.jpg)
សមត្ថកិច្ចកាប់បំផ្លាញស្បៃអួន ដែលត្រូវបានគេដាក់រាំងចាប់ត្រីដោយខុសច្បាប់ក្នុងបឹងទន្លេសាប កាលពីថ្ងៃទី ២១ ខែមិថុនា។ រូបថត ក្រសួងកសិកម្ម
ពោធិ៍សាត់ៈ ក្នុងរដូវបិទនេសាទនេះ មន្ត្រីនៃមន្ទីរកសិកម្ម រុក្ខាប្រមាញ់ និងនេសាទនិងសមត្ថកិច្ចពាក់ព័ន្ធខេត្តពោធិ៍សាត់ បានបំផ្លាញរបាំងសាច់អួនចំនួន ១១ ខ្សែ ដែលមានប្រវែង ២ ៥០០ ម៉ែត្រ ដែលរឹបអូសបាន ពីការធ្វើនេសាទខុសច្បាប់ នៅក្នុងភូមិសាស្ត្របឹងទន្លេសាប ខណៈសកម្មភាពបទល្មើសនេសាទ នៅតែបន្តកើតមាននៅក្នុងភូមិសាស្ត្រាខេត្តពោធិ៍សាត់ ។ នេះបើតាមលោក ភុំ វិមល។
លោក ភុំ វិមល នាយខណ្ឌរដ្ឋបាលជលផល ខេត្តពោធិ៍សាត់ ប្រាប់ ភ្នំពេញ ប៉ុស្តិ៍ នៅថ្ងៃទី ២៣ ខែមិថុនា ឆ្នាំ ២០២១ នេះថា ក្រៅពីនេះ ឧករណ៍នេសាទខុសច្បាប់ផ្សេងទៀត ដូចជា របាំងសាច់អួនក្រឡាល្អិត ប្រវែង ១ ៣០០ ម៉ែត្រ និងលូកងស្បៃមុងជាច្រើនក៏ត្រូវបានបំផ្លាញផងដែរ។
ទោះជាយ៉ាងណា នៅក្នុងរដូវបិតនេសាទនេះ មន្ត្រីជលផលខេត្ត បានយកចិត្តទុកដាក់យ៉ាងខ្លាំង ទៅលើការផ្សព្វផ្សាយ និងអប់រំណែនាំ រួមជាមួយនឹងការចុះបង្ក្រាប នៅទីតាំងជាក់ស្តែង។ ការយកចិត្តទុកដាក់ លើបញ្ហាទាំងនេះ គឺដើម្បីធ្វើយ៉ាងណារក្សាកំណើនត្រី នៅក្នុងបឹងទន្លេសាប។
លោក ភុំ វិមល ថ្លែងថា ៖« អាជ្ញាធរមិនហាមឃាត់ការធ្វើនេសាទទេ ប៉ុន្តែ ត្រូវប្រើប្រាស់ឧបករណ៍ណា ដែលមិនប៉ះពាល់ដល់ប្រភពត្រី និងជម្រកត្រីពង។ ជាពិសេសក្នុងអំឡុងពេលនេះ បើអាច ប្រជាពលរដ្ឋគួរទទួលទាន ពងមាន់ ពងទា ឬសាច់អ្វីផ្សេងក្រៅពីត្រី ដើម្បីទុកឱ្យត្រីពងនិងញាស់ឱ្យបានច្រើន ។ ចាំដល់ខែតុលា ចាំចាប់ផ្តើមនេសាទ»។
បើតាម លោក ភុំ វិមល នៅក្នុងអំឡុងពេលនៃការចុះបង្ក្រាបនេះ មន្ត្រីជំនាញមិនបានឃាត់ខ្លួន ឬបញ្ជូនជនសង្ស័យណាម្នាក់ទៅតុលការនោះទេ គ្រាន់តែបានធ្វើការអប់រំពួកគាត់ឱ្យ យល់ដឹងពីសារៈប្រយោជន៍នៃជលផលនៅក្នុងអំឡុងពេលនេះ និងរុះរើឧបករណ៍នេសាទចេញ ប៉ុន្តែ បើធ្ងន់ធ្ងរ អាជ្ញាធរនឹងហៅគាត់មកខេត្ត ដើម្បីអប់រំឬអាចឈានដល់ធ្វើកិច្ចសន្យាថែមទៀត។
នាពេលបច្ចុប្បន្ននេះ ប្រជាពលរដ្ឋមានការយល់ដឹងច្រើន ពីការធ្វើនេសាទក្នុងរដូវបិទនេសាទនេះ បន្ទាប់ពីមានការអប់រំណែនាំ ពីមន្ត្រីអាជ្ញាធរ ដោយពួកគាត់យល់ឃើញថា បើពួកគាត់នៅតែបន្តនេសាទក្នុងរដូវបិទនេសាទនេះ វានឹងលែងមានត្រី នៅក្នុងពេលបើកនេសាទខាងមុខ។
សម្រាប់ការ ចុះបង្ក្រាបវិញលោកវិមលបញ្ជាក់ថា មន្ត្រីជលផលខេត្តនៅតែបន្តធ្វើកិច្ចការនេះជាប្រចាំមិនដែលខាននោះទេ ជាពិសេសនៅក្នុងរដូវបិទនេសាទនេះ ។
ប៉ុន្តែ វានៅតែមានការខ្វះចន្លោះដោយសារមន្ត្រីមានជំនួនតិច និងទន្លេសាបនៅក្នុងភូមិសាស្ត្រខេត្តពោធិ៍សាត់មាន បណ្តោយទឹករហូតដល់ជាង ៨០ គីឡូម៉ែត្រ។
លោក ភួង ហ៊ីង សមាជិកសហគមន៍នេសាទចារុះក្នុងស្រុកកណ្តៀង ខេត្តពោធិ៍សាត់ បានឱ្យដឹងថា នៅក្នុងអំឡុងពេលរដូវបិតនេសាទនេះ លោកឃើញអាជ្ញាធរបានខិតខំប្រឹងប្រែង ក្នុងការចុះទៅបង្ក្រាបបទល្មើស និងផ្សព្វផ្សាយច្បាប់ផ្សេងៗ ប៉ុន្តែប្រជានេសាទមួយចំនួនតូច នៅតែបន្តលួចទៅធ្វើនេសាទដោយខុសច្បាប់។
ទោះជាយ៉ាងណា ក៏ពួកគាត់រកមិនបានដែរ ពីព្រោះនៅក្នុងអំឡុងពេលនេះ គឺខ្សត់ត្រី។
បើតាមលោក ភួង ហ៊ីង ប្រជាពលរដ្ឋនៅទីនេះ បើធៀបពីពេលមុន ពួកគាត់មានការយល់ដឹងច្រើន ពីរដូវបិទនេសាទនេះ បន្ទាប់ពីអាជ្ញាធរចុះមកផ្សព្វផ្សាយ និងអប់រំ។
រដ្ឋបាលជលផល ក្រសួងកសិកម្ម រុក្ខាប្រមាញ់ និងនេសាទកាលពីខែឧសភា បានប្រកាសពីរដូវបិទនេសាទ ដោយត្រូវបែងចែកជាពីរបន់ផ្សេងគ្នា ដោយក្នុងនោះ ដែននេសាទដែលស្ថិតនៅភាគខាងជើងខ្សែស្របចតុមុខ រួមមានខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ សៀមរាប ឧត្តរមានជ័យ ព្រះវិហារ រតនគិរី មណ្ឌលគិរី ក្រចេះ ត្បូងឃ្មុំ កំពុងចាម កំពង់ធំ និងមួយផ្នែករាជធានីភ្នំពេញ និង ខេត្តកណ្តាល ត្រូវបានបិទនេសាទចាប់ពីថ្ងៃទី ១ ខែមិថុនា ដល់ថ្ងៃទី ៣០ ខែកញ្ញា ឆ្នាំ ២០២១។
ចំណែកដែននេសាទដែលស្ថិតនៅភាគខាងត្បូងខ្សែស្របទន្លេចតុមុខ រួមមានខេត្តព្រៃវែង ស្វាយរៀង តាកែវ កំពង់ស្ពឺ និងមួយផ្នែករាជធានីភ្នំពេញ និង ខេត្តកណ្តាល ត្រូវបានបិទនេសាទចាប់ពីថ្ងៃទី ១ ខែកក្កដា ដល់ថ្ងៃទី ៣១ ខែ តុលា ឆ្នាំ ២០២១។ ទោះជាយ៉ាងណា ប្រជានេសាទនៅតែអាចធ្វើនេសាទបាននៅក្នុងអំឡុងពេលនេះបាន ដោយប្រើតែ ឧបករណ៍នេសាទជាលក្ខណៈគ្រួសារ៕
វីដេអូ៖
