.jpg)
គ្រូពេទ្យកំពុងរៀបចំវ៉ាក់សាំងចាក់ជូនប្រជាពលរដ្ឋ។ ហេង ជីវ័ន
ភ្នំពេញៈ ខេត្តចំនួន ៤ បានចាប់ផ្តើមដំណើរការព្រមគ្នាក្នុងការចាក់វ៉ាក់សាំង បង្ការជំងឺកូវីដ ១៩ ទៅដល់ប្រជាពលរដ្ឋជាយុទ្ធនាការទ្រង់ទ្រាយធំនៅថ្ងៃទី ២២ ខែមិថុនា ដែលមានប្រជាពលរដ្ឋសរុបជាង ១,២ លាននាក់ ហើយក្នុងនោះកងកម្លាំងនៃក្រសួងការពារជាតិទទួលបន្ទុកចាក់វ៉ាក់សាំង ដល់ប្រជាពលរដ្ឋចំនួន ៨១ ម៉ឺននាក់។
លោក ឥត សារ៉ាត់ អគ្គមេបញ្ជាការរង នាយសេនាធិការ ចម្រុះនៃកងយោធពលខេមរភូមិន្ទ និងជាប្រធានប្រតិបត្តិចាក់វ៉ាក់សាំងការពារជំងឺកូវីដ-១៩ ក្រសួងការពារជាតិបានមានប្រសាសន៍ នៅពេលចុះពិនិត្យការចាក់វ៉ាក់សាំងនៅក្នុងខេត្តព្រះសីហនុថា ខេត្តចំនួន ៤ ដែលបានចាប់ផ្តើមដំណើរការចាក់វ៉ាក់សាំងស្របគ្នានេះមាន ខេត្តព្រះសីហនុ កោះកុង កំពង់ស្ពឺ និងខេត្តតាកែវ ដោយមានប្រជាពលរដ្ឋជាច្រើននាក់បានសម្រុកមកចាក់វ៉ាក់សាំងនៅគ្រប់កន្លែង។
លោកបានថ្លែងថា៖ «ទាក់ទងនឹងចំនួននៃការចាក់វ៉ាក់សាំងនេះ យើងត្រូវធ្វើយ៉ាងណាចាប់ពីថ្ងៃនេះរហូតដល់ថ្ងៃទី ៣០ ខែមិថុនា ត្រូវតែចាក់ឱ្យចប់ដូសទី ១ នៅគ្រប់គោលដៅទាំងអស់។ នេះជាការប្តេជ្ញាចិត្តរបស់យើង ប៉ុន្តែជួនកាលចំនួនអាចលើស ឬខ្វះតិចតួចផងដែរ ដោយសារធាតុអាកាសជាដើម»។
លោក ឥត សារ៉ាត់ បានបន្តទៀតថា មកដល់ពេលនេះក្រុមការងារចាក់វ៉ាក់សាំងបានទទួលវ៉ាក់សាំងបានគ្រប់ចំនួនអស់ហើយ នៅក្នុងដៃទាំងដូសទី ១ និងដូសទី ២ សម្រាប់ទាំង ៤ ខេត្តនេះដោយមិនមានបញ្ហាក្នុងការខ្វះវ៉ាក់សាំងនោះទេ។
លោកបានអំពាវនាវទៅដល់ប្រជាពលរដ្ឋថា៖ «សូមកុំបារម្ភថា ខ្វះវ៉ាក់សាំង។ ដូចនេះ សូមបងប្អូនកុំនាំគ្នាសម្រុក ប្រជ្រៀតគ្នាមកចាក់ដោយខ្វះសណ្តាប់ធ្នាប់អី គឺយើងមានវ៉ាក់សាំងគ្រប់គ្រាន់ សម្រាប់ផ្តល់ជូនដល់ពលរដ្ឋរបស់យើង»។
ជាមួយគ្នានេះផងដែរ លោក ឥត សារ៉ាត់ បានបញ្ជាក់ទៀតថា ក្រៅពីខេត្តចំនួន ៤ ដែលកំពុងតែដំណើរការចាក់វ៉ាក់សាំងនេះ គឺមានខេត្តចំនួន ២ ផ្សេងទៀត ដែលកងកម្លាំងកងទ័ពនៃក្រសួងការពារជាតិ គ្រោងនឹងចុះចាក់វ៉ាក់សាំងជូនប្រជាពលរដ្ឋ និងកម្មករនិយោជិតផងដែរនោះ គឺខេត្តកំពង់ចាម និងខេត្តស្វាយរៀង ដោយសារខេត្ត ២ នេះមានការឆ្លងរីករាលដាលជំងឺកូវីដច្រើន។
លោកថា៖ «យើងនឹងបន្តទៅតាមបណ្តាគោលដៅផ្សេងទៀត តាមការប្រគល់ភារកិច្ចរបស់សម្តេចតេជោនាយករដ្ឋមន្ត្រី និងគណៈកម្មការចំពោះកិច្ចចាក់វ៉ាក់សាំងនេះ ដែលយើងបានត្រៀមរួចជាស្រេចហើយ»។
លោក អ៊ូច ភា អភិបាលខេត្តតាកែវក៏បានឱ្យដឹងផងដែរថា ក្នុងការប្រយុទ្ធប្រឆាំងជំងឺកូវីដ-១៩ រាជរដ្ឋាភិបាលបានដាក់ចេញនូវយុទ្ធសាស្ត្រ យុទ្ធនាការជាតិចាក់វ៉ាក់សាំងប្រឆាំងជំងឺកូវីដ ១៩ ដល់ប្រជាពលរដ្ឋទូទាំងប្រទេស។
លោកបន្តថា៖ «ថ្ងៃនេះក្រុមការងារចាក់វ៉ាក់សាំងក្រសួងការពារជាតិ បានចុះមកចាក់វ៉ាក់សាំងជូនប្រជាពលរដ្ឋក្នុងខេត្តតាកែវយើង ដែលបានកំណត់គោលដៅអាទិភាពគឺស្រុកបាទី និងស្រុកសំរោងហើយនឹងបន្តទៅស្រុកផ្សេងៗទៀតតាមផែនការយុទ្ធសាស្ត្រដែលបានដាក់ចេញ»។
លោក អ៊ូច ភា បានបន្តថា ក្រសួងការពារជាតិបានសហការជាមួយអាជ្ញាធខេត្ត ចាប់ផ្ដើមបើកយុទ្ធនាការចាក់វ៉ាក់សាំងការពារជំងឺកូវីដ ១៩ ប្រភេទស៊ីណូវ៉ាក់ចំនួន ៤០ ម៉ឺនដូសដល់មន្ត្រីរាជការ ព្រះសង្ឃ ប្រជាពលរដ្ឋ និងកម្មករ កម្មការិនី នៅក្នុងស្រុកទាំង ២ នេះមុនគេ។
គួរបញ្ជាក់ថា ខេត្តទាំង ៤ នេះចាប់ផ្តើមចាក់វ៉ាក់សាំងបង្ការជំងឺកូវីដ ១៩ បន្ទាប់ពីយុទ្ធនាការចាក់ក្នុងរាជធានីភ្នំពេញ និងតំបន់ហានិភ័យមួយចំនួនក្នុងខេត្តកណ្តាល។
យោងតាមរបាយការណ៍របស់មន្ទីរសុខាភិបាលបានឱ្យដឹងថា គិតត្រឹមថ្ងៃទី ២១ ខែមិថុនា ប្រជាពលរដ្ឋនៅតាមទីប្រជុំជន និងកម្មកររោងចក្រក្នុងតំបន់ហានិភ័យមួយចំនួនក្នុងខេត្តកណ្តាលនឹងត្រូវបិទបញ្ចប់ការចាក់ដូសទី ១ ក្នុងរយៈពេលប្រមាណជា ២ ទៅ ៣ ថ្ងៃខាងមុខ ខណៈលទ្ធផលដែលចាក់រួចទទួលបាន ៧០% ឬស្មើនឹងចំនួនពលរដ្ឋ ៥៩៩ ២៥១ នាក់នៃចំនួនសរុបជិត ៦០ ម៉ឺននាក់។
យោងតាមរបាយការណ៍របស់ក្រសួងសុខាភិបាលបានឱ្យដឹងថា មនុស្សជាង ៣,៤ លាននាក់បានចាក់វ៉ាក់សាំងបង្ការជំងឺកូវីដ-១៩ នៅទូទាំងប្រទេសគិតមកដល់ថ្ងៃទី ២១ ខែមិថុនា។
ក្រសួងសុខាភិបាលបានបន្តថា នៅទូទាំងប្រទេសកម្ពុជា សរុបការចាក់វ៉ាក់សាំងបង្ការជំងឺកូវីដ-១៩ បានចំនួន ៣ ៤១៦ ០៧៥ នាក់ ឬស្មើនឹង ៣៤,១៦% នៃលទ្ធផលធៀបនឹងគោលដៅចំនួន ១០ លាននាក់។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ ១៩ បានសរសេរនៅក្នុងបណ្តាញ Twitter របស់លោកស្រីនៅយប់ថ្ងៃទី ២១ ខែមិថុនា ថា៖ «ប្រសិន បើអ្នកភ័យខ្លាចសូមធ្វើការប្រែក្លាយភាពភ័យខ្លាចរបស់អ្នកទៅជាសកម្មភាពការពារការឆ្លងជំងឺកូវីដ ១៩។ សូមកុំភ័យស្លន់ស្លោ ហើយប្រមូលថ្នាំសម្រាប់ការការពារ ការធ្វើរបៀបនេះ គឺវានឹងមិនអាចជួយការពារអ្នកបានទាល់តែសោះ»៕
វីដេអូ៖
