ភ្នំពេញៈ មជ្ឈមណ្ឌលសកម្មភាពកំចាត់មីនកម្ពុជា (CMAC) គ្រោងនឹងចាប់ផ្តើមបង្វឹកសុនខចំនួន ១០ ក្បាល ឱ្យចេះហិតក្លិនរកមេរោគកូវីដនៅអំឡុងដើមខែកក្កដា ឆ្នាំ ២០២១ ខាងមុខនេះ ខណៈជំងឺនេះនៅតែកំពុងបន្តឆ្លងរាលដាលខ្លាំងនៅឡើយ។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) ប្រាប់ភ្នំពេញប៉ុស្តិ៍នៅថ្ងៃទី ២៣ ខែ មិថុនា ឆ្នាំ ២០២១ ថា នៅក្នុងអំឡុងពេលនៃការហ្វឹកហ្វឺនសុនខឱ្យមានសមត្ថភាពនេះ បើសិនជាទទួលបានលទ្ធផលល្អ CMAC នឹងដាក់ឱ្យប្រើប្រាស់នៅក្នុងរយៈពេល ៣ ឬ ៤ សប្តាហ៍ បន្ទាប់ពីបង្ហាត់ពួកវារួចរាល់។
លោក ហេង រតនា បញ្ជាក់ថា ក្នុងរយៈពេល ២ ថ្ងៃ គឺនៅថ្ងៃទី ២២ និងនៅថ្ងៃទី ២៣ ខែមិថុនានេះ អ្នកជំនាញរបស់ក្រសួងសុខាភិបាល បានចាប់ផ្តើមប្រមូលក្លិនមេរោគកូវីដយកមកពិនិត្យសុវត្ថិភាពមុននឹងយកទៅបំពាក់សម្រាប់ធ្វើការហ្វឹកហ្វឺននៅឯវិទ្យាស្ថានបច្ចេកទេសសកម្មភាពកំចាត់មីនស៊ីម៉ាក់ខេត្តកំពង់ឆ្នាំង។
រហូតមកដល់ពេលនេះ អង្គភាពស៊ីម៉ាក់បានត្រៀមទាំងសុនខ និងសម្ភារផ្សេងៗ រួចរាល់អស់ហើយ ដោយនៅរង់ចាំតែការត្រួតពិនិត្យសម្ភារ ចាប់ក្លិន (Cell Culture) ដើម្បីឱ្យដឹងថា វាធានាសុវត្ថិភាព ហើយពេលនោះ ស៊ីម៉ាក់នឹងយកទៅបំពាក់ឱ្យសុនខហិត។
បើតាមលោក ហេង រតនា ក្នុងពេលបង្វឹកសុនខនេះគឺប្រើប្រាស់ឧបករណ៍ចាប់ក្លិនមេរោគកូវីដ ១៩ ពីអ្នកជំងឺ ដោយមិនមែនយកមនុស្សដែលផ្ទុកជំងឺកូវីដ ១៩ យកមកឱ្យសុនខហិតក្លិននោះទេ។ ប៉ុន្តែនៅពេលដែលប្រើប្រាស់ឧបករណ៍ចាប់ក្លិននេះត្រូវធានាថា មិនឆ្លងមេរោគមកជាមួយ។
លោក ហេង រតនា ថ្លែងថា៖ «យើងសង្ឃឹមថា នៅពេលដែលយើងពិនិត្យរួចហើយ និងមិនមានការឆ្លងអី យើងនឹងយកវាទៅប្រើប្រាស់បានហើយ»។
អង្គភាពស៊ីម៉ាក់ នាពេលបច្ចុប្បន្ននេះមានឧបករណ៍ចាប់ក្លិនជាង ៥០០ ដែលអ្នកវិទ្យាសាស្ត្របានផលិតឡើង ដោយមិនអាចស្រូបក្លិនអ្វីផ្សេងក្រៅពីក្លិនវីរុសកូវីដ ដែលត្រូវបានដាក់នោះទេ។ ឧបករណ៍នេះនឹងត្រូវផ្តល់ជូនតាមតម្រូវការរបស់អ្នកជំនាញខាងក្រសួងសុខាភិបាល (បើត្រូវការ ៦០ ឱ្យ ៦០) ព្រោះឧបករណ៍នេះត្រូវទាមទារឱ្យមានបច្ចេកទេសខ្ពស់ក្នុងការរក្សាទុក។
ភ្នំពេញប៉ុស្តិ៍មិនអាចទាក់ទងលោក ម៉ម ប៊ុនហេង រដ្ឋមន្ត្រី និង លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានទេនៅថ្ងៃទី ២៣ ខែ មិថុនា ឆ្នាំ ២០២១។
លោក កែរ រដ្ឋា ប្រធានមន្ទីរសុខាភិបាលខេត្តស្វាយរៀងយល់ឃើញថាការរៀបចំបង្វឹកសុនខឱ្យមានសមត្ថភាពក្នុងការហិតក្លិនអ្នកផ្ទុកជំងឺកូវីដ ១៩ គឺជាការល្អមួយក្នុងការទប់ស្កាត់ការរីករាលដាលនៃជំងឺកូវីដ ១៩។ ប៉ុន្តែទោះយ៉ាងណា ក៏ត្រូវយកសំណាករបស់អ្នកសង្ស័យមានជំងឺយកមកធ្វើតេស្តដែរ។
លោក កែរ រដ្ឋា បញ្ជាក់ទៀតថា ការយកសុនខមកហិតក្លិនរកអ្នកផ្ទុកជំងឺកូវីដ ១៩ នេះវានឹងជួយបានច្រើនតាមរយៈការមិនយកមនុស្សទាំងអស់ធ្វើតេស្ត ដោយយកតែមនុស្សណាដែលមានវិជ្ជមាន ដែលត្រូវបានហិតដោយសុនខនោះ យកមកធ្វើតេស្តតែប៉ុណ្ណោះ។
លោក កែរ រដ្ឋា ថ្លែងថា៖ «តាមខ្ញុំគិត ការយកសុនខមកហិតក្លិនរកអ្នកផ្ទុកជំងឺកូវីដ ១៩ នេះដូចយកសុនខទៅហិតមីន បើវាហិតប៉ះចំកន្លែងមីន គឺមានអ្នកជំនាញចូលទៅដោះ។ ដូច្នេះ បើសុនខហិតប៉ះចំអ្នកកើតជំងឺកូវីដ គឺគេចាប់អ្នកនោះមកធ្វើសំណាក»៕