.jpg)
ឧត្តមសេនីយ៍ (កណ្តាល) ពាក់ព័ន្ធនឹងបទឆបោក ពេលនាំខ្លួនទៅតុលាការ។ រូបថត នគរបាល
ភ្នំពេញៈ សាលាដំបូងរាជធានីភ្នំពេញបានសម្រេចដោះលែងលោកឧត្តមសេនីយ៍ទោ ហង្ស វណ្ណៈ ឱ្យនៅក្រៅឃុំជាបណ្ដោះអាសន្ន ក្រោយពីបានធ្វើការជំនុំជម្រះ មុនអង្គសេចក្ដីពាក់ព័ន្ធនឹងបទឆបោកប្រាក់ជាង ២ ម៉ឺនដុល្លារ។ នេះបើតាមការបញ្ជាក់របស់លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ។
លោកឧត្តមសេនីយ៍ទោ ហង្ស វណ្ណៈ ត្រូវបានកម្លាំងនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញចាប់ឃាត់ខ្លួនកាលពីព្រឹកថ្ងៃទី ១៧ ខែ មិថុនា ឆ្នាំ ២០២១ នៅចំណុចភូមិព្រែកសំរោង ៣ សង្កាត់តាខ្មៅ ក្រុងតាខ្មៅ ខេត្តកណ្ដាលតាមដីកាបង្គាប់ឱ្យចាប់ខ្លួនរបស់លោក ម៉ៅ ស៊ីណា ចៅក្រមស៊ើបសួរ សាលាដំបូងរាជធានីភ្នំពេញពាក់ព័ន្ធករណី «ឆបោក» ប្រាក់ជាង ២ ម៉ឺនដុល្លារ រឿងធានារត់ការច្បាប់ឱ្យប្រជាពលរដ្ឋម្នាក់ ចូលបម្រើការងារក្នុងក្របខ័ណ្ឌនគរបាលជាតិ មិនបានសម្រេច។
លោក អ៊ី រិន្ទ បានបញ្ជាក់កាលពីម្សិលមិញថា៖ «គាត់ [ហង្ស វណ្ណៈ] ត្រូវបានកម្លាំងសមត្ថកិច្ចបញ្ជូនមកកាន់សាលាដំបូងរាជធានីភ្នំពេញនៅថ្ងៃទី ២១ ខែមិថុនា ឆ្នាំ ២០២១។ គាត់ត្រូវបានលោក សាន្ត ប៊ុនធឿន ចៅក្រមជំនុំជម្រះសម្រេចដោះលែងឱ្យនៅក្រៅឃុំជាបណ្ដោះអាសន្ន ក្រោយបើកសវនាការ មុនអង្គសេចក្ដីនាថ្ងៃនោះ»។
ទោះយ៉ាងណាលោក អ៊ី រិន្ទ បញ្ជាក់ថា ប៉ុន្តែគាត់នៅតែជាប់ចោទពីបទឆបោក ដែលនឹងត្រូវរង់ចាំការបើកសវនាការលើអង្គសេចក្ដីនៅពេលក្រោយ។
យោងតាមប្រភពពីមន្ត្រីនគរបាលនៃស្នងការដ្ឋាននគរបាលរាជធានីភ្នំពេញដែលសុំមិនបញ្ចេញឈ្មោះបានឱ្យដឹងថា លោកឧត្តមសេនីយ៍ ហង្ស វណ្ណៈ ត្រូវបានប្រជាពលរដ្ឋម្នាក់ ប្តឹងចោទប្រកាន់ថា បានយកលុយរបស់គាត់ ដែលជាជនរងគ្រោះចំនួន ២២ ០០០ ដុល្លារ ជាថ្នូរជួយរត់ការឱ្យគាត់បានចូលបម្រើការងារក្នុងក្របខ័ណ្ឌជាមន្ត្រីនគរបាលជាតិ ប៉ុន្តែមិនបានសម្រេចតាមការសន្យា ហើយបានគេចវេះមិនជួបដោះស្រាយ ជាមួយគាត់ដោយសន្តិវិធីឡើយ។
ក្រោយពីមានបណ្ដឹងពីជនរងគ្រោះ លោក ហង្ស វណ្ណៈ ក៏ត្រូវបានលោក ម៉ៅ ស៊ីណា ចៅក្រមស៊ើបសួរ សាលាដំបូងរាជធានីភ្នំពេញចោទប្រកាន់ពីបទ «ឆបោក» ប្រព្រឹត្តនៅចំណុចស្ថានីយប្រេងឥន្ធនៈសូគីមិច លើមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញកាលពីថ្ងៃទី ២ ខែ កញ្ញា ឆ្នាំ ២០១៦។ បទល្មើសព្រហ្មទណ្ឌនេះ មានចែងឱ្យផ្តន្ទាទោសតាមបញ្ញត្តិមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ។
លោក ប៉ិច ពិសី ប្រធានអង្គការតម្លាភាពកម្ពុជាបានថ្លែងថា បើពិនិត្យឱ្យស៊ីជម្រៅទៅ ករណីរបស់លោកឧត្តមសេនីយ ហង្ស វណ្ណៈ គឺ មានជាប់ពាក់ព័ន្ធនឹងអំពើពុករលួយ តាមរយៈការសូកប៉ាន់ចូលបម្រើការងារក្នុងក្របខ័ណ្ឌនគរបាលជាតិ។ ករណីនេះមិនមែនទើបតែកើតមាននាពេលបច្ចុប្បន្ននោះទេគឺវាបានកើតឡើងគ្រប់ជំនាន់មកហើយ។
លោកបានបញ្ជាក់ថា៖ «បើគាត់ [ហង្ស វណ្ណៈ] ជាសាមញ្ញជន ដែលមិនបម្រើការងារជាឧត្តមមន្ត្រី ករណីរបស់គាត់គឺជាអំពើឆបោក ប៉ុន្តែគាត់ជាឧត្តមមន្ត្រី ដូច្នេះការប្រព្រឹត្តរបស់គាត់បែបនេះ គឺជាបទល្មើស ស៊ីសំណូក ដែលអង្គភាពប្រឆាំងអំពើពុករលួយគប្បី បើកការស៊ើបអង្កេតឱ្យបានស៊ីជម្រៅ»។
ការបើកការស៊ើបអង្កេតឱ្យបានស៊ីជម្រៅត្រូវបានលោក ប៉ិច ពិសី ពន្យល់ថា ដើម្បីស្វែងរកការពិត និងដើម្បីការពារសុចរិតភាព និងសេចក្ដីថ្លៃថ្នូរជូនដល់ឧត្តមមន្ត្រីសាធារណៈផ្សេងទៀត ដែលពួកគាត់ជាអ្នកបំពេញការងារ និងតួនាទីបានល្អត្រឹមត្រូវ ដើម្បីជាឧត្តមប្រយោជន៍សម្រាប់ជាតិ និង ប្រជាជន៕
