.jpg)
លោក ងី ច័ន្ទ្រផល ដឹកនាំមន្ត្រីជំនាញពិភាក្សាតាមហ្ស៊ូម។ រូបថត ក្រសួងមហាផ្ទៃ
ភ្នំពេញៈ គណៈកម្មការសម្របសម្រួល និងដឹកនាំការងារទីក្រុងឆ្លាត ក្រសួងមហាផ្ទៃជួបពិភាក្សាគ្នាជាលើកដំបូង ដើម្បីរួមគ្នាកំណត់ទស្សនវិស័យ និងគោលនយោបាយជាតិអំពីទីក្រុងឆ្លាត សម្រាប់រយៈពេលមធ្យម និងរយៈពេលវែងស្របពេលដែលទីក្រុងចំនួន ៣ នៅកម្ពុជាកំពុងអនុវត្តសាកល្បងជាមួយប្រទេសជាសមាជិកអាស៊ាន។
កិច្ចពិភាក្សានេះត្រូវបានធ្វើឡើងជាលើកដំបូង តាមរយៈប្រព័ន្ធវីដេអូសន្និសីទ ZOOM កាលពីរសៀលថ្ងៃទី ២២ មិថុនា បន្ទាប់ពីរដ្ឋាភិបាលបានសម្រេចបង្កើតគណៈកម្មការនេះកាលពីខែកុម្ភៈ ហើយត្រូវបានខកខានកិច្ចប្រជុំជាបន្តបន្ទាប់ ដោយសារតែវិបត្តិកូវីដ ១៩ ឆ្លងចូលសហគមន៍។
តាមទំព័រហ្វេសប៊ុករបស់ក្រសួងមហាផ្ទៃបានឱ្យដឹងថា កិច្ចប្រជុំគណៈកម្មការសម្របសម្រួល និងដឹកនាំការងារទីក្រុងឆ្លាត មានការចូលរួមពីអគ្គនាយក អគ្គនាយករងនៃអគ្គនាយកដ្ឋាន រដ្ឋបាល ក្រសួងមហាផ្ទៃ រដ្ឋលេខាធិការ អនុរដ្ឋលេខាធិការ អគ្គនាយក ថ្នាក់ដឹកនាំពីក្រសួងស្ថាប័នពាក់ព័ន្ធព្រមទាំងមន្ត្រីជំនាញជាច្រើនរូប។
លោក ងី ច័ន្ទ្រផល រដ្ឋលេខាធិការក្រសួងមហាផ្ទៃ និងជាប្រធានគណៈកម្មការ ដែលដឹកនាំកិច្ចប្រជុំបានប្រាប់ ភ្នំពេញ ប៉ុស្តិ៍ នៅថ្ងៃទី ២៣ មិថុនាថា៖ «យើងជួបគ្នាតាម ZOOM នេះ គឺដើម្បីរាយការណ៍ពីការងារសង្ខេបអំពីតួនាទីរបស់គណៈកម្មការក៏ដូចជាពាក់ព័ន្ធនឹងការត្រៀមលក្ខណៈចូលរួមទស្សនទានគ្រប់គោលនយោបាយជាក់លាក់របស់រដ្ឋាភិបាល សម្រាប់រយៈពេលមធ្យម និងរយៈពេលវែងទៅនឹងការរៀបចំទីក្រុងឆ្លាត»។
លោកបន្ថែមថា មកដល់ម៉ោងនេះ កម្ពុជាមិនទាន់មានគោលនយោបាយទីក្រុងឆ្លាតជាក់លាក់នៅឡើយទេ ដែលជាហេតុនាំឱ្យគណៈកម្មការនេះត្រូវជួបជុំគ្នា ដើម្បីរៀបចំធាតុចូលតាមវិស័យនីមួយៗ ខណៈគណៈកម្មការនេះ ក៏ត្រូវត្រៀមចូលរួមផ្តល់នូវវិធានការ ឬគោលនយោបាយខ្លះៗដល់រដ្ឋាភិបាល ដើម្បីរៀបចំកម្មវិធីនានា ដែលកម្ពុជាធ្វើជាម្ចាស់ផ្ទះកិច្ចប្រជុំអាស៊ាន ឆ្នាំ ២០២២ ខាងមុខនេះផងដែរ។
លោកបញ្ជាក់ថា៖ «យើងនឹងរៀបចំទស្សនទាន និងគោលនយោបាយជាក់លាក់ ដោយប្រើប្រាស់បច្ចេកវិទ្យាដ៏មានសារៈសំខាន់ ដើម្បីលើកកម្ពស់ទីក្រុងរបស់យើង។ កាលពីឆ្នាំ ២០១៨ ហ្នឹង ថ្នាក់ដឹកនាំកំពូលអាស៊ានទាំង ១០ ហ្នឹង បានដាក់ចេញគោលនយោបាយនេះ សាកល្បង ដើម្បីលើកកម្ពស់ជីវភាពប្រជាពលរដ្ឋនៅតាមទីក្រុង ដោយធ្វើយ៉ាងណាឱ្យពលរដ្ឋនៅតាមទីក្រុងរស់ដោយសុវត្ថិភាព និងការផ្តល់សេវារហ័ស»។
លោក ងី ច័ន្ទ្រផល បានអះអាងថា កន្លងទៅគណៈកម្មការសម្របសម្រួល និងដឹកនាំការងារទីក្រុងឆ្លាតក៏បានចូលរួមកិច្ចប្រជុំជាមួយប្រទេសជាសមាជិកអាស៊ានជាច្រើនលើក តាមរយៈប្រព័ន្ធវីដេអូសន្និសីទ ZOOM ដើម្បីបន្តកិច្ចការងារមួយចំនួនក្នុងពេលដែលកម្ពុជាបានដាក់សាកល្បងទីក្រុងឆ្លាតចំនួន ៣ ដោយមានទីក្រុងបាត់ដំបង ទីក្រុងសៀមរាប និងទីក្រុងភ្នំពេញ ជាមួយបណ្តាប្រទេសអាស៊ានជិត ៣០ ទីក្រុង។
តាមទំព័រហ្វេសប៊ុករបស់ក្រសួងមហាផ្ទៃបានឱ្យដឹងថា គណៈកម្មការសម្របសម្រួល និងដឹកនាំការងារទីក្រុងឆ្លាតត្រូវបានបង្កើតឡើង ដើម្បីចូលរួមគាំទ្រដល់ការអនុវត្តគោលនយោបាយទីក្រុងឆ្លាត ដោយមានភារកិច្ចដូចជា សិក្សា ស្រាវជ្រាវបទពិសោធរបស់ប្រទេសនានានៅក្នុងតំបន់ និងសកលលោក ពាក់ព័ន្ធនឹងការបង្កើត និងការអភិវឌ្ឍទីក្រុងឆ្លាត។ គណៈកម្មការនេះក៏មានតួនាទីរៀបចំសេចក្តីព្រាងគោលនយោបាយ និងយុទ្ធសាស្ត្រនានានៃការរៀបចំទីក្រុងឆ្លាតសម្រាប់រយៈពេលមធ្យម និងរយៈពេលវែងផងដែរ។
ក្រសួងមហាផ្ទៃបានបញ្ជាក់ថា៖ «ក្រុមការងារនេះ ត្រូវមានភារកិច្ចសហការជាមួយក្រសួងស្ថាប័នពាក់ព័ន្ធ ដើម្បីគាំទ្រដល់ការបង្កើតទីក្រុងឆ្លាតសម្រាប់រដ្ឋបាលថ្នាក់ក្រោមជាតិ តាមរយៈការបណ្តុះបណ្តាលគោលនយោបាយនានាពាក់ព័ន្ធនឹងការងារទីក្រុងឆ្លាត ដោយសហការជាមួយដៃគូក្នុងវិស័យឯកជន អង្គការជាតិ និងអន្តរជាតិ អង្គការក្រៅរដ្ឋាភិបាល ជាមួយស្ថាប័ននានា ដើម្បីកៀរគរការគាំទ្រ និងកិច្ចសហប្រតិបត្តិការលើការងាររៀបចំទីក្រុងឆ្លាតផងដែរ»។
លោក ងី ច័ន្ទ្រផល បាននិយាយថា នៅពេលគណៈកម្មការនេះរៀបចំរបាយការណ៍ និងទស្សនទានរួចរាល់ហើយ លទ្ធផលដែលសម្រេចបាន និងវឌ្ឍនភាពការងារទាំងនោះនឹងត្រូវជូនប្រមុខរាជរដ្ឋាភិបាលក្នុងពេលខាងមុខ ដើម្បីបន្តធ្វើការបញ្ជ្រាបគោលនយោបាយនានាពាក់ព័ន្ធនឹងការងារទីក្រុងឆ្លាតដល់រដ្ឋបាលថ្នាក់ក្រោមជាតិបន្តទៀត៕
