ភ្នំពេញៈ ក្រោយពីមានករណីពុលស្រាស និងស្រាថ្នាំ ក្នុងរយៈពេល ២ ខែចុងក្រោយនេះ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (អ.ក.ប.ប) បានបើកយុទ្ធនាការផ្សព្វផ្សាយអប់រំ និងស្រាវជ្រាវ ប្រមូលយកគំរូស្រាស និងស្រាថ្នាំនៅទូទាំងប្រទេសមកធ្វើពិសោធន៍ ដើម្បីទប់ស្កាត់ការពុលស្រា។
លោក ផាន អូន អគ្គនាយក នៃ អ.ក.ប.ប ប្រាប់ ភ្នំពេញ ប៉ុស្តិ៍ថា យុទ្ធនាការក្នុងក្របខ័ណ្ឌទូទាំងប្រទេសនេះបានធ្វើឡើង ក្រោយពីមានផ្ទុះករណីឈឺ និងស្លាប់មនុស្សជាង ៣០ នាក់ជាបន្តបន្ទាប់ ដោយសារការទទួលទានស្រាមានសារធាតុមេតាណុល កម្រិតខ្ពស់ក្នុងរយៈពេល ២ ខែមកនេះ។
លោកថា៖ «ជាទូទៅផលិតផល ស្រាស ដែលបិត ឬផលិតតាមលក្ខណៈបច្ចេកទេស ទោះតាមបែបបុរាណ តាមលក្ខណៈគ្រួសារក៏ដោយ ក៏មិនបង្កផលប៉ះពាល់ធ្ងន់ធ្ងរដល់សុខភាពអ្នកទទួលទានដែរ ប្រសិនបើគ្មានការលាយសារធាតុ Methanol នោះទេ»។
បើតាមទិន្នន័យរបស់ក្រសួងសុខាភិបាល និងអាជ្ញាធរមូលដ្ឋានចាប់ពីថ្ងៃទី ៨ ខែឧសភា ដល់ថ្ងៃទី ១៩ ខែមិថុនា ឆ្នាំ ២០២១ មានពលរដ្ឋចំនួន ៣៥ នាក់បានស្លាប់ និងជាង ១០០ នាក់ទៀតបានធ្លាក់ខ្លួនឈឺ ដោយសារពុលស្រាស និងស្រាថ្នាំ នៅក្នុងខេត្តចំនួន ៤ រួមមាន ខេត្តកណ្ដាល កំពត ពោធិ៍សាត់ និងខេត្តព្រៃវែង។
អ្នកផលិត និងអ្នកលក់ចែកចាយបន្តនូវផលិតផលស្រាស និងស្រាថ្នាំ ដែលមានកម្រិតសារធាតុមេតាណុលខ្ពស់ពី ៦ ភាគរយដល់ ១៧ ភាគរយសរុបចំនួន ១៦ នាក់ ត្រូវបានកម្លាំងសមត្ថកិច្ចឃាត់ខ្លួន បញ្ជូនទៅតុលាការ ហើយតុលាការបានសម្រេចឃុំខ្លួនជាបណ្ដោះអាសន្នដោយចោទប្រកាន់ពីបទ «ប្រព្រឹត្តអំពើមិនសុចរិតទាក់ទងនឹងទំនិញ សេវា ឬការអះអាងដោយបំភាន់ មានស្ថានទម្ងន់ទោសតាមបញ្ញត្តិមាត្រា ៤៣ នៃច្បាប់ស្ដីពីកិច្ចការពារអ្នកប្រើប្រាស់» ដែលនឹងប្រឈមការផ្ដន្ទាទោសជាប់ពន្ធនាគារពី ២ ឆ្នាំទៅ ៥ ឆ្នាំ និង ពិន័យជាប្រាក់ពី ៤ លានរៀលដល់ ១០ លានរៀល។
បើតាមលោក ផាន អូន ការចុះយុទ្ធនាការផ្សព្វផ្សាយអប់រំការយល់ដឹងអំពីគ្រោះថ្នាក់នៃការទទួលទានស្រាស និងស្រាថ្នាំ ដែលមានសារធាតុមេតាណុលកម្រិតខ្ពស់នៅទូទាំងប្រទេសក្នុងរយៈពេលប្រមាណ ៣ សប្ដាហ៍កន្លងមកនេះ ក្រុមការងារបានពិនិត្យឃើញថា ស្ទើរតែគ្រប់ទីតាំងផលិតស្រាស និងស្រាថ្នាំទាំងអស់ គឺគ្មានច្បាប់អនុញ្ញាតនោះទេហើយការផលិតក៏មិនបានត្រឹមត្រូវតាមស្ដង់ដាបច្ចេកទេសដែរ គឺធ្វើឡើងតាមរបៀបចេះចាំតគ្នាពីឪពុកម្ដាយ និងជីដូនជីតាមកប៉ុណ្ណោះ។
លើសពីនេះ នៅតាមទីតាំងផលិត និងលក់ដូរស្រាស និងស្រាថ្នាំមួយចំនួនមិនមានការសម្អាតបរិស្ថាន អនាម័យនោះទេ។ «មកទល់ពេលនេះ ខាងមន្ទីរពិសោធន៍ អ.ក.ប.ប ទទួលបានគំរូសំណាកស្រាស និងស្រាថ្នាំសរុបចំនួន ៤៣ គំរូ ពីខេត្តចំនួន ៦ រួមមានខេត្តក្រចេះ ស្វាយរៀង កំពត ប៉ៃលិន សៀមរាប និងបាត់ដំបង»៕
វីដេអូ៖