.jpg)
សមាជិកដៃគូអភិវឌ្ឍន៍គណៈកម្មការទន្លេមេគង្គ ចូលរួមប្រជុំតាមអនឡាញនៅថ្ងៃទី ២៤ មិថុនានេះ។ រូបថត MRC
ភ្នំពេញៈ ប្រទេសអូស្ត្រាលី អាល្លឺម៉ង់ និងស្វីស បានសន្យាផ្តល់មូលនិធិប្រមាណ ១៣ លានដុល្លារអាមេរិក ឲ្យគណៈកម្មការទន្លេមេគង្គ (MRC) ដើម្បីគាំទ្រប្រទេសកម្ពុជា ឡាវ ថៃ និងវៀតណាម ឆ្លើយតបទៅនឹងបញ្ហាប្រឈមជាបន្ទាន់នានា ទន្ទឹមនឹងការរក្សាគាំពារដល់មុខងារអេកូឡូស៊ីនៃទន្លេមេគង្គនិងធ្វើឲ្យជីវភាពរស់នៅរបស់ប្រជាជនកាន់តែប្រសើរឡើង។ នេះបើតាមសេចក្តីប្រកាសព័ត៌មានរបស់ MRC នៅថ្ងៃទី ២៤ ខែមិថុនា។
សេចក្តីប្រកាសព័ត៌មានបញ្ជាក់ថា ការចូលរួមវិភាគទានរបស់ប្រទេសទាំងនេះ ប្រព្រឹត្តទៅតាមរលកថ្មីមួយនៃមូលនិធិដៃគូអភិវឌ្ឍន៍ដល់ MRC ក្នុងពេលគណៈកម្មការនេះ ចាប់ផ្តើមអនុវត្តផែនការយុទ្ធសាស្ត្រ ៥ ឆ្នាំ (២០២១-២០២៥) របស់ខ្លួន នៅក្រោមទិសដៅថ្មីមួយ សំដៅយកឈ្នះលើការគំរាមកំហែងជាច្រើន ដែលអាងទន្លេនេះកំពុងជួបប្រទះ។
លោក អាន ពេជ្រហត្ថដា នាយកប្រតិបត្តិនៃលេខាធិការដ្ឋាន MRC ក្នុងពិធីចុះហត្ថលេខាមួយ នាអំឡុងកិច្ចប្រជុំដៃគូអភិវឌ្ឍន៍ក្រៅផ្លូវការ កាលពីថ្ងៃទី ២៤ មិថុនា នៅទីក្រុងវៀងចន្ទន៍ឱ្យដឹងថា ការគាំទ្រនេះមកទាន់ពេលវេលានិងមានសារៈសំខាន់ខ្លាំងណាស់សម្រាប់ MRC ក្នុងការអនុវត្តសកម្មភាពនានា ដែលធ្វើឲ្យមានតុល្យភាពលើតម្រូវការនៃការអភិវឌ្ឍសេដ្ឋកិច្ច ការធ្វើឲ្យសង្គមប្រសើរឡើង និងការគាំពារដល់បរិស្ថាន។
លោកបន្តថា នៅក្រោមផែនការយុទ្ធសាស្ត្រថ្មីនេះ MRC នឹងធានាថា រាល់ផែនការថ្នាក់ជាតិថ្មីៗសម្រាប់បង្កើតថាមពលបានថ្លឹងថ្លែងរាល់ជម្រើសជាច្រើននៃប្រភពបង្កើតថាមពលនានា រួមទាំងជម្រើសថាមពល-ស្បៀង-ទឹក ក៏ដូចជាការប្រើប្រាស់បន្ថែមនៃថាមពលដោយពន្លឺព្រះអាទិត្យ និងខ្យល់។ វានឹងជួយលើកកម្ពស់ភាពចម្រុះ ពពិធភាព សមភាព និងបរិយាប័ន្នយេនឌ័រក្នុងវិស័យទឹក។
បើតាមលោកអាន ពេជ្រហត្ថដា MRC នឹងសិក្សាស្វែងរកនូវមធ្យោបាយសម្រាប់ជួយសម្រួលប្រតិបត្តិការនៃហេដ្ឋារចនាសម្ព័ន្ធទឹក សម្រាប់អាងទន្លេទាំងមូល ដើម្បីបង្កើនផលប្រយោជន៍ឲ្យដល់កម្រិតអតិបរមា និងកាត់បន្ថយផលប៉ះពាល់អវិជ្ជមានផ្នែកបរិស្ថានលើទន្លេមេគង្គ និងប្រជាជន។
ស្ថាប័ននេះ ក៏នឹងបន្តជំរុញកិច្ចសន្ទនាថ្នាក់តំបន់ក្នុងចំណោមប្រទេសតាមអាងទន្លេ និងធ្វើឲ្យការចូលរួមចំណែកជាមួយប្រទេសចិនកាន់តែស៊ីជម្រៅ ក៏ដូចជា ជាមួយដៃគូផ្សេងៗទៀត តាមរយៈកិច្ចសហប្រតិបត្តិការអាស៊ាន និងឡានឆាង-មេគង្គ សម្រាប់ជាប្រយោជន៍ដល់សមាជិកទាំងអស់។
លោក Paul Kelly ឯកអគ្គរដ្ឋទូតអូស្ត្រាលីប្រចាំប្រទេសឡាវ បានឱ្យដឹងថា វិភាគទានថ្មីពីប្រទេសអូស្ត្រាលី មានតម្លៃជាថវិកា ៣,៨ លានដុល្លារអាមេរិក។ លោកសង្ឃឹមថា ជំនួយមូលនិធិទាំងនេះ នឹងជួយបង្កើនលទ្ធភាពដល់ MRC និងប្រទេសជាសមាជិកឲ្យប្រើប្រាស់ធនធានទឹក និងធនធានពាក់ព័ន្ធនៃទន្លេមេគង្គប្រកបដោយបរិយាប័ន្ន និងដោយចីរភាព ដើម្បីជាចំណែកមួយ ជួយដល់ការស្តារសេដ្ឋកិច្ចឡើងវិញពីការរាតត្បាតជាសកល ការកសាងភាពធន់ផ្នែកបរិស្ថាន និងការពង្រឹងកិច្ចសហប្រតិបត្តិការតំបន់។
លោក Paul Kelly បន្ថែមថា ប្រទេសអូស្ត្រាលី ក៏កំពុងផ្តល់នូវការគាំទ្របច្ចេកទេសដល់ MRC លើវិស័យសំខាន់ៗជាច្រើនផងដែរ រួមទាំងដល់មជ្ឈមណ្ឌលគ្រប់គ្រងទឹកជំនន់ និងគ្រោះរាំងស្ងួត និងការកែលម្អនូវប្រព័ន្ធទិន្នន័យ និងព័ត៌មានរបស់ស្ថាប័ននេះ។
ទន្ទឹមនឹងនេះ លោក Jens Lütkenherm ឯកអគ្គរដ្ឋទូតអាល្លឺម៉ង់ប្រចាំប្រទេសឡាវ បានសន្យាផ្តល់វិភាគទានពីប្រទេសនេះនូវទឹកប្រាក់ ៣ លានអឺរូ ស្មើនឹងប្រមាណ ៣,៥៥ លានដុល្លារអាមេរិកក្នុងការគាំទ្រដល់ផែនការថ្មីនេះ។
លោកថ្លែងថាមូលនិធិនេះនឹងត្រូវបានបែងចែកផ្តល់ជូនក្នុងរយៈពេល៣ឆ្នាំ ដោយចាប់ផ្តើមនៅឆ្នាំ២០២២ នូវទឹកប្រាក់ ១,២ លានដុល្លារអារិក។ មូលនិធិនេះត្រូវបានដាក់បញ្ចូលទៅក្នុងយន្តការមូលនិធិស្នូលរបស់ MRC ហើយថវិកាដែលនៅសេសសល់ នឹងត្រូវផ្តល់ឲ្យទៅតាមកម្មវិធីកិច្ចសហប្រតិបត្តិការ MRC–GIZ សម្រាប់ជាជំនួយផ្នែកបច្ចេកទេស។
លោក Jens Lütkenherm ថ្លែងថា៖«យើងជឿជាក់ថា មូលនិធិនេះ នឹងជួយ MRC ឲ្យបង្កើតនូវបណ្តាញស្នូលសម្រាប់កិច្ចការតាមដានទន្លេក្នុងតំបន់ទន្លេមេគង្គ ហើយជាលទ្ធផល វារួមចំណែកដល់ការសម្រេចចិត្តដោយផ្អែកលើព័ត៌មាន សម្រាប់ការគ្រប់គ្រង និងអភិវឌ្ឍន៍ធនធានទឹក និងជួយបង្កើនសមត្ថភាព MRC ក្នុងការគ្រប់គ្រងគ្រោះទឹកជំនន់ និងគ្រោះរាំងស្ងួតឲ្យកាន់តែមានប្រសិទ្ធភាព»។
លោក Jean-François Cuénod នាយកតំបន់នៃទីភ្នាក់ងារស្វីសសម្រាប់អភិវឌ្ឍន៍ និងកិច្ចសហប្រតិបត្តិការ បានសន្យាផ្តល់ថវិកា ៥,៣ លានដុល្លារអាមេរិក ក្នុងរយៈពេល ៥ ឆ្នាំ ដើម្បីគាំទ្រដល់ការអនុវត្តនៃផែនការយុទ្ធសាស្ត្រថ្មីនេះ។
លោកថ្លែងថា៖«យើងអបអរសាទរចំពោះ MRC ក្នុងការដាក់ឲ្យប្រើប្រាស់នូវយុទ្ធសាស្ត្រចក្ខុវិស័យថ្មីៗ ដែលចាំបាច់សម្រាប់អាងទន្លេមេគង្គ។ យើងនឹងរួមសហការជាមួយនឹងMRC ប្រទេសជាសមាជិក និងដៃគូអភិវឌ្ឍន៍ផ្សេងទៀត ក្នុងការផ្លាស់ប្តូរតំបន់នេះឆ្ពោះទៅកាន់មាគ៌ាមួយដែលកាន់តែមានចីរភាព និងភាពធន់ ដោយធានាថា គ្មាននរណាម្នាក់នឹងត្រូវបោះបង់ចោលនោះទេ»។
លោក Jean-François Cuénod បន្ថែមទៀតថា ប្រទេសស្វីស បានគាំទ្រ MRC ចាប់តាំងពីឆ្នាំ ១៩៩៥ មក និងជឿជាក់ថាស្ថាប័ននេះ ដើរតួនាទីយ៉ាងសំខាន់ក្នុងកិច្ចសហប្រតិបត្តិការទឹកប្រចាំតំបន់ទន្លេមេគង្គ។
ផែនការយុទ្ធសាស្ត្រ៥ឆ្នាំរបស់ MRC គឺជាឧបករណ៍ដ៏ចាំបាច់មួយសម្រាប់ឲ្យគណៈកម្មការអនុវត្តយុទ្ធសាស្ត្រអភិវឌ្ឍន៍អាងថ្មីមួយ ដែលមានរយៈពេល ១០ ឆ្នាំ ដែលតំណាងឲ្យរបត់ដ៏សំខាន់មួយសម្រាប់អាងទន្លេមេគង្គ។ រួមគ្នាវាផ្តល់លទ្ធភាពឲ្យប្រទេសតាមអាងទន្លេមេគង្គដោះស្រាយបញ្ហាប្រឈមដែលកំពុងជួបប្រទះ និងកើតឡើងថ្មីៗ ទន្ទឹមនឹងធ្វើឲ្យប្រសើរឡើងនូវស្ថានភាពរួមនៃអាងទន្លេ ក្នុងទសវត្សរ៍ខាងមុខនេះ។
គណៈកម្មការទន្លេមេគង្គ គឺជាស្ថាប័នអន្តររដ្ឋាភិបាល ដែលមានតួនាទីជំរុញលើកកម្ពស់កិច្ចពិគ្រោះយោបល់ និងកិច្ចសហប្រតិបត្តិការថ្នាក់តំបន់នៅក្នុងតំបន់អាងទន្លេមេគង្គខ្សែទឹកខាងក្រោម។
ស្ថាប័ននេះត្រូវបានបង្កើតឡើងក្នុងឆ្នាំ ១៩៩៥ ផ្អែកទៅតាមកិច្ចព្រមព្រៀងទន្លេមេគង្គ រវាងប្រទេសកម្ពុជា ឡាវ ថៃ និងវៀតណាម។ ស្ថាប័ននេះ បំពេញតួនាទីជាវេទិកាថ្នាក់តំបន់សម្រាប់ការទូតទឹក ក៏ដូចជាមជ្ឈមណ្ឌលប្រមូលផ្តុំចំណេះដឹងអំពីការគ្រប់គ្រងធនធានទឹក ដើម្បីអភិវឌ្ឍន៍តំបន់នេះប្រកបដោយចីរភាព៕
