ភ្នំពេញៈ អាជ្ញាធរជាតិប្រយុទ្ធប្រឆាំងគ្រឿងញៀនកំពុងស្នើសុំការសម្រេចពីរាជរដ្ឋាភិបាល ដើម្បីបំផ្លាញចោលគ្រឿងញៀនជាច្រើនតោននៅក្នុងទិវាប្រឆាំងគ្រឿងញៀនអន្តរជាតិពិភពលោកនៅថ្ងៃទី ២៦ ខែមិថុនា ខាងមុខនេះ។
លោក ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរងនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនថ្លែងថា ការបំផ្លាញចោលគ្រឿងញៀនដែលចាប់បាន តែងតែធ្វើឡើងជារៀងរាល់ឆ្នាំ។ នៅតាមបណ្តាខេត្តរាជធានី អាជ្ញាធរជាតិប្រយុទ្ធប្រឆាំងគ្រឿងញៀនមានក្រុមការងារមួយដឹកនាំដោយព្រះរាជអាជ្ញាក្នុងការត្រួតពិនិត្យគ្រឿងញៀនដែលចាប់យកបាន ដើម្បីបំផ្លាញចោល ព្រោះការរក្សាទុកមានភាពស្មុគស្មាញ។
លោកថ្លែងថា៖ «ពាក់ព័ន្ធករណីគ្រឿងញៀនដែលយើងដកហូតបានមកហ្នឹងមានសាលក្រមស្ថាពរសម្រេចបំផ្លាញចោលហ្នឹង ១ ទី ២ ទៀតមានសេចក្តីសម្រេចសម្រេចយ៉ាងម៉េចគឺថាពេលដែលចាប់បានវត្ថុតាងគ្រឿងញៀនហ្នឹងយើងរៀបចំក្រុមការងារមួយដកសំណាកទុកសម្រាប់ទី ១ ទុកជាភ័ស្តុតាងក្នុងពេលសវនាការ និងទី ២ ទុកសម្រាប់យើងធ្វើកោសល្យវិច័យ»។
លោក ម៉ក់ ជីតូ បានបញ្ជាក់ថា ការបំផ្លាញចោលគ្រឿងញៀនលើកនេះ ខុសពីសព្វមួយដងដែលបំផ្លាញតែតាមបណ្តាខេត្តផ្សេង។ ប៉ុន្តែនៅលើកនេះនឹងបំផ្លាញដោយធ្វើមិទ្ទីងតាមសាលាឧទ្ធរណ៍ទាំង ៤ ដែលមាននៅខេត្តព្រះសីហនុ រាជធានី-ភ្នំពេញ ខេត្តត្បូងឃ្មុំ និងខេត្តបាត់ដំបង។
លោកថ្លែងថា៖ «ជាគោលការណ៍យើងបំផ្លាញលើកនេះមានប៉ុន្មានតោនឯណោះ ច្រើនណាស់ មិនទាន់ច្បាស់ទេព្រោះឥឡូវនៅតាមសាលាឧទ្ធរណ៍នីមួយៗកំពុងប្រមូល។ មានតួលេខហើយ ប៉ុន្តែចំពោះសារធាតុញៀននេះ វាមាន ២ ប្រភេទទៀត អា ១ បំផ្លាញចោលដោយដុតបាន អា ១ ទៀតជាសារធាតុគីមីផ្សំយើងមិនអាចដុតបានទេយើងត្រូវបន្សាបវា ព្រោះថា បើដុតទៅវាអាចសាយភាយប៉ះពាល់ដល់បរិស្ថាន ប៉ះពាល់សុខភាព»។
បើតាមលោក ម៉ក់ ជីតូ អាជ្ញាធរជាតិប្រយុទ្ធប្រឆាំងគ្រឿងញៀនកំពុងរង់ចាំមើលការសម្រេចរបស់ថ្នាក់ដឹកនាំក្នុងការសម្រេចថានៅថ្ងៃទី ២៦ ខែ
មិថុនាខាងមុខនេះអាចធ្វើទៅបានឬយ៉ាងណា។
លោកថ្លែងថា៖ «បើធ្វើទាន់យើងធ្វើ បើមិនទាន់យើងអាចបន្ថយបន្តិចក៏បានដែរ ធ្វើម៉េចអបអរសាទរទិវាប្រឆាំងគ្រឿងញៀនអន្តរជាតិលើពិភពលោកនេះត្រូវដុតបំផ្លាញគ្រឿងញៀនទាំងនោះ ហើយកាលនោះហ្នឹង តាមពិតយើងដុតរាល់តែឆ្នាំ ពេលខ្លះច្រើនពេកទៅ ដុតមុនពេលទិវានោះទៀតផងមិនចាំតែដល់ទិវាថ្ងៃទី ២៦ មិថុនាទេ គឺត្រូវតែដុតចោល ព្រោះទុកមិនបានទេអាហ្នឹង»។
ទោះចំនួនគ្រឿងញៀនដែលត្រូវដុតបំផ្លាញចោលលើកនេះនៅមិនទាន់ដឹងថាមានប៉ុន្មានតោនឱ្យប្រាកដក៏ដោយ ប៉ុន្តែលោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនធ្លាប់បានប្រាប់ ភ្នំពេញ ប៉ុស្តិ៍ កាលពីថ្ងៃទី ១៦ ខែមិថុនាថា ចាប់ពីដើមខែមករា ឆ្នាំ ២០២០ មកក្នុងរយៈពេលជិត ១៨ ខែ សមត្ថកិច្ចប្រយុទ្ធប្រឆាំងគ្រឿងញៀននៅទូទាំងប្រទេសបានបង្ក្រាបចាប់រឹបអូសគ្រឿងញៀន និងសារធាតុផ្សំគ្រឿងញៀនសរុបបានជាង ៤ ៥០០ គីឡូក្រាម ព្រមទាំងចាប់ខ្លួនក្រុមឧក្រិដ្ឋជនគ្រឿងញៀនជាជនបរទេសជាច្រើននាក់បញ្ជូនទៅតុលាការចាត់វិធានការតាមផ្លូវច្បាប់។
បើតាមលោក មាស វិរិទ្ធ ការងារប្រយុទ្ធប្រឆាំងគ្រឿងញៀននៅតែមានភាពសកម្មជាប់ជានិច្ច ទោះបីប្រទេសជាតិស្ថិតក្នុងអំឡុងពេលនៃការឆ្លងរីករាលដាលជំងឺកូវីដ ១៩ ក៏ដោយ។ ឯការស្រាវជ្រាវ និងការបង្ក្រាបក្រុមឧក្រិដ្ឋជនគ្រឿងញៀនបញ្ជូនទៅតុលាការ ដើម្បីចាត់វិធានការបន្តតាមនីតិវិធីបានធ្វើជាបន្តបន្ទាប់។
លោកបានបន្តថា ក្នុងស្ថានភាពដែលពិភពលោកទាំងមូលបាននិងកំពុងប្រយុទ្ធប្រឆាំងនឹងការឆ្លងរាតត្បាតពីជំងឺសកលកូវីដ ១៩ សភាពការណ៍គ្រឿងញៀនទាំងក្នុងក្របខ័ណ្ឌអន្តរជាតិ និងក្នុងតំបន់កាន់តែមានការវិវឌ្ឍប្រែប្រួលប្រកបដោយហានិភ័យខ្ពស់៕