.jpg)
គ្រូពេទ្យកំពុងចាក់វ៉ាក់សាំងបង្ការជំងឺកូវីដនៅសង្កាត់ទន្លេបាសាក់ពីថ្ងៃ ១៦ ខែមិថុនា។ ហេង ជីវ័ន
ភ្នំពេញៈ ប្រមាណជា ១ សប្តាហ៍ទៀត ប្រទេសកម្ពុជា អាចនឹងសម្រេចការចាក់វ៉ាក់សាំងបង្ការជំងឺកូវីដ ១៩ បានរហូតដល់ ៤ លាននាក់ ហើយដំណើរការនៃការចាក់វ៉ាក់សាំងនេះ ក៏អាចនឹងលឿនជាងផែនការមេ ដែលបានគ្រោងទុកប្រសិនបើចំនួនវ៉ាក់សាំងមកដល់តាមផែនការ។
នេះបើតាមលោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក.១៩) កាលពីថ្ងៃទី ២២ ខែមិថុនា ក្នុងពេលចុះផ្តល់បរិក្ខារពេទ្យទៅដល់ខេត្តចុងក្រោយចំនួន ៦ ក្នុងនោះមានខេត្តត្បូងឃ្មុំ កំពង់ចាម ព្រៃវែង ស្វាយរៀង រតនគិរី និងមណ្ឌលគិរី។
លោកស្រីបានថ្លែងថា៖ «ប្រហែលជា ១ សប្តាហ៍ទៀត យើងនឹងមានប្រជាពលរដ្ឋចំនួន ៤ លាននាក់ទទួលបានការចាក់វ៉ាក់សាំង។ វ៉ាក់សាំងមានអត្ថប្រយោជន៍ក្នុងការជួយជីវិតមនុស្ស។ ចាក់វ៉ាក់សាំងនៅពេលនេះ ដើម្បីការពារជំងឺធ្ងន់ធ្ងរ និងអាចកាត់បន្ថយបាននូវអត្រាមរណភាព ដោយសារវីរុសកូវីដ ១៩ បាន»។
ដំណើរការចាក់វ៉ាក់សាំងបានលឿននេះ គឺជាការគិតគូរដ៏ខ្ពង់ខ្ពស់របស់លោកនាយករដ្ឋមន្ត្រី ហ៊ុន សែន តាមរយៈគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ ១៩ នេះ ដើម្បីរុញច្រានក៏ដូចជាគាំទ្រទៅដល់ដំណើរការនៃការចាក់វ៉ាក់សាំងឱ្យកាន់តែមានប្រសិទ្ធភាពខ្ពស់។
លោកស្រី ឱ វណ្ណឌីន លើកឡើងថា៖ «ប្រសិនបើការវាយលុករបស់វីរុសកូវីដ ១៩ លឿនហើយយើងចាក់វ៉ាក់សាំងមិនបានលឿន នោះវាមិនស៊ីគ្នាទេ ដូចនេះយើងត្រូវធ្វើយ៉ាងណាដើម្បីឱ្យការចាក់វ៉ាក់សាំងរបស់យើងឱ្យបានលឿនដែរ»។
ជាមួយគ្នានេះដែរលោកស្រីក៏បានឱ្យអាជ្ញាធរមូលដ្ឋាន រដ្ឋបាលថ្នាក់ក្រោមជាតិ ត្រូវត្រៀមលក្ខណៈឱ្យរួចរាល់ជាស្រេចថ្វីដ្បិតតែវ៉ាក់សាំងមិនទាន់មកដល់ ប៉ុន្តែវានឹងមកដល់នៅក្នុងពេលឆាប់ៗខាងមុខនេះ។ ដូចនេះការត្រៀមលក្ខណៈឱ្យរួចរាល់ជាស្រេច ជាពិសេសការធ្វើសម្រង់ស្ថិតិប្រជាពលរដ្ឋគឺត្រូវតែធ្វើឱ្យបានរួចរាល់ ឱ្យមានភាពជាក់លាក់ ពិសេសចំនួនប្រជាពលរដ្ឋនៅក្នុងខេត្តរបស់ខ្លួនក៏ដូចជាតាមស្រុក តាមទីប្រជុំជន ហើយនិងចំនួនកម្មករ កម្មការិនីឱ្យបានច្បាស់លាស់។
លោកស្រីមានប្រសាសន៍ថា៖ «យើងបានចែកទម្រង់ឯកសារទៅដល់បណ្តារាជធានី-ខេត្តទាំងអស់រួចហើយជូនទៅរដ្ឋបាលថ្នាក់ក្រោមជាតិ ដើម្បីកំណត់ពីចំនួនអ្នកដែលត្រូវចាក់វ៉ាក់សាំង ដើម្បីមានជាមូលដ្ឋាននៅក្នុងការផ្តល់វ៉ាក់សាំងឱ្យចំគោលដៅ»។
ប្រសិនបើវ៉ាក់សាំងបានមកដល់តាមផែនការដែលបានគ្រោងទុក «យើងរំពឹងថា ការចាក់វ៉ាក់សាំងរបស់យើងនឹងអាចបញ្ចប់បាននៅមុនដំណាច់ឆ្នាំ ២០២១ នេះ ដែលវានឹងអាចលឿនជាងអ្វីដែលយើងបានគិតនៅក្នុងផែនការមេ ដែលកាលនោះយើងអាចគិតថា វានឹងអាចចប់នៅពាក់កណ្តាលឆ្នាំ ២០២២»។
មួយវិញទៀត លោកស្រីបានលើកឡើងដែរថាបើទោះបីជាយុទ្ធនាការចាក់វ៉ាក់សាំងបានគ្រប់ផែនការនៅទូទាំងខេត្តរាជធានីអស់ក៏ដោយ ក៏គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ ១៩ នេះនឹងរក្សាទុកនូវទីតាំងណាមួយនៅគ្រប់រាជធានីខេត្ត ដើម្បីឱ្យពលរដ្ឋណាដែលមិនទាន់បានចាក់អាចមកចាក់បាន។ «យើងឈរនៅលើគោលនយោបាយ និងការគិតគូររបស់សម្តេចនាយករដ្ឋមន្ត្រី គឺមិនឱ្យប្រជាពលរដ្ឋណាម្នាក់ដែលមានអាយុចាប់ពី ១៨ ឆ្នាំឡើងមិនបានចាក់វ៉ាក់សាំងនោះទេ ហើយការចាក់នេះ យើងចាក់ទាំងប្រជាពលរដ្ឋកម្ពុជា និងជនបរទេសដែលរស់នៅដោយស្របច្បាប់ក្នុងប្រទេសកម្ពុជា»។
លោកស្រីបានធ្វើការផ្តាំផ្ញើក៏ដូចជាអំពាវនាវទៅដល់រដ្ឋបាលថ្នាក់ក្រោមជាតិ ក៏ដូចជាមន្ទីរសុខាភិបាលតាមបណ្តាខេត្តទាំងអស់ ត្រៀមលក្ខណៈរួចរាល់ជាស្រេច ហើយប្រកាន់យកនូវគោលជំហរធ្វើយ៉ាងណា ឱ្យល្បឿននៃការចាក់វ៉ាក់សាំងនេះឱ្យបានលឿន ប្រើប្រាស់ឱ្យអស់លទ្ធភាពនូវក្រុមគ្រូពេទ្យដែលខ្លួនមាននៅក្នុងរដ្ឋបាលថ្នាក់ក្រោមជាតិនេះហើយ ប្រសិនបើខ្វះខាតនូវក្រុមគ្រូពេទ្យតាមខេត្តនីមួយៗត្រូវធ្វើសំណើមក គ.វ.ក.១៩ ដើម្បីបញ្ជូនក្រុមគ្រូពេទ្យយុវជនស្ម័គ្រចិត្ត ដើម្បីរុញច្រានការចាក់វ៉ាក់សាំងនេះឱ្យបានលឿន។
អង្គការសុខភាពពិភពលោកប្រចាំកម្ពុជាបានចេញសេចក្តីប្រកាសព័ត៌មានមួយកាលពីថ្ងៃទី ១៣ ខែមិថុនា ដោយបានបញ្ជាក់ផងដែរថា ត្រូវទៅទទួលការចាក់វ៉ាក់សាំងនៅពេលដល់វេនអ្នក ដោយមិនត្រូវខកខានឱកាសដែលជួយជីវិតរបស់អ្នកនោះទេ។ អង្គការនេះបញ្ជាក់ថា៖ «វ៉ាក់សាំងការពារវីរុសកូវីដ ១៩ ជាមធ្យោបាយដ៏មានអានុភាពមួយក្នុងការការពារមិនឱ្យឈឺធ្ងន់ធ្ងរ កាត់បន្ថយការសម្រាកពេទ្យ និងជួយសង្គ្រោះជីវិត ប៉ុន្តែវ៉ាក់សាំងតែ ១ មុខ មិនអាចបញ្ចប់ការរាតត្បាតបានទេ ហើយយើងត្រូវតែបន្តអនុវត្តវិធានសុខភាពសាធារណៈ និងសង្គមដទៃទៀតប្រកបដោយប្រសិទ្ធភាព»។
យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី ២២ ខែមិថុនា កម្ពុជាបានចាក់វ៉ាក់សាំងបង្ការជំងឺកូវីដ ១៩ នៅទូទាំងប្រទេសបានចំនួនជាង ៣,៥ លាននាក់ហើយ ឬស្មើនឹង ៣៥,១៨% នៃចំនួនធៀបនឹងប្រជាពលរដ្ឋ ១០ លាននាក់៕
