កាលពីថ្ងៃចន្ទ ក្រុមហ៊ុន Dynamic Pharma Co Ltd បានឧបត្ថម្ភឱសថបុរាណទំនើបចិន លៀនហ៊័រ ឈីងវឹន ចំនួន ៥ ម៉ឺនប្រអប់ ដល់សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ដែលជាផ្នែកមួយនៃយុទ្ធនាការរបស់ខ្លួន ដើម្បីដោះស្រាយការផ្ទុះឡើងនៃជំងឺកូវីដ១៩ នៅក្នុងព្រះរាជាណាចក្រ កម្ពុជា។
ពិធីប្រគល់ឱសថបុរាណទំនើបចិននេះត្រូវបានធ្វើឡើងនៅការិយាល័យរបស់ TYDA ស្ថិតក្នុងសង្កាត់បឹងកក់១ ខណ្ឌទួលគោក។ ឱសថបុរាណទំនើបនេះ ត្រូវបានផលិតដោយក្រុមហ៊ុន Yiling Pharmaceutical របស់ចិន ដើម្បីព្យាបាលជំងឺ គ្រុនផ្តាសាយ និង កូវីដ ១៩។
នាយកប្រតិបត្តិរបស់ក្រុមហ៊ុន Dynamic លោក Tom Kimson និងនាយកគ្រប់គ្រងក្រុមហ៊ុន លោក ហ្លួង ចាន់ហ៊ុន បានប្រគល់ឱសថបុរាណទំនើបទាំងនោះ ដល់អ្នកតំណាងរបស់ TYDA គឺឯកឧត្តម ជា វុទ្ធី អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា និង លោកវេជ្ជបណ្ឌិត Thay MengKry ៕