ភ្នំពេញៈ រដ្ឋបាលរាជធានីភ្នំពេញនៅថ្ងៃទី ២៣-២៤ ខែមិថុនានេះបានសម្រេចកំណត់ភូមិសាស្ត្រ «តំបន់លឿងទុំ» នៅផ្នែកខ្លះនៃខណ្ឌពោធិ៍សែនជ័យមកជា «តំបន់លឿង» រយៈពេល ១៤ ថ្ងៃ និងបានសម្រេចបើកដំណើរការឡើងវិញចំពោះផ្សារឯកជនដែលមានសណ្ដាប់ធ្នាប់របៀបរៀបរយ និងអនាម័យបរិស្ថានល្អ។
លោក ឃួង ស្រេង អភិបាលរាជធានីភ្នំពេញនៅថ្ងៃទី ២៤ ខែមិថុនានេះបានសម្រេចឱ្យបើកដំណើរការឡើងវិញចំពោះផ្សារឯកជនដែលមានសណ្ដាប់ធ្នាប់របៀបរៀបរយ និងអនាម័យបរិស្ថានក្នុងមូលដ្ឋានរាជធានីភ្នំពេញ។ ចាប់ពីថ្ងៃទី ២៥ ខែមិថុនា ឆ្នាំ ២០២១ តទៅ លើកលែងតែផ្សារមិនរៀបរយមិនត្រូវបានអនុញ្ញាតឱ្យបើកដំណើរការឡើយដើម្បីបង្ការ និងទប់ស្កាត់ការឆ្លងរាលដាលធ្ងន់ធ្ងរនៃជំងឺកូវីដ ១៩ ក្នុងសហគមន៍។
រដ្ឋបាលរាជធានីភ្នំពេញក៏បានណែនាំដល់ម្ចាស់ផ្សារ ឬគណៈគ្រប់គ្រងផ្សារឯកជនទាំងអស់ត្រូវអនុវត្តវិធានការរដ្ឋបាល និងវិធានការសុខាភិបាលឱ្យបានម៉ឺងម៉ាត់ជាទីបំផុតដូចជារក្សាគម្លាត ពាក់ម៉ាស់ កំណត់ចំនួនអតិថិជនចេញ-ចូលផ្សារចៀសវាងការប្រជ្រៀតគ្នា ឬប្រមូលផ្ដុំមនុស្សច្រើន ចាត់ឱ្យមានអ្នកវាស់កម្ដៅ និងស្គេន QR Code ជាដើម។
រដ្ឋបាលរាជធានីភ្នំពេញបានប្រគល់ភារកិច្ចដល់រដ្ឋបាលខណ្ឌទាំង ១៤ និងមន្ទីរពាណិជ្ជកម្មរាជធានីភ្នំពេញត្រូវសហការចុះត្រួតពិនិត្យតាមផ្សារនីមួយៗ ដើម្បីធានាការអនុវត្តឱ្យបានត្រឹមត្រូវ។ ក្នុងករណីរកឃើញថាម្ចាស់ផ្សារ ឬគណៈគ្រប់គ្រងផ្សារឯកជន ឬបុគ្គលណាម្នាក់មិនព្រមសហការ ឬមិនអនុវត្តតាមខ្លឹមសារនៃសេចក្តីសម្រេចនេះ ត្រូវចាត់វិធានការរដ្ឋបាល និងវិធានការច្បាប់ដោយគ្មានការលើកលែងឡើយ»។
រដ្ឋបាលរាជធានីភ្នំពេញកាលពីថ្ងៃទី ២៣ ខែមិថុនានេះ ក៏បានសម្រេចកំណត់ភូមិសាស្ត្រ «តំបន់លឿងទុំ» កំណត់ផ្នែកខ្លះនៃភូមិចោមចៅ ៣ នៃសង្កាត់ចោមចៅទី ២ និងផ្នែកខ្លះនៃភូមិត្រពាំងពោធិ៍ផ្នែកខ្លះនៃភូមិព្រៃព្រីងខាងជើង ២ និងផ្នែកខ្លះនៃភូមិជម្ពូវន្ត ២ នៃសង្កាត់ចោមចៅទី ៣ ខណ្ឌពោធិ៍សែនជ័យជា «តំបន់លឿងទុំ» ដើម្បីទប់ស្កាត់ការឆ្លងរាលដាលនៃជំងឺកូវីដ-១៩មកជា «តំបន់លឿង»។
ការកំណត់តំបន់ទាំងនេះជាតំបន់លឿងរយៈពេល ១៤ ថ្ងៃគិតចាប់ពីម៉ោងសូន្យ ថ្ងៃទី ២៤ ខែមិថុនា ឆ្នាំ ២០២១ រហូតដល់ថ្ងៃទី ៧ ខែកក្កដា ឆ្នាំ ២០២១។ តំបន់លឿងជាភូមិសាស្ត្រដែលត្រូវអនុវត្តវិធានការរដ្ឋបាលដូចជាការធ្វើចរាចរណ៍គ្រប់ប្រភេទនៅក្នុងតំបន់លឿង ត្រូវបានអនុញ្ញាតឱ្យប្រព្រឹត្តទៅជាធម្មតា៕