.jpg)
នគរបាល និងពលរដ្ឋពិនិត្យមើលសាកសពដែលត្រូវរន្ទះបាញ់។ រូបថត នគរបាល
កណ្ដាលៈ បុរសខ្មែរឥស្លាម ២ នាក់ ត្រូវរន្ទះបាញ់ស្លាប់ ពេលមេឃកំពុងធ្លាក់ភ្លៀងខ្លាំង ហើយជនរងគ្រោះអង្គុយនៅក្រោមដើមអាកាស្យាមួយដើមស្ថិតក្នុងភូមិពោធិតាប៉ាង ឃុំស្វាយប្រទាល ស្រុកស្អាង ខេត្តកណ្តាល កាលពីថ្ងៃទី ២២ មិថុនា។
លោក គុណ គា នាយនគរបាលប៉ុស្តិ៍រដ្ឋបាលឃុំ ស្វាយប្រទាលប្រាប់នៅរសៀលថ្ងៃទី ២៣ មិថុនាថា ជនរងគ្រោះស្លាប់ទី១- ឈ្មោះ ម៉ាត់ នសា ភេទប្រុស អាយុ ២៨ ឆ្នាំ (កូនប្រសារ) ទី២-ឈ្មោះ ស៊េន ម៉ាអ៊ែល ភេទប្រុស អាយុ ១៦ ឆ្នាំ។ ពួកគេជាជនជាតិខ្មែរអ៊ិស្លាមមានរបរជាអ្នកទាក់សត្វ និងរស់នៅភូមិបារ៉ែនក្រោម ឃុំស្វាយប្រទាល ស្រុកស្អាង ខេត្តកណ្តាល។
លោកប្រាប់ថា៖ «ករណីនេះ សមត្ថកិច្ចយើងពិនិត្យឃើញថា ពួកគេត្រូវរន្ទះបាញ់ស្លាប់ពិតមែន ហើយយើងក្នុងនាមជាអាជ្ញាធរសមត្ថកិច្ចមូលដ្ឋានបានប្រគល់សពដល់ក្រុមគ្រួសារពួកគេធ្វើបុណ្យហើយ»។
លោក គុណ គា បានថ្លែងដោយយោងតាមអ្នករួមដំណើរជាមួយបានឱ្យដឹងថា មុនកើតហេតុប្រហែលជាម៉ោង ១ រសៀលថ្ងៃទី ២២ មិថុនា ជនរងគ្រោះនាំគ្នាទៅវ៉ៃលប់ ដើម្បីទាក់សត្វស្លាបក្នុងព្រៃនៅចំណុច ទំនប់សង្កែសោម ស្ថិតក្នុងភូមិពោធិតាប៉ាង ឃុំស្វាយប្រទាល ស្រុកស្អាង។ ប៉ុន្តែនៅពេលដែលពួកគេកំពុងវ៉ៃលប់សត្វក៏ស្រាប់តែមានភ្លៀងធ្លាក់មួយមេធំ។ មានរន្ទះបាញ់ខ្លាំងនៅដើមអាកាស្យាដែលជនរងគ្រោះកំពុងជ្រកនោះ បន្ទាប់ពីស្ងាត់សំឡេងរន្ទះបាញ់ ស្រាប់តែឃើញជនរងគ្រោះដេកស្តូកស្តឹងនៅនឹងដីបាត់ទៅហើយ។
លោក គុណ គា អះអាងថា ក្រោយពិនិត្យសាកសពរួចមកសមត្ថកិច្ចលោកបានប្រគល់ឱ្យសាច់ញាតិចាត់ចែងធ្វើបុណ្យតាមប្រពៃណីខ្មែរអ៊ិស្លាម៕
