ភ្នំពេញៈ ក្រសួងអប់រំយុវជន និងកីឡា នឹងរៀបចំបញ្ជូនសំណើស្នើសុំបើកសាលារៀនឡើងវិញទាំងស្រុង និងសេចក្តីព្រាង នៃសេចក្ដីណែនាំ ស្តីពីការបង្រៀន និងរៀនតាមបែបចម្រុះ សម្រាប់គ្រឹះស្ថានសិក្សាឯកជន ឆ្នាំសិក្សា ២០២០-២០២១ ទៅលោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជាប្រធានគណៈប្រចាំការ នៃគណ:កម្មការជាតិប្រយុទ្ធនឹងជំងឺកូវីដ ១៩ ដើម្បីធ្វើការពិនិត្យនិងសម្រេច។
ការរៀបចំបញ្ជូនសំណើរនេះធ្វើឡើង ក្រោយពីក្រសួងអប់រំ បានបញ្ចប់កិច្ចប្រជុំជាមួយថ្នាក់ដឹកនាំគ្រឹះស្ថានសិក្សាឯកជន នៅថ្ងៃទី ២៣ ខែមិថុនានេះ លើសំណើសុំបើកសាលារៀនឡើងវិញ។
លោក រស់ សុវាចា អ្នកនាំពាក្យក្រសួងអប់រំ បានថ្លែងប្រាប់ ភ្នំពេញ ប៉ុស្ដិ៍ថា នៅថ្ងៃទី ២៣ ខែមិថុនា ក្រសួងអប់រំ បានជួបផ្នែកឯកជន តាមប្រព័ន្ធអនឡាញ។ ជំនួបនេះ ប្រព្រឹត្តិទៅ បន្ទាប់ពីផ្នែកឯកជន បានដាក់លិខិតចុះថ្ងៃ១៦មិថុនា២០២១ ស្នើសុំជួបក្រសួងអប់រំ ដើម្បីពិភាក្សា ករណីស្នើសុំបើកសាលាឡើងវិញ រួមទាំងករណីពាក់ព័ន្ធ។
លោកបានថ្លែងថា៖ «ក្រសួងអប់រំ រក្សាជំហរបន្តផ្អាកគ្រឹះស្ថានសិក្សាសាធារណៈ និងឯកជន នៅទូទាំងប្រទេសរហូតដល់មានការជូនដំណឹងជាថ្មី»។
លោក សុវាចា បញ្ជាក់ថា៖ «ទន្ទឹមនឹងនេះ ក្រសួងអប់រំ នឹងរៀបចំបញ្ជូនសំណើទាំងស្រុង របស់ផ្នែកឯកជន និងសេចក្តីព្រាងនៃសេចក្តីណែនាំ ស្តីពីការបង្រៀន និងរៀនតាមបែបចម្រុះ សម្រាប់គ្រឹះស្ថានសិក្សាឯកជន គោរពជូនឯកឧត្តម អគ្គបណ្ឌិតសភាចារ្យ អូនព័ន្ធ មុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈប្រចាំការនៃគណ:កម្មការជាតិប្រយុទ្ធនឹងជំងឺកូវីដ១៩ដើម្បីពិនិត្យនិងសម្រេច»។
លោកបានបន្តថា ចំពោះមុខនេះ គ្រឹះស្ថានសិក្សាសាធារណៈ និងឯកជន ត្រូវបន្តការបង្រៀន និងរៀនពីចម្ងាយនិងតាមអនឡាញ ស្របនឹងគន្លងជីវិតថ្មី នៃវិស័យអប់រំ។
លោក សុវាចា បញ្ជាក់ថា ក្រសួងអប់រំ ស្វាគមន៍និងថ្លែងអំណរគុណ ចំពោះកិច្ចសហការណ៍ ពីសំណាក់ក្រសួង-ស្ថាប័នពាក់ព័ន្ធ ដៃគូរអភិវឌ្ឍន៍ វិស័យឯកជន ជាពិសេសមាតាបិតាសិស្ស-និស្សិត និងអាជ្ញាធរមូលដ្ឋាន ក្នុងការចូលរួមចំណែកលើកកម្ពស់គុណភាពអប់រំ សម្រាប់អ្នកសិក្សាមុននិងក្នុងបរិបទកូវីដ ១៩។
តំណាង និងថ្នាក់ដឹកនាំគ្រឹះស្ថានអប់រំឯកជននានា សង្ឃឹមថា លោក អូន ព័ន្ធមុនីរ័ត្ន នឹងយោគយល់ពីទុក្ខលំបាករបស់គ្រឹះស្ថានសិក្សាឯកជន ដែលកំពុងប្រឈមនឹងហានិភ័យបិទទ្វារ និងការប៉ះពាល់ដល់ការអប់រំ របស់សិស្សទូទាំងប្រទេស នឹងអនុញ្ញាតឱ្យបើកសាលារៀនឡើងវិញ តាមរយៈការសិក្សាតាមបែបចម្រុះសម្រាប់គ្រឹះស្ថានសិក្សាឯកជន។
លោក ហេង វ៉ាន់ដា នាយកវិទ្យាស្ថានវ៉ាន់ដា និងជាប្រធានក្រុមប្រឹក្សាភិបាល សមាគមគ្រឹះស្ថានឧត្តមសិក្សាកម្ពុជាបានថ្លែងថា លោករដ្ឋមន្ដ្រី ក្រសួងអប់រំ បានយល់ពីទុក្ខលំបាករបស់គ្រឹះស្ថានសិក្សាឯកជន និងបានខិតខំស្វែងរកវិធីសាស្ដ្រគ្រប់បែបយ៉ាង ដើម្បីអាចធ្វើឱ្យគ្រឹះស្ថានសិក្សាឯកជន ឱ្យអាចបន្តនិរន្តរភាពទៅមុខទៀតបាន។
ប៉ុន្ដែដោយសារតែស្ថានភាព ការរីករាលដាលជំងឺកូវីដ ១៩ ក្រសួងអប់រំមិនអាចមានសិទ្ធិក្នុងការសម្រេចចិត្ដតែឯងក្នុងការអនុញ្ញាតឱ្យបើកសាលារៀនឡើងវិញបានទេ។
លោកថ្លែងថា៖ «យើងពិតជាស្រណោះណាស់ ពេលចូលទៅដល់សាលារៀន ឬសាកលវិទ្យាល័យ មានភាពស្ងាត់ជ្រងំជិត ២ ឆ្នាំហើយ។ ឃើញស្ថានភាពនេះ យើងស្ទើតែគ្មានកម្លាំងឈានជើងចូលក្នុងសាលារៀនទេ។ យើងមិនអាចបន្តឱ្យស្ថានភាពនៅតែបែបនេះទៀតបានទេ បើមិនដូច្នេះទេ សាលារៀន នឹងត្រូវបិទទ្វារបញ្ឈប់សកម្មភាព»។
លោកលើកឡើងថា៖ «ឥឡូវស្ងាត់ៗ ជិតដល់ថ្ងៃបើកប្រាក់ខែដល់បុគ្គលិកទៀតហើយ ក្នុង ១ ខែៗត្រូវចំណាយ ២០ ម៉ឺនដុល្លារ តើឱ្យទៅរកប្រាក់ឯណាមកទប់»។
លោក ប៉ិច បូឡែន ប្រធានក្រុមប្រឹក្សាភិបាល សហព័ន្ធសេវាអប់រំ នៅកម្ពុជាថ្លែងថា ជាគោលគំនិត ក្រសួងអប់រំ និងគ្រឹះស្ថានសិក្សាឯកជន បានឯកភាពគ្នា លើកសំណើរទៅលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុនិងជាប្រធានគណៈប្រចាំការ នៃគណ:កម្មការជាតិប្រយុទ្ធនឹងជំងឺកូវីដ ១៩ ដើម្បីពិនិត្យនិងសម្រេច។
លោកបញ្ជាក់ថា៖ «គ្រឹះស្ថានសិក្សាឯកជន បានស្នើសុំដល់ឯកឧត្ដម អូន ព័ន្ធមុនីរ័ត្ន ពិនិត្យលទ្ធភាព អាចឱ្យគ្រឹះស្ថានសិក្សាឯកជន អាចបើកដំណើការសាលារៀនឡើងវិញ តាមវិធីសាស្ដ្រសិក្សាតាមបែបចម្រុះ ក្នុងនោះមានការរៀនតាមអនឡាញខ្លះ និងពិនិត្យលទ្ធភាព ឱ្យសិស្សរៀននៅក្នុងសាលាខ្លះ»៕
វីដេអូ៖