.jpg)
គ្រោះថ្នាក់ចរាចរណ៍មួយក្នុងសង្កាត់ទួលស្វាយព្រៃ។ ហេង ជីវ័ន
ភ្នំពេញៈ គណៈកម្មាធិការជាតិសុវត្ថិភាពចរាចរណ៍ផ្លូវគោក និង UNDP បានធ្វើការប៉ាន់ប្រមាណឡើងវិញពីការខាតបង់ ដោយសារគ្រោះថ្នាក់ចរាចរណ៍ផ្លូវគោកនៅកម្ពុជាជាលើកទី១ ក្នុងរយៈពេល ១០ ឆ្នាំនេះ ហើយបានរកឃើញថាមានការខាតបង់ថវិកាចំនួន ៤៦៦,៨ លានដុល្លារ សម្រាប់ឆ្នាំ ២០១៩ ស្មើនឹង ១,៧ ភាគរយនៃផលិតផលសរុបប្រចាំឆ្នាំ (ផលិតផលជាតិសរុបប្រចាំឆ្នាំ ២០១៩ មានជាង ២៧,៥០ ពាន់លានដុល្លារសហរដ្ឋអាមេរិក)។
យោងតាមសេចក្តីប្រកាសព័ត៌មានរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក និង UNDP នៅថ្ងៃទី ២៣ ខែមិថុនា។ ក្នុងចំណោមការខាតបង់សរុប ៨៨,៨% ជាការខាតបង់ ដោយសារការបាត់បង់ជីវិត និងការបាត់បង់ប្រាក់ចំណូល ដែលជនរងគ្រោះអាចរកបានពេញ ១ ជីវិត។
គណៈកម្មាធិការជាតិសុវត្ថិភាពចរាចរណ៍ផ្លូវគោក និង UNDP បានរួមគ្នាប្រកាសផ្សព្វផ្សាយនូវរបាយការណ៍ថ្មីមួយស្ដីពីគ្រោះថ្នាក់ចរាចរណ៍ផ្លូវគោកនៅកម្ពុជា និងការខាតបង់សេដ្ឋកិច្ចដែលបង្កឡើងដោយសារគ្រោះថ្នាក់ទាំងនេះ ដោយប្រើប្រាស់ទិន្នន័យឆ្នាំ ២០១៩ ដែលបានពីប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ (RCVIS)។
យោងតាមសេចក្តីប្រកាសព័ត៌មានដដែលនេះបានឱ្យដឹងថា ចំនួនករណីបាត់បង់ជីវិតដែលបង្កឡើងដោយសារគ្រោះថ្នាក់ចរាចរណ៍ មានការកើនឡើងជិត ២៥% ក្នុងរយៈពេលពីឆ្នាំ ២០០៩ ដល់ ២០១៩ ពោលគឺខ្ពស់ជាងអត្រាកំណើនប្រជាជន ដែលស្មើនឹង ១៧% សម្រាប់រយៈពេលដូចគ្នា។
ប្រភពដដែលនេះបានបញ្ជាក់ថា៖ «អ្នកបាត់បង់ជីវិត ៣ ភាគ ៤ គឺជាអ្នកបើកទោចក្រយានយន្ត បន្ទាប់មកថ្មើរជើង អ្នកប្រើប្រាស់រថយន្តគ្រួសារ និងអ្នកប្រើប្រាស់យានយន្តដឹកទំនិញ។ ក្នុងចំណោមយានយន្តពាក់ព័ន្ធនឹងគ្រោះថ្នាក់ចរាចរណ៍ទាំងអស់ដែលបានចុះបញ្ជីមានជាង ៨០% គឺជាទោចក្រយានយន្ត។ ករណីបាត់បង់ជីវិត ភាគច្រើនកើតឡើងនៅតាមផ្លូវជាតិ និងនៅក្នុងរាជធានី»។
នៅពេលដែលគេធ្វើការវាយតម្លៃលើករណីបាត់បង់ជីវិតដោយសារគ្រោះថ្នាក់ចរាចរណ៍ ឥរិយាបថរបស់អ្នកប្រើប្រាស់ផ្លូវ គឺជាកត្តាចម្បងក្នុងនោះកត្តាចំនួន ៤ ដែលបង្កឱ្យមានគ្រោះថ្នាក់ចរាចរណ៍នាំឱ្យមានការបាត់បង់ជីវិត ដូចជា៖ ការប្រើប្រាស់គ្រឿងស្រវឹង និងគ្រឿងញៀន ការបើកបរល្បឿនលឿន ការមិនគោរពច្បាប់ចរាចរណ៍ និងការប្រើប្រាស់ទូរស័ព្ទពេលកំពុងបើកបរ។ កំហុសរបស់មនុស្សរួមចំណែកនាំឱ្យមានគ្រោះថ្នាក់ប្រមាណ ៩៨% ហើយគ្រោះថ្នាក់ ១៦% នាំឱ្យមានការបាត់បង់ជីវិត។
ករណីបាត់បង់ជីវិតជាង ៨០% កើតឡើងភ្លាមៗនៅនឹងកន្លែងកើតហេតុតែម្ដង។ ជនរងគ្រោះត្រឹមតែ ៣៥% តែប៉ុណ្ណោះ ដែលបានទទួលសេវាសង្គ្រោះបឋម ដែលថយចុះ ២៤% ធៀបនឹងឆ្នាំ ២០១៨។ លើសពីនេះ មានជនរងគ្រោះត្រឹមតែ ១០% តែប៉ុណ្ណោះ ដែលបានទៅដល់មន្ទីរពេទ្យក្រោម ៣០ នាទី ខណៈពេលដែលជនរងគ្រោះភាគច្រើនត្រូវបានបញ្ជូនទៅមន្ទីរពេទ្យយ៉ាងហោចណាស់ ១ ម៉ោង ក្រោយពេលរងគ្រោះថ្នាក់។
លោក Nick Beresford នាយក UNDP ប្រចាំកម្ពុជាបានឱ្យដឹងថា នេះជាលើកទី ១ ដែលការវិភាគស៊ីជម្រៅបែបនេះត្រូវបានធ្វើឡើង ដោយការប្រើប្រាស់ប្រព័ន្ធទិន្នន័យគ្រោះថ្នាក់ចរាចរណ៍ផ្លូវគោកដែលមានទំហំធំបែបនេះ។
លោកថ្លែងថា៖ «ការវិភាគនេះបានផ្តល់ឱ្យយើងនូវការយល់ដឹងស៊ីជម្រៅ ពាក់ព័ន្ធនឹងករណីបាត់បង់ជីវិតនៅតាមដងផ្លូវ។ វាមិនមែនពាក់ព័ន្ធនឹងថាតើជនរងគ្រោះជាជនវ័យក្មេង ឬជាបុរសនោះឡើយ ប៉ុន្តែវាពាក់ព័ន្ធនឹងការប្រើប្រាស់គ្រឿងស្រវឹង គ្រឿងញៀន ការមិនគោរពច្បាប់ចរាចរណ៍ និងការប្រើប្រាស់ទូរស័ព្ទពេលបើកបរ»។ «ជារួម ករណីបាត់បង់ជីវិតតាមដងផ្លូវនេះ ពាក់ព័ន្ធនឹងឥរិយាបថរបស់អ្នកបើកបរដែលជាកត្តាកំណត់ពីការបាត់បង់ជីវិត នៅក្នុងគ្រោះថ្នាក់ចរាចរណ៍»។
លោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន បានឱ្យដឹងដែរថា ជាមួយលទ្ធផលនៃការសិក្សាអំពីការខាតបង់សេដ្ឋកិច្ច គឺជាធាតុចូលយ៉ាងសំខាន់សម្រាប់ការដាក់ចេញនូវវិធានការស័ក្តិសិទ្ធិ និងតម្រង់ទិសគោលនយោបាយរបស់រដ្ឋ និងរបស់អង្គការជាតិ អន្តរជាតិ វិស័យឯកជន ដែលមានសមានចិត្តក្នុងការជួយលើកកម្ពស់សុវត្ថិភាពចរាចរណ៍នៅកម្ពុជា។
លោកស្រីថា៖ «របាយការណ៍នេះ កាន់តែមានមូលដ្ឋានរឹងមាំបន្ថែម ដើម្បីសហការរួមចំណែកទប់ស្កាត់ កាត់បន្ថយគ្រោះថ្នាក់ចរាចរណ៍ចំនួនអ្នកស្លាប់ និងអ្នករបួស ឆ្លើយតបសមស្របទៅនឹងមូលហេតុ ទីតាំង ពេលវេលា និងការខាតបង់សេដ្ឋកិច្ចដោយគ្រោះថ្នាក់ចរាចរណ៍»៕
