.jpg)
ក្រុមជនសង្ស័យ ៣ នាក់ ក្រោយសមត្ថកិច្ចចាប់ខ្លួនបានកាលពីថ្ងៃទី ២២ មិថុនា។ រូបថត ប៉ូលិស
តាកែវៈ នគរបាលព្រហ្មទណ្ឌខេត្តតាកែវ បានបញ្ជូនជនសង្ស័យ ៣ នាក់ ទៅសាលាដំបូងខេត្តតាកែវ នៅរសៀលថ្ងៃទី ២៣ មិថុនា បន្ទាប់ចាប់ខ្លួនបាន ១ ថ្ងៃ ពាក់ព័ន្ធករណីព្រួតគ្នាកាប់បុរសម្នាក់ស្លាប់ រឿងទំនាស់លេងបាល់កាលពីថ្ងៃទី ១៩ មិថុនា នៅភូមិខ្នារទង ឃុំកុមារាជា ស្រុកបាទី ខេត្តតាកែវ។
លោក សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្តតាកែវ ប្រាប់នៅថ្ងៃទី ២៣ មិថុនាថា ក្រុមជនសង្ស័យមានឈ្មោះ ម៉ម សម្បត្តិ ហៅបាត់ ភេទប្រុស អាយុ ២១ ឆ្នាំ ជាបងបង្កើតរបស់ឈ្មោះ ម៉ម សីហា ភេទប្រុស ១៨ (ជនដៃដល់) និងឈ្មោះ ឌឹម ប្រុស ហៅរាជ ភេទប្រុសអាយុ ១៨ ឆ្នាំ។ រីឯជនរងគ្រោះឈ្មោះ មាំង ខេមរៈ ភេទប្រុស អាយុ ២៧ ឆ្នាំ។ ពួកគេទាំងអស់គ្នារស់នៅ ភូមិខ្នារទង ឃុំកុមារាជា ស្រុកបាទី ខេត្តតាកែវ។
លោកថ្លែងថា៖ «ក្រុមជនសង្ស័យទើបបញ្ជូនដល់ការិយាល័យព្រហ្មទណ្ឌកម្រិតធ្ងន់របស់ខ្ញុំនៅវេលាថ្ងៃត្រង់នេះ (ថ្ងៃទី ២៣ មិថុនា) ហើយយើងបញ្ជូនបន្តទៅតុលាការតាមនីតិវិធីហើយ»។
លោក ឃុត ឡូ អធិការរងផែនការងារព្រហ្មទណ្ឌនៃអធិការដ្ឋាននគរបាលស្រុកបាទីបានឱ្យដឹងនៅថ្ងៃទី ២៣ មិថុនាថា ជនសង្ស័យទាំង៣នាក់ ត្រូវបានសមត្ថកិច្ចចាប់ខ្លួននៅទីតាំងផ្សេងគ្នា កាលពីថ្ងៃទី ២២ មិថុនា ដោយ ២ នាក់ បងប្អូនចាប់នៅភូមិភ្នំតូច ឃុំសំភី និងម្នាក់ឈ្មោះ ឌឹម ប្រុស ចាប់នៅភូមិខ្នារទង ឃុំកុមារាជា ក្នុងស្រុកបាទី ខេត្តតាកែវតែមួយ។ ការតាមចាប់ក្រុមជនសង្ស័យនេះ គឺសមត្ថកិច្ចរបស់លោកបានសហការជាមួយនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិ ក្រសួងមហាផ្ទៃ ។
លោកថ្លែងថា៖ «ក្រុមជនសង្ស័យជាអ្នកបង្កបទល្មើសជាក់ស្តែងហើយក្រោយពេលសមត្ថកិច្ចយើងចាប់ខ្លួន គឺពួកគេទទួលស្គាល់ថា ពិតជាបានកាប់សម្លាប់ជនរងគ្រោះមែន។ ពួកគេមានគំនុំជាមួយជនរងគ្រោះរឿងលេងបាល់»។
លោក ឃុត ឡូ រៀបរាប់តាមសម្តីជនសង្ស័យថា កាលពីថ្ងៃទី ១៩ មិថុនា ពួកគេបានលេងបាល់ទះជាមួយជនរងគ្រោះឈ្មោះ ឈ្មោះ មាំង ខេមរៈ ក្នុងភូមិជាមួយគ្នា ហើយបានទាស់សម្ដីគ្នា ប៉ុន្តែមិនបានវាយតប់គ្នាទេ។ លុះដល់ម៉ោងជាង ១០ យប់ថ្ងៃដដែល ជនសង្ស័យទាំង ៣ នាក់ បានយកកាំបិតផ្គាក់ ១ ទៅរកជនរងគ្រោះដល់ផ្ទះ។ គាប់ជួនពេលនោះពួកគេបានឃើញជនរងគ្រោះកំពុងឈរនៅមុខផ្ទះ របស់គាត់ក៏នាំគ្នាស្ទុះទៅវាយ និងកាប់សម្លាប់តែម្តង។
លោកបានបន្តថា ក្រោយបង្កហេតុក្រុមជនសង្ស័យបានរត់គេចខ្លួនទាំងយប់ ហើយកម្លាំងនគរបាលស្រុកបាទី ដោយទទួលបានបញ្ជាពីលោកឧត្តមសេនីយ៍ទោ សុខ សំណាង និងពីលោក ឆាយ កែវមុន្នី អធិការនគរបាលស្រុកបាទីផងនោះ បានចេញរុករកក្រុមជនសង្ស័យ ប៉ុន្តែពួកគេបានរត់ចេញពីភូមិកើតហេតុអស់។
លុះព្រឹកឡើងថ្ងៃទី ២០ មិថុនា សមត្ថកិច្ចស្រាវជ្រាវដឹងថា ជនសង្ស័យ ឈ្មោះ ឌឹម ប្រុស បានរត់ទៅស្រុករុក្ខគិរីខេត្តបាត់ដំបង។តែដោយជនសង្ស័យដឹងថា សមត្ថកិច្ចតាមចាប់ក៏គេចខ្លួនមករាជធានីភ្នំពេញរួចចូលទៅលាក់ខ្លួនក្នុងភូមិខ្នារទង ក្នុងស្រុកបាទីវិញ ទើបកម្លាំងសមត្ថកិច្ចចាប់បានតែម្តង។
បើតាមលោក ឃុត ឡូ បន្ទាប់ពីចាប់បានជនសង្ស័យឈ្មោះ ឌឹម ប្រុស សមត្ថកិច្ចក៏បញ្ជាឱ្យឈ្មោះនេះ ទូរស័ព្ទទាក់ទងបក្ខពួកគេ ២ នាក់ទៀត ឈ្មោះម៉ម សម្បត្តិ និង ម៉ម សីហា ដែលកំពុងលាក់ខ្លួនក្នុងព្រៃនៅម្តុំភ្នំតាម៉ៅស្ថិតក្នុងភូមិភ្នំតូច ឃុំសំភី ស្រុកបាទី ដើម្បីជួបគ្នា ហើយសមត្ថកិច្ចក៏ចាប់ខ្លួនតែម្តង។ការងារនេះក្រុមសមត្ថកិច្ចបានចំណាយពេល ៤ ថ្ងៃ ក្នុងការតាមចាប់ក្រុមជនសង្ស័យទាំងនេះ៕
