ភ្នំពេញៈ មន្ត្រីអង្គភាពលូទឹក បូមទឹក នៃមន្ទីរសាធារណការ និងដឹកជញ្ជូនរាជធានីភ្នំពេញ កំពុងស្តារប្រឡាយលូ ៥ នៅក្នុងសង្កាត់ស្ទឹងមានជ័យ ៣ ខណ្ឌមានជ័យ ដើម្បីត្រៀមបង្ហូរជំនន់ទឹកភ្លៀងនារដូវវស្សានេះ កុំឱ្យហូរចូលទៅប្រឡាយបឹងទំពុន បង្កឱ្យមានការលិចលង់លំនៅឋានប្រជាពលរដ្ឋ។
លោក ដួង ចាន់សារ៉ាត់ ប្រធានអង្គភាពលូទឹក បូមទឹក នៃមន្ទីរសាធារណការ និងដឹកជញ្ជូនរាជធានីភ្នំពេញថ្លែងនៅថ្ងៃទី ២២ ខែមិថុនាថា មន្ត្រីអង្គភាពលូទឹក បូមទឹក និងស្ថានីយចម្រោះទឹកកខ្វក់កំពុងធ្វើសកម្មភាពស្តារប្រឡាយលូ ៥ ដើម្បីត្រៀមរំដោះជំនន់ទឹកភ្លៀងនារដូវវស្សា និងមួយផ្នែកទៀតកុំឱ្យទឹកភ្លៀងហូរចូលទៅប្រឡាយបឹងទំពុន និងជន់លិចលំនៅឋានប្រជាពលរដ្ឋ។
លោក ដួង ចាន់សារ៉ាត់ ថ្លែងថា៖ «ប្រឡាយលូ ៥ មានប្រវែងជាង ១ ០០០ ម៉ែត្រទទឹងមានប្រវែងពី ១៥ ទៅ ៣០ ម៉ែត្រ ចាប់ពីប្រឡាយលូ ៥ ផ្លូវវេងស្រេងដល់ស្ថានីយបូមទឹកលូ ៥។ យើងប្រើគ្រឿងចក្រអេស្កាវ៉ាទ័រដើម្បីកាយសំរាមចេញពីប្រឡាយដឹកជញ្ជូន ដោយឡានដឹកដីយកទៅបោះចោលនៅទីលានចោលសំរាម» ។
បើតាមលោក ចាន់ សារ៉ាត់ ការស្តារប្រឡាយលូ ៥ នេះមានរយៈពេល ៣ សប្តាហ៍ គិតចាប់ពីថ្ងៃទី ១៩ មិថុនា។ ក្រោយការស្តារប្រឡាយលូ ៥ នេះនឹងអាចរំដោះទឹកនៅដោយកន្លែង ក្នុងមូលដ្ឋានខណ្ឌពោធិ៍សែនជ័យ ខណ្ឌសែនសុខ និងខណ្ឌមានជ័យ ដោយទឹកហូរចូលប្រឡាយលូ ៥ ទៅស្ថានីយបូមទឹកលូ ៥ ទើបបូមទម្លាក់ទៅប្រឡាយម័រ ប្រឡាយបារាំង និងបន្តចុះទៅបឹងជើងឯក។
លោក ចាន់ សារ៉ាត់ សង្ឃឹមថា ការខិតខំស្តារប្រឡាយលូ ៥ នេះរួមចំណែកកាត់បន្ថយបានច្រើនចំពោះការលិចលង់នៅរដូវវស្សាឆ្នាំនេះ។ ប្រឡាយលូ ៥ នេះ ពោរពេញដោយសំរាម ភក់ និងកាកអំពៅ ដែលត្រូវបានប្រជាពលរដ្ឋដឹកទៅទម្លាក់ចោល។ លោកថ្លែងថា៖ «ខ្ញុំសំណូមពរទៅដល់ប្រជាពលរដ្ឋ មេត្តាចូលរួមទុកដាក់សំរាមឱ្យបានត្រឹមត្រូវ កុំបោះសំរាមចូលក្នុងប្រឡាយទឹក ព្រោះវានាំឱ្យមានការបិទបាំងផ្លូវទឹក»។
លោក ហេង យ៉ុនគូរ៉ា នាយកប្រតិបត្តិអង្គការកែច្នៃ និងអនាម័យសហគមន៍ ឱ្យដឹងថា តាមការកត់សម្គាល់របស់លោកផ្ទាល់ បរិស្ថាននៅរាជធានីភ្នំពេញ មានភាពល្អប្រសើរច្រើន ព្រោះប្រជាពលរដ្ឋមានការយល់ដឹងច្រើនជាងមុន ក្នុងការទុកដាក់ និងវេចខ្ចប់សំរាម។ ប៉ុន្តែសម្រាប់អ្នកនៅតាមប្រឡាយមានផ្លូវច្រកតូចៗ ភាគច្រើនមិនមានអ្នកប្រមូលសំរាមទៅដល់ឡើយ ហេតុនេះពួកគាត់ជាប្រជាពលរដ្ឋមួយចំនួន នៅតែបន្តបោះសំរាមចោល ទៅក្នុងប្រឡាយ ខណៈមានអ្នកខ្លះបានយកទៅដុតចោល។
លោកបន្តថា ការដែលពលរដ្ឋបោះសំរាមចោលបែបនេះ ដោយសារតែមិនទាន់មានសេវាប្រមូលសំរាមគ្រប់ច្រកល្ហក ដែលភាគច្រើន គឺមានតែការប្រមូលតាមឡាន ដែលគេហៅថា ប្រមូលមធ្យម ប៉ុន្តែការប្រមូលបឋម ឬ ប្រមូលតាមច្រកល្ហកដែលឡានចូលមិនដល់នោះ គឺនៅមានកម្រិតនៅឡើយ៕