនេះ ពុំឃើញអ្នកភូមិណាម្នាក់ធ្លាក់ខ្លួនឈឺ ដោយអាការពុលស្រាទៀតនោះទេ។
ករណីសង្ស័យពុលស្រាស្លាប់ជនរងគ្រោះទាំង ៤ នាក់ក្នុងស្រុកពារាំង ខេត្តព្រៃវែងកាលពីថ្ងៃទី ១៩ ខែមិថុនា បានធ្វើឲ្យចំនួនអ្នកដែលបានស្លាប់ដោយករណីពុលស្រាស និងស្រាថ្នាំកើនដល់ ៣៥ នាក់ហើយ។
យោងតាមសេចក្ដីប្រកាសរបស់ក្រសួងសុខាភិបាលកាលពីថ្ងៃទី ៣ ខែមិថុនា ឱ្យដឹងថា ក្នុងត្រីមាសទី ១ ឆ្នាំនេះមានពលរដ្ឋចំនួន ៣១ នាក់ក្នុងខេត្តចំនួន ៣ រួមមាន ខេត្តកណ្ដាល កំពត និងខេត្តពោធិ៍សាត់បានស្លាប់ដោយសង្ស័យបណ្ដាលមកពីការទទួលទានស្រាស និងស្រាថ្នាំ ដែលមានសារធាតុមេតាណុលខ្ពស់៕
វីដេអូ៖
