ភ្នំពេញៈ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ គាំទ្រអង្គការ មូលនិធិបង្ការរបួសអាស៊ី (AIP) ប្រចាំប្រទេសកម្ពុជា ក្នុងការជំរុញការប្តូររថយន្តដឹកកម្មករនិយោជិត មកជារថយន្តមានសុវត្ថិភាព និងផ្តល់មួកសុវត្ថិភាពដោយឥតគិតថ្លៃដល់កម្មករ ដែលធ្វើដំណើរតាមម៉ូតូ និងស្នើអ្នកសារព័ត៌មាន ផ្សព្វផ្សាយលើកកម្ពស់សុវត្ថិភាពចរាចរណ៍ផ្លូវគោកនៅកម្ពុជា។
លោក ខៀវ កាញារីទ្ធ ថ្លែងគាំទ្របែបនេះ ខណៈក្រុមការងាររបស់អង្គការ AIP ចូលជួបសម្ដែងការគួរសម និងពិភាក្សាការងារអំពីការលើកកម្ពស់សុវត្ថិភាពចរាចរណ៍ផ្លូវគោកនៅកម្ពុជា ជាពិសេសគំនិតផ្តួចផ្តើមសំខាន់ៗបង្កើនសុវត្ថិភាពចរាចរណ៍របស់កម្មករនិយោជិតកម្ពុជាកាលពីថ្ងៃទី ២២ មិថុនា នៅក្រសួងព័ត៌មាន។
លោករដ្ឋមន្ត្រីថ្លែងថា៖ «ក្រសួងព័ត៌មានផ្តល់ការគាំទ្រដល់អង្គការ AIP ក្នុងការរៀបចំឱ្យមានជាវគ្គបណ្តុះបណ្តាលដល់អ្នកសារព័ត៌មាន ដើម្បីបង្កើនការយល់ដឹងក្នុងចំណោមអ្នកសារព័ត៌មានសម្រាប់ធ្វើការរាយការណ៍ព័ត៌មានឱ្យបានកាន់តែល្អប្រសើរ និងជំរុញលើកកម្ពស់សុវត្ថិភាពចរាចរណ៍ដល់កម្មករនិយោជិតនៅកម្ពុជា»។
លោក ខៀវ កាញារីទ្ធ ថ្លែងថា ការបណ្ដុះបណ្ដាលដល់អ្នកសារព័ត៌មានទាក់ទងនឹងការផ្សព្វផ្សាយលើកកម្ពស់សុវត្ថិភាពចរាចរណ៍ក៏ត្រូវដាក់បញ្ចូលការប្រកួតប្រជែង ជ្រើសរើសអត្ថបទអត្ថាធិប្បាយផ្សព្វផ្សាយ និងសកម្មភាពការងារនានាក្នុងចំណោមអ្នកសារព័ត៌មាន ដើម្បីជាការលើកទឹកចិត្ដ និងជំរុញការផ្សព្វផ្សាយនេះផងដែរ។
បើតាមលោករដ្ឋមន្ត្រី តាមរយៈកិច្ចការងាររបស់អង្គការ AIP គឺក្រសួងព័ត៌មាននឹងធ្វើកិច្ចសហការក្នុងការផ្សព្វផ្សាយឱ្យបានទូលំទូលាយ។ ក្រសួងលើកទឹកចិត្ដឱ្យមានជាកម្មវិធីវេទិកាតុមូលផ្សាយនៅទូរទស្សន៍ជាតិកម្ពុជា ដើម្បីរួមគ្នាបង្កើនការយល់ដឹងពីបញ្ហាចរាចរណ៍ ដើម្បីចូលរួមធ្វើឱ្យប្រសើរឡើងនូវសុវត្ថិភាពរបស់កម្មករនិយោជិតទាំងអស់នៅកម្ពុជា។
លោករដ្ឋមន្ត្រីណែនាំឱ្យមានការបង្កើតនូវគម្រោងសាកល្បងធ្វើជារថយន្តដឹកកម្មករគំរូតាមរយៈកិច្ចសហការជាមួយស្ថាប័នពាក់ព័ន្ធនានា ដែលធ្វើឡើងនៅតំបន់ ឬខេត្តណាមួយ ដែលប្រឈមនឹងគ្រោះថ្នាក់ចរាចរណ៍មកលើកម្មករនៅតាមផ្លូវចូល និងចេញពីរោងចក្រ។ រថយន្តគំរូនោះធ្វើយ៉ាងណាឱ្យកម្មករបានយល់ពីភាពចាំបាច់ក្នុងការជិះរថយន្តដែលមានសុវត្ថិភាព។
លោក ខៀវ កាញារីទ្ធ ក៏បានជំរុញអង្គការ AIP ធ្វើយ៉ាងណាពិនិត្យលទ្ធភាពក្នុងការផ្សព្វផ្សាយអំពីសុវត្ថិភាពចរាចរណ៍បញ្ជ្រាបឱ្យដល់កុមារ។ លោកថ្លែងថា បើសិនជាមានការបណ្តុះបណ្តាលតាំងពីកុមារភាព គឺក្មេងៗអាចចងចាំបានល្អ និងទទួលយកបាន។ នៅពេលកុមារធំពេញវ័យគ្រប់អាយុបើកបរនឹងបើកបរដោយឥរិយាបថល្អប្រសើរ និងមានសុជីវធម៌។
លោកបញ្ជាក់ថា៖ «ត្រូវធ្វើការជំរុញដល់ការងារផ្សព្វផ្សាយតាមរបៀបមានភាពទាក់ទាញដូចជាតាមរយៈគំនូរជីវចលជាប្រភេទតុក្កតាដែលជាវិធីមួយអាចជួយឱ្យមានការយល់ដឹងនៅក្នុងស្រទាប់កុមារ។ ពិសេសបង្កើតឱ្យមានកម្មវិធីប្រកួតប្រជែងរវាងកុមារ និងក្រុមគោលដៅដែលមាន ដើម្បីឱ្យកុមារបានបញ្ចេញជាគំនិត យោបល់ផ្សេងៗដែលខ្លួនមាន»។
លោក គឹម បញ្ញា នាយកអង្គការ AIP ប្រចាំប្រទេសកម្ពុជាថ្លែងអំណរគុណដល់លោករដ្ឋមន្ត្រី និងក្រសួងព័ត៌មានដែលបានគាំទ្រកិច្ចខិតខំ ដើម្បីលើកកម្ពស់សុវត្ថិភាពចរាចរណ៍នៅកម្ពុជា និងសកម្មភាព ការងាររបស់អង្គការមូលនិធិបង្ការរបួសអាស៊ីនាពេលកន្លងមក។
លោកថា៖ «ខ្ញុំបានគោរពស្នើសុំនូវការគាំទ្រ និងអនុសាសន៍ពីឯកឧត្តមរដ្ឋមន្ត្រីអំពីសកម្មភាព ដែលនឹងជួយឱ្យកិច្ចខិតខំដើម្បីជំរុញការប្តូររថយន្តដឹកកម្មករនិយោជិតមកជារថយន្តដែលមានសុវត្ថិភាពប្រសើរជាង និងការផ្តល់មួកសុវត្ថិភាពដោយឥតគិតថ្លៃដល់កម្មករនិយោជិតដែលធ្វើដំណើរ តាមម៉ូតូអាចឈានទៅសម្រេចបាន ជាពិសេសមានការចូលរួមយ៉ាងសកម្មពីអ្នកសារព័ត៌មាន»៕