ភ្នំពេញៈ រដ្ឋមន្ត្រីការបរទេសកម្ពុជាលោក ប្រាក់ សុខុន បានអំពាវនាវដល់ភាគីនៃកិច្ចសហប្រតិបត្តិការខ្សែក្រវាត់និងផ្លូវរបស់ចិនពង្រឹងកិច្ចសហការផលិត និងចែកចាយវ៉ាក់សាំងប្រឆាំងជំងឺកូវីដ ១៩ ដោយចៀសវាងយកជំងឺរាតត្បាតជាឧបករណ៍បម្រើផលប្រយោជន៍នយោបាយ។
លោក ប្រាក់ សុខុន ថ្លែងថា៖ «យើងត្រូវពង្រឹងកិច្ចសហការ និងកិច្ចសហប្រតិបត្តិការអន្តរជាតិលើការផលិត និងការចែកចាយវ៉ាក់សាំងឱ្យកាន់តែប្រកបដោយបរិយាប័ន្ននិងសមធម៌ហើយគួរចៀសវាងការយកជំងឺរាតត្បាតសកលមកធ្វើជាឧបករណ៍នយោបាយ។ប្រការដែលសំខាន់ដូចគ្នានេះដែរ កិច្ចសហប្រតិបត្តិការតំបន់គឺជាការចាំបាច់ដើម្បីពង្រឹងការការពារជំងឺរាតត្បាតទាំងឡាយនាពេលអនាគត»។
ការថ្លែងរបស់លោក ប្រាក់ សុខុន ដូចនេះធ្វើឡើងក្នុងសន្និសីទជាន់ខ្ពស់អាស៊ី-ប៉ាស៊ីហ្វិក ស្តីពីកិច្ចសហប្រតិបត្តិការខ្សែក្រវាត់និងផ្លូវក្រោមប្រធានបទ «ការលើកកម្ពស់កិច្ចសហប្រតិបត្តិការក្នុងការប្រយុទ្ធប្រឆាំងនឹងជំងឺរាតត្បាតដើម្បីការអភិវឌ្ឍប្រកបដោយចីរភាព» កាលពីថ្ងៃទី ២៣ ខែមិថុនា។
លោកបានថ្លែងថា កិច្ចសហប្រតិបត្តិការអន្តរជាតិ និងការកសាងភាពជាដៃគូពិតជាមានសារៈសំខាន់ជាងពេលណាទាំងអស់ក្នុងកិច្ចខិតខំប្រឹងប្រែងដើម្បីស្តារសេដ្ឋកិច្ច និងសង្គមឱ្យមានភាពរស់រវើកនិងរួចផុតពីវិបត្តិសេដ្ឋកិច្ច-សង្គម ដែលបង្កឡើងដោយជំងឺរាតត្បាតនេះ។
លោកបានបន្តថា កិច្ចខិតខំប្រឹងប្រែងរបស់ចិនដែលឈានមុខគេនៅក្នុងវ៉ាក់សាំងពហុភាគីនិយម ត្រូវបានទទួលស្គាល់យ៉ាងទូលំទូលាយ និងផ្តល់សារ:សំខាន់យ៉ាងខ្លាំង។ មកទល់ថ្ងៃនេះ ចិនបានចែកចាយវ៉ាក់សាំងជាង ៣៥០ លានដូសទៅដល់ដៃគូសហប្រតិបត្តិការសកល។
លោក ប្រាក់ សុខុន ថ្លែងថា ដោយប្ដេជ្ញាចិត្តក្នុងការធានាថា អ្នកណាក៏អាចទទួលបានវ៉ាក់សាំងដែរ ចិនបន្តគាំទ្រក្រុមហ៊ុនផលិតវ៉ាក់សាំងរបស់ខ្លួនក្នុងការផ្ទេរបច្ចេកវិទ្យា និងការផលិតវ៉ាក់សាំងរួមគ្នាជាមួយប្រទេសកំពុងអភិវឌ្ឍន៍នានាផងដែរ។ «ជាមួយនឹងការប្តេជ្ញាចិត្តដ៏រឹងមាំទាំងនេះ យើងអាចមើលឃើញនូវអនាគតនៃពិភពលោកមួយដែលមានសុវត្ថិភាពជាងពេលបច្ចុប្បន្ន»។
លោកបានបញ្ជាក់ថា៖ «ខ្ញុំជឿជាក់យ៉ាងមុតមាំថាកិច្ចសហប្រតិបត្តិការអន្តរជាតិ និងការតភ្ជាប់គឺជាកាតាលីករដ៏សំខាន់នៃការងើបឡើងវិញរបស់យើង។ កិច្ចសហប្រតិបត្តិការតំបន់របស់យើងចាំបាច់ត្រូវផ្តោតលើការធានាថាខ្សែចង្វាក់ផ្គត់ផ្គង់ ក្នុងតំបន់នៅតែមានភាពធន់រឹងមាំ។ យើងធ្វើបានល្អនៅក្នុងបរិបទនេះ អាស្រ័យដោយមានគម្រោងខ្សែក្រវាត់ និងផ្លូវជាច្រើន ដែលកំពុងដំណើរការលូតលាស់នៅទូទាំងតំបន់។
ងាកទៅរកគម្រោងស្ថាបនាសំណង់វិញលោក សុខុន ថ្លែងថា កម្ពុជាមានតំបន់សេដ្ឋកិច្ចពិសេសដ៏ធំមួយនៅខេត្តព្រះសីហនុ គម្រោងសាងសង់ផ្លូវល្បឿនលឿនភ្នំពេញ-ខេត្តព្រះសីហនុ និងអាកាសយានដ្ឋានអន្តរជាតិថ្មីនៅភ្នំពេញ និងខេត្តសៀមរាបជាដើម។ គម្រោងហេដ្ឋារចនាសម្ព័ន្ធទាំងនេះបាន និងកំពុងវិវត្តទៅមុខយ៉ាងរលូន ហើយប្រាកដជានឹងចូលរួមចំណែកក្នុងការជំរុញការងើបឡើងវិញនៃសេដ្ឋកិច្ចកម្ពុជា។
លោកថ្លែងថា៖ «ទន្ទឹមនឹងការគាំទ្រគំនិតផ្តួចផ្តើមទាំង ២ ដែលស្នើឡើងដោយចិនស្ដីពីកិច្ចសហប្រតិបត្តិការវ៉ាក់សាំង និងភាពជាដៃគូក្នុងការអភិវឌ្ឍបៃតងខ្ញុំមានសុទិដ្ឋិនិយមថា ស្មារតីនៃកិច្ចសហប្រតិបត្តិការខ្សែក្រវាត់ និងផ្លូវនឹងបន្តរួមចំណែកដល់ការឈានទៅសម្រេចបាននូវគោលដៅអភិវឌ្ឍន៍ប្រកបដោយចីរភាពរបស់យើង នៅក្នុងរយៈពេលច្រើនឆ្នាំទៅមុខទៀត»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាប្រាប់ ភ្នំពេញ ប៉ុស្តិ៍ នៅថ្ងៃទី ២៤ ខែមិថុនាថា ស្ថិតក្នុងភាពជាដៃគូសហប្រតិបត្តិការវាងកម្ពុជា និងចិន កម្ពុជាបានទទួលវ៉ាក់សាំងដែលជាជំនួយឥតសំណងរាប់លានដូសពីចិនហើយកម្ពុជាថែមទាំងអាចទិញវ៉ាក់សាំងពីចិនបានចំនួនជាច្រើនលានដូសផងដែរ។
លោកថ្លែងថា៖ «យើងដឹងថាវ៉ាក់សាំងនេះមិនមែនជាទំនិញធម្មតាដែលយើងមានលុយសុទ្ធតែអាចទិញបាននោះទេ។ ប្រទេសខ្លះគាត់មានលុយដែរ គាត់អត់អាចទិញបានទាន់ពេលវេលាផង។ អ៊ីចឹង យើងឃើញថា ផ្លែផ្កានៃទំនាក់ទំនងល្អរវាងកម្ពុជា-ចិន គឺកម្ពុជាទទួលបានផលប្រយោជន៍ច្រើនទៅលើវិស័យសេដ្ឋកិច្ច សង្គម វប្បធម៌ អប់រំជាដើម ជាពិសេសគឺកូវីដ ១៩ ដែលចិនជួយច្រើនទៅលើវ៉ាក់សាំងទៅលើបច្ចេកទេស ក៏ដូចជា ឱសថអីផ្សេង»៕