.jpg)
ទីលានចាក់សំរាមថ្មីខេត្តបាត់ដំបងទំហំ ២១ ហិកតា កំពុងដំណើរការសាងសង់។ រូបថត ក្រសួងព័ត៌មាន
បាត់ដំបងៈ អាជ្ញាធរខេត្តបាត់ដំបង កំពុងសាងសង់ទីលានកប់សំរាម (ចាក់សំរាម) ថ្មីមួយ លើផ្ទៃដី ២១ ហិកតា នៅក្នុងភូមិពយស្វាយ ឃុំតាគ្រៀង ស្រុកបាណន់ ដែលមានចំងាយ ២៥ គីឡូម៉ែត្រ ពីក្រុងបាត់ដំបង ដើម្បីការពារនិងកាត់បន្ថយផលប៉ះពាល់ដល់បរិស្ថាន ជាពិសេសការបំពុលខ្យល់អាកាស ដែលនាំឱ្យប៉ះពាល់ធ្ងន់ធ្ងរដល់សុខភាពមនុស្ស និងសត្វ។
លោកស្រី កឹម សុគន្ធារី អនុប្រធានមន្ទីរសាធារណការ និងដឹកជញ្ជូនខេត្តបាត់ដំបង បានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ២៤ ខែ មិថុនា ឆ្នាំ ២០២១ ថា គម្រោងសាងសង់ទីលានកប់សំរាម ដែលផ្ដួចផ្ដើមឡើងដោយក្រសួងសាធារណការ និងអាជ្ញាធរខេត្តបាត់ដំបង ក្រោមជំនួយឥណទានរបស់ធនាគារអភិវឌ្ឍន៍អាស៊ី មានទំហំទឹកប្រាក់៥លានដុល្លារអាមេរិក និងប្រើរយៈពេល ១៧ ខែ ដោយគិតចាប់ផ្ដើមពីពាក់កណ្ដាលខែមេសា ឆ្នាំ ២០២១។
លោកស្រីបានបញ្ជាក់ថា៖ «មកទល់ពេលនេះ ក្រុមការងាយើងកំពុងដំណើការឈូសឆាយកិនពង្រាបដី ដើម្បីសាងសង់ទីលានទៅតាមប្លង់បច្ចេកទេស បានសម្រេចប្រមាណជិត ១០ ភាគរយហើយ»។
បើតាមលោកស្រី សុគន្ធារី នៅពេលទីលានចាក់សម្រាមនេះត្រូវបានស្ថាបនារួច វាអាចមានសមត្ថភាពផ្ទុកសំរាមប្រមាណចន្លោះពី ១ ៥០០ តោនទៅ ៣ ០០០ តោន ក្នុងមួយថ្ងៃ។
សំរាមទាំងនោះអាចនឹងត្រូវបានបែងចែក និងកែច្នៃទៅតាមលក្ខណបច្ចេកទេស នៃប្រភេទសំរាមនិងកាកសំណល់នីមួយៗ ដើម្បីកាត់បន្ថយផលប៉ះពាល់បរិស្ថានក្នុងតំបន់។
អ្នកស្រីបានពន្យល់ថា មូលហេតុដែលនាំឲ្យមានការប្រើប្រាស់ពាក្យទីលានកប់សំរាមនេះ គឺមកពីទីលាននោះ មិនតម្រូវឲ្យមានការចាក់សំរាមគរចោល ដោយគ្មានការគ្រប់គ្រងត្រឹមត្រូវតាមស្តង់ដាបច្ចេកទេសនោះទេ។
សំរាម និងកាកសំណល់ទាំងអស់ នឹងត្រូវបានគេញែកចេញទៅតាមប្រភេទសំរាមនីមួយៗ ហើយមានប្រព័ន្ធលូជំវិញ ដើម្បីរំដោះទឹកនិងក្លិនចេញពីសំរាម និងកាកសំណល់ ដែលត្រូវបានកិនពង្រាប និងចាក់ដីសង្កត់រៀបជាស្រទាប់។
ទឹកដែលជ្រាបចេញពីសំរាម និងកាកសំណល់ដែលបានកប់នៅក្នុងរណ្ដៅនៃទីលានកប់សំរាមនោះ ត្រូវបានបង្ហូរចូលទៅក្នុងអាងប្រតិកម្មទឹកស្អាត ដែលនឹងត្រូវស្ថាបនា នៅក្នុងបរិវេណនៃទីលាននោះ ដើម្បីជាប្រយោជន៍ក្នុងការប្រើប្រាស់សម្រាប់លាងសំអាតកាកសំណល់អេតចាយ និងស្រោចស្រពដំណាំ ព្រមទាំងសំរាមក្នុងទីលាន នៅពេលមានគ្រោះអគ្គិភ័យ។
លោកស្រីបានប្រាប់ឲ្យដឹងអំពីមូលហេតុ ដែលនាំឲ្យមានការបង្កើតទីលានកប់សំរាមថ្មីនោះថា ដោយសារតែទីលានចាក់សំរាមក្នុងទីក្រុងបាត់ដំបង ដែលមានផ្ទៃដី ៨ ហិកតា នាពេលកន្លងមកនោះ បានក្លាយជាតំបន់ទីប្រជុំជន មានការអភិវត្តនូវសំណង់អគារ និងផ្សារទំនើប ដែលទាមទារឲ្យមានការផ្លាស់ប្ដូរឲ្យបានឆាប់រហ័សនៃការរៀបចំទីតាំងចាក់ ឬ កប់សំរាមថ្មី ដែលមានទីតាំងស្ថិតនៅឆ្ងាយពីទីប្រជុំជន ដើម្បីកាត់បន្ថយនូវផលប៉ះពាល់បរិស្ថាន និងសុខភាព និងដើម្បីលើកកម្ពស់សោភណ្ឌភាពក្នុងក្រុងបាត់ដំបង។
យោងតាមគម្រោងអភិវឌ្ឍន៍ទីលានកប់សំរាមរបស់មន្ទីរសាធារណការ និងដឹកជញ្ជូនខេត្តបាត់ដំបង នៅក្នុងឆ្នាំ ២០៤០ ក្រោយពីទីលានកប់សំរាមថ្មីនេះ អស់អត្ថិភាពក្នុងការផ្ទុកនិងកែច្នៃសំរាម ទីលាននោះ នឹងត្រូវអភិវឌ្ឍន៍ប្រែក្លាយជាតំបន់ទេសចរណ៍ ឬជាសួនសាធារណៈ ដោយមានដាំផ្កា និងរុក្ខជាតិតូចធំជាលម្អ។
ទោះជាបែបណាក្ដី អ្នកស្រី ព្រឿន ចន្ធូ អាយុ ៤៥ ឆ្នាំ ជាប្រជាពលរដ្ឋរស់នៅភូមិពយស្វាយ ឃុំតាគ្រៀង ស្រុកបាណន់ បានប្រាប់ ភ្នំពេញ ប៉ុស្តិ៍ ដោយសម្ដែងនូវក្ដីព្រួយកង្វល់ថា ទីលានចាក់សំរាមថ្មីនោះ អាចនឹងបង្កឲ្យមានក្លិនមិនល្អប៉ះពាល់ដល់ការរស់នៅរបស់អ្នកភូមិ។
លោកស្រីបានថ្លែងថា៖ «ខ្ញុំមានបងប្អូននៅក្បែរទីលានចាក់សំរាមចាស់ក្នុងក្រុងបាត់ដំបង ពួកគេបានប្រាប់ខ្ញុំថា ក្លិនសំរាមបានបង្កឲ្យពួកគេមានជំងឺសួត និងផ្លូវដង្ហើមរ៉ាំរ៉ៃ ដែលត្រូវចំណាយលុយកាក់ទិញថ្នាំព្យាបាលស្ទើរតែរៀងរាល់ថ្ងៃ»៕
