.jpg)
ដីព្រៃជាង ២០ ហិកតានៅដែនជម្រកសត្វព្រៃភ្នំឱរ៉ាល់ ខេត្តកំពង់ឆ្នាំងត្រូវបានគេទន្ទ្រាន។ រូបថត ហ្វេសប៊ុក
កំពង់ឆ្នាំងៈ មន្ត្រីជំនាញនៃមន្ទីរបរិស្ថានខេត្តកំពង់ឆ្នាំងបាននិងកំពុងស្រាវជ្រាវរកជនល្មើស ដែលបានចូលទៅទន្ទ្រានកាន់កាប់ ដោយខុសច្បាប់លើដីព្រៃតាមជើងភ្នំក្នុងដែនជម្រកសត្វព្រៃភ្នំឱរ៉ាល់ជាង ២០ ហិកតា ស្ថិតក្នុងភូមិសាស្ត្រ ភូមិខ្វិតទួលឃ្លាំង ឃុំក្បាលទឹក ស្រុកទឹកផុស ខេត្តកំពង់ឆ្នាំង។
លោក យ៉ង ភិរម្យ ប្រធានមន្ទីរបរិស្ថានខេត្តកំពង់ឆ្នាំងប្រាប់ ភ្នំពេញ ប៉ុស្តិ៍ នៅថ្ងៃទី ២២ ខែមិថុនាថា បច្ចុប្បន្នមន្ត្រីជំនាញកំពុងវាស់វែង ដីព្រៃដែលត្រូវបានទន្ទ្រានក្នុងដែនជម្រកសត្វព្រៃភ្នំឱរ៉ាល់ និងស្វែងរកមុខជនល្មើសយកមកផ្តន្ទាទោសទៅតាមច្បាប់ពាក់ព័ន្ធនឹងការទន្ទ្រានដី និងកាន់កាប់ដោយខុសច្បាប់នេះ។
លោកថា៖ «ឥឡូវនេះខ្ញុំកំពុងតែចាត់ចែងទៅតាមច្បាប់ ប៉ុន្តែមិនទាន់បានកំណត់មុខសញ្ញាជនសង្ស័យណាមួយនៅឡើយទេ»។
ទោះជាយ៉ាងណា លោកថា មន្ត្រីជំនាញកំពុងធ្វើកិច្ចការនេះនៅទីតាំងដែលត្រូវបានទន្ទ្រាន ហើយអ្វីដែលគ្រាន់តែសង្ស័យ គឺមិនអាចបញ្ចេញអត្តសញ្ញាណ ជនសង្ស័យបានទេ។
អភិបាលស្រុកទឹកផុស លោក ម៉េង ហាក់ ឱ្យដឹងពីម្សិលមិញថា ករណីទន្ទ្រានដីព្រៃក្នុងដែនជម្រកសត្វព្រៃភ្នំឱរ៉ាល់នេះ លោកបានបញ្ជូនសំណុំរឿងទៅមន្ត្រីជំនាញនៃមន្ទីរបរិស្ថានខេត្ត ដើម្បីដោះស្រាយទៅតាមនីតិវិធី ព្រោះកិច្ចការនេះគ្រប់គ្រងដោយមន្ត្រីជំនាញបរិស្ថាន។
បើតាមលោកអភិបាលស្រុក បច្ចុប្បន្នមន្ត្រីជំនាញនៃមន្ទីរបរិស្ថានកំពុងរៀបចំនីតិវិធី ហើយក៏បានកំណត់មុខសញ្ញារួចហើយដែរចំពោះជនល្មើស។ ទោះជាយ៉ាងណា លោកមិនទាន់ទទួលព័ត៌មានលម្អិតពីជនល្មើសនេះមកពីតំបន់ណា ឬមានឋានៈកម្រិតណានោះទេ ព្រោះសំណុំរឿងស្ថិតក្នុងការងារមន្ត្រីជំនាញមន្ទីរបរិស្ថាន។
លោកបញ្ជាក់ថា៖ «គណៈបញ្ជាការឯកភាពស្រុកកំពុងតែរង់ចាំបទបញ្ជាពីមន្ត្រីជំនាញមន្ទីរបរិស្ថាន និងចុះទៅអនុវត្តចាប់ជនល្មើសភ្លាមតែម្តង»។
លោកថា មូលហេតុដែលមានជនល្មើសចូលទៅទន្ទ្រានដីក្នុងដែនជម្រកសត្វព្រៃនេះមិនមែនមន្ត្រីនៃមន្ទីរបរិស្ថានមិនយកចិត្តទុកដាក់បង្ក្រាប ឬមិនមានវិធានការនោះទេ ប៉ុន្តែមន្ត្រីនៃឧទ្យានុរក្សមានចំនួនតិច មិនអាចចុះពិនិត្យមើលសព្វទីកន្លែងបាននោះទេ ខណៈជនល្មើសបានធ្វើក្នុងរូបភាពលួចលាក់។ ទោះយ៉ាងណា ក៏មានការបំពេញការងារនៅមានខ្វះចន្លោះមួយចំនួន ប៉ុន្តែមន្ត្រីជំនាញនៅតែបន្តធ្វើកិច្ចការងារនេះមិនឱ្យជនល្មើសណាមួយរួចខ្លួនឡើយ។
ដែនជម្រកសត្វព្រៃនេះ សុទ្ធតែមានបង្គោលកំណត់ព្រំបានត្រឹមត្រូវ និងមានព្រះរាជក្រឹត្យទទួលស្គាល់ លើកលែងតែដីមួយចំនួនដែលត្រូវបានធ្វើដោយអនុប្រយោគកាលពីយុទ្ធនាការ ០១ របស់លោកនាយករដ្ឋមន្ត្រី ហ៊ុន សែន។ ក្រៅពីនេះ សុទ្ធតែដីរបស់រដ្ឋទាំងអស់មិនមានបុគ្គលណាហ៊ានចូលទៅទន្ទ្រានកាន់កាប់នោះទេ។ នេះជាការបញ្ជាក់របស់លោក ម៉េង ហាក់។
លោក សំ ច័ន្ទគា មន្ត្រីសម្របសម្រួលផ្នែកសិទ្ធិមនុស្ស (ADHOC) ប្រចាំខេត្តកំពង់ឆ្នាំង និងពោធិ៍សាត់ថ្លែងថាតាមការសង្កេតកន្លងមក អ្នកដែលចូលទៅទន្ទ្រានដីរបស់រដ្ឋ ភាគច្រើនគឺជាអ្នកមានអំណាច និងមានលុយ។
ក្រៅពីនេះ អ្នកដែលទទួលរងនូវការញុះញង់ពីឈ្មួញ ដើម្បីឱ្យចូលទៅទន្ទ្រានកាន់កាប់ដីនេះ។ ចំពោះការចូលទៅទន្ទ្រានដីថ្មីក្នុងរូបភាពបែបណានោះ លោកថាមិនបានដឹងនោះទេ ប៉ុន្តែវាជាឱកាសរបស់ជនល្មើសដែលមានអំណាចក្នុងការចូលទៅទន្ទ្រានដីនេះ ខណៈរដ្ឋាភិបាលកំពុងជាប់ដៃប្រយុទ្ធប្រឆាំងនឹងជំងឺកូវីដ ១៩។
បើតាមលោក សំ ច័ន្ទគា ករណីចូលទៅទន្ទ្រានដីព្រៃក្នុងដែនជម្រកសត្វព្រៃភ្នំឱរ៉ាល់នេះ ដោយសារមន្ត្រីជំនាញ បណ្តែតបណ្តោយឱ្យមានបទល្មើសនេះកើតឡើងរីករាលដាលពីតំបន់ ១ ទៅតំបន់ ១ ទៀត។ បើសិនជាមន្ត្រីជំនាញ មានចំណាត់ការត្រឹមត្រូវ គឺមិនមានករណីនេះកើតឡើងទៀតទេ។
មន្ត្រីសិទ្ធិមនុស្សរូបនេះថ្លែងថា៖ «មន្ត្រីជំនាញដែនជម្រកសត្វព្រៃនេះមិនមានលទ្ធភាព ឬសមត្ថភាពក្នុងការគ្រប់គ្រង ដោយសារតែជនល្មើសមានអំណាចធំពេក និងមិនបានបញ្ជូនសំណុំរឿងទៅថ្នាក់លើ ដើម្បីមានដំណោះស្រាយ ហើយបានបិទបាំងជនល្មើស លុះត្រាក្រុមអធិការកិច្ចចុះមកមើលទើបមានចំណាត់ការ»៕
វីដេអូ៖
