កណ្តាលៈ ចៅក្រមស៊ីបសួរនៃសាលាដំបូងខេត្តកណ្តាលលោក ថោង ផល្លារង្សី កំពុងសាកសួរអ្នកសារព័ត៌មាន ៥ នាក់ និងអ្នករត់ម៉ូតូឌុបម្នាក់បន្ទាប់ពីព្រះរាជអាជ្ញារងចោទប្រកាន់ពួកគេពីបទ «គំរាមកំហែងហែកកេរ្តិ៍» នៅរសៀលថ្ងៃទី ២២ ខែមិថុនា។
លោក ជួន សុបញ្ញា អ្នកនាំពាក្យអយ្យការអមសាលាដំបូងខេត្តកណ្តាលថ្លែងថា លោកស្រី ផាត់ សុគន្ធា ព្រះរាជអាជ្ញារង អមសាលាដំបូងខេត្តកណ្តាលនៅរសៀលថ្ងៃទី ២២ ខែ មិថុនា ឆ្នាំ ២០២១ បានសម្រេចចោទប្រកាន់អ្នកសារព័ត៌មាន៥នាក់ជ្រកក្រោមស្លាកសារព័ត៌មាន BATI TV NEWS និងអ្នករត់ម៉ូតូឌុបម្នាក់សរុបទាំងអស់ ៦ នាក់ពីបទ «គំរាមកំហែងហែកកេរ្តិ៍» តាមមាត្រា ៣៧២-៣៧៣ នៃក្រមព្រហ្មទណ្ឌ ។
លោកបញ្ជាក់ថា ម្ចាស់ទីតាំងកន្លែងលក់កាហ្វេដែលសមត្ថកិច្ចចាប់បញ្ជូនមកដែរនោះ គឺជាសំណុំរឿងមួយផ្សេងទៀតត្រូវបាន ព្រះរាជអាជ្ញាចោទប្រកាន់ពីបទ «បើកកន្លែងល្បែងស៊ីសង» តាមមាត្រា៥នៃច្បាប់ស្តីពីល្បែងស៊ីសង។
លោកថ្លែងថា៖ «អ្នកសារព័ត៌មាននិងអ្នកម៉ូតូឌុបសរុប ៦ នាក់ហ្នឹង គឺបទចោទតែមួយហើយថ្ងៃនេះចៅក្រមសាកសួរមិនទាន់បញ្ចប់និតិវិធីទេ។ចំណែកម្ចាស់ កន្លែងល្បែងស៊ីសងត្រូវបានឃុំខ្លួនហើយកាលពីម្សិលមិញ»។
លោក ឡាក់ ម៉េងធី នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្តាលថ្លែងនៅរសៀលថ្ងៃទី២១ ខែមិថុនាថា កម្លាំងសមត្ថកិច្ចបានបញ្ជូនជនសង្ស័យ៧នាក់ទៅតុលាការនៅសៀលថ្ងៃទី ២១ ខែមិថុនា។ ក្នុងនោះមាន អ្នកពាក់ព័ន្ធក្នុងបទល្មើសគំរាមកំហែងទារប្រាក់ចំនួន ៦ នាក់ ដែលមានអ្នកសារព័ត៌មាន ៥ នាក់ [ប្រុស ៤ ស្រីម្នាក់] និងបុរសអ្នករត់ម៉ូតូឌុបម្នាក់ រីឯបុរសម្នាក់ផ្សេងទៀត ពាក់ព័ន្ធបទល្មើសបើកល្បែងស៊ីសងខុសច្បាប់។
លោក ឡាក់ ម៉េងធី ប្រាប់ថា អ្នកសារព័ត៌មាន ៥ នាក់ បាននាំទាំងអ្នករត់ម៉ូតូឌុបម្នាក់ផងចុះទៅដល់គោលដៅហាងកាហ្វេមួយកន្លែង។ ពេលទៅដល់ម្ចាស់សារព័ត៌មាន BATI NEWS បានឲ្យម៉ូតូឌុបម្នាក់ និងអ្នករាយការព័ត៌គាត់ម្នាក់ទៀត ទៅជួបម្ចាស់កន្លែងលក់កាហ្វេណែនាំខ្លួននិងទារលុយ ១០០ ដុល្លារ ជាថ្នូរនឹងការមិនចុះផ្សាយ ប៉ុន្តែម្ចាស់ទីតាំងយល់ព្រមឲ្យតែ ២០ ដុល្លារ។ លោកបន្តថា ក្រុមអ្នកសារព័ត៌មានមិនព្រមហើយក៏ចេញទៅធ្វើការផ្សាយផ្ទាល់នៅមុខហាងកាហ្វេ។ ឃើញដូចនោះម្ចាស់ទីតាំង ក៏ប្តឹងសមត្ថកិច្ចឲ្យជួយអន្តរាគមន៍។
លោកថ្លែងថា៖ «ក្រោយពីម្ចាស់កន្លែងលក់កាហ្វេប្តឹង កម្លាំងសមត្ថកិច្ចយើងចុះទៅដល់ ហើយបានឃាត់អ្នកសារព័ត៌មានទាំងនោះ ដែលបានផ្សាយស្រែកឡូឡាពេញមុខទីតាំងកន្លែងលក់កាហ្វេនោះ។ បុរសម្ចាស់កន្លែងលក់កាហ្វេនោះក៏ត្រូវឃាត់ខ្លួនដែរ ព្រោះយើងរកឃើញថា គាត់ពិតជាធ្លាប់បើកកន្លែងលេងល្បែងមែន ហើយកន្លងមកធ្លាប់ធ្វើកិច្ចសន្យាតែមិនរាងចាល» ។
បើតាមលោក ឡាក់ ម៉េងធី កម្លាំងសមត្ថកិច្ចបានឃាត់ខ្លួនជនសង្ស័យទាំងអស់នៅសៀលថ្ងៃទី ១៩ ខែមិថុនា នៅចំណុចផ្លូវលំ ភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្ដាល ។
លោក ប៉ែន បូណា ប្រធានក្លិបអ្នកកាសែតកម្ពុជា ថ្លែងថា លោកបានអំពាវនាវជាច្រើនលើកច្រើនសាដល់អ្នកសារព័ត៌មាន ប្រសិនបើចង់ចូលរួមចំណែកជួយកិច្ចការសង្គមត្រូវធ្វើកិច្ចការងារប្រកបដោយក្រមសីលធម៌វិជ្ជាជីវៈឲ្យបានខ្ជាប់ខ្ជួន កុំយកមុខជំនាញវិជ្ជាជីវៈសារព័ត៌មានទៅប្តូរជាមួយលុយកាក់ ឬប្រយោជន៍ផ្សេងៗខុសច្បាប់។
លោកថ្លែងថា៖ «ជាឧទាហរណ៍បើយើងឃើញកន្លែងណាមួយដែលប្រព្រឹត្តខុសមានភាពមិនប្រក្រតីណាមួយយើងទៅរកលុយ ក្នុងន័យបើគេឲ្យលុយយើងក៏បិទមិនផ្សាយ តែបើគេមិនឲ្យលុយក៏រករឿងគេផ្សាយអ៊ីចឹងទៅ។ ទាំងនេះយើងអត់អាចជួយសង្គមបានទេ ផ្ទុយទៅវិញយើងបង្កើតនូវបញ្ហាជូនសង្គមកាន់តែធំ ហើយបង្កើតបញ្ហាដល់ខ្លួនឯងផងដែរ ព្រោះគេមានភ័ស្តុតាងគ្រប់គ្រាន់សម្រាប់ចាប់ខ្លួន» ។
លោក ប៉ែន បូណា មិនគាំទ្រការប្រព្រឹត្តខុសមុខជំនាញវិជ្ជាជីវៈអ្នកសារព័ត៌មាននោះទេ បើអ្នកសារព័ត៌មានធ្វើខុសត្រង់ណាសូមឲ្យសមត្ថកិច្ចចាត់ការចុះ ប៉ុន្តែទន្ទឹមនោះលោកសំណូមឲ្យអាជ្ញាធរមានសមត្ថកិច្ចពិនិត្យមើលភាពអសកម្មឬបទល្មើសផ្សេងៗក្នុងដែនសមត្ថកិច្ចរបស់ខ្លួនផង។
លោកថ្លែងថា៖ «ប្រសិនបើចាត់ការតែអ្នកកាសែតប៉ុន្តែអ្នកដែលប្រព្រឹត្តបទល្មើសផ្សេងៗទៀតដែលអ្នកកាសែតគាត់ទៅរករឿងហ្នឹងយើងអត់បានចាប់ទេអាហ្នឹងយើងក៏អត់បានដោះស្រាយបញ្ហាសង្គមដែរអ៊ីចឹងទាល់តែសមត្ថកិច្ចស៊ីបអង្គេតរួចហើយចាត់វិធានការចំពោះអ្នកផ្សេងណាដែលប្រព្រឹត្តបទល្មើសផងទើបយើងបានរួមចំណែកទាំងអស់គ្នាក្នុងការជួយសង្គមឲ្យកាន់តែប្រសើរឡើង» ៕