.jpg)
ជនរងគ្រោះទទួលមរណភាពក្នុងជម្លោះ កាលពីយប់ថ្ងៃទី ២២ មិថុនា នៅភូមិ ១ សង្កាត់ដងទង់។ រូបថត ប៉ូលិស
កោះកុងៈ នគរបាលក្រុងខេមរភូមិន្ទឃាត់បុរសសង្ស័យបានចំនួន ១០ នាក់ ក្នុងចំណោម ១១ នាក់ ពីម្សិលមិញពាក់ព័ន្ធនឹងការកាប់យុវជន ២ នាក់ ដែលបណ្តាលឱ្យម្នាក់ស្លាប់ និងម្នាក់ទៀត រងរបួសធ្ងន់កាលពីយប់ថ្ងៃទី ២២ មិថុនា នៅភូមិ ១ សង្កាត់ដងទង់ ក្រុងខេមរភូមិន្ទ ខេត្តកោះកុង។
លោក យស ច័ន្ទវិចិត្រ អធិការនគរបាលក្រុងខេមរភូមិន្ទ ប្រាប់ពីម្សិលមិញថា សមត្ថកិច្ចបានស្រាវជ្រាវឃាត់ខ្លួន ជនសង្ស័យជាយុវជនបានចំនួន ១០ នាក់ក្នុងចំណោម ១១ នាក់ នៅថ្ងៃទី ២៤ មិថុនា ពាក់ព័ន្ធអំពើមនុស្សឃាត ដែលបានកាប់ស្លាប់យុវជនម្នាក់ និងកាប់យុវជនម្នាក់ទៀតរបួសធ្ងន់។
អំពើឃាតកម្មនេះ កើតឡើងដោយសារទំនាស់ពាក្យសម្តីគ្នា។ ក្រោយកើតមានអំពើឃាតកម្ម កម្លាំងព្រហ្មទណ្ឌក្រុងបានសហការជាមួយកម្លាំងព្រហ្មទណ្ឌនៃស្នងការដ្ឋាននគរបាលខេត្តកោះកុងធ្វើការស្រាវជ្រាវឃាត់ខ្លួនក្រុមជនសង្ស័យបានជាបន្តបន្ទាប់ នៅទីតាំងផ្សេងគ្នា ប៉ុន្តែក្នុងក្រុងខេមរភូមិន្ទតែមួយ។
លោកថ្លែងថា៖ «ក្នុងមនុស្ស ១០ នាក់នេះ មានជនសមគំនិត និងអ្នកដៃដល់។ ប៉ុន្តែខ្ញុំកំពុងធ្វើការសួរចម្លើយ និងញែកចេញរកអ្នកដៃដល់សម្លាប់ជនរងគ្រោះ។ ករណីនេះយើងក៏ធ្វើសំណាករកមេរោគកូវីដ និងរកសារធាតុញៀនក្នុងខ្លួនពួកគេម្នាក់ៗដែរ»។
ដោយឡែក លោក ឡន សាំងហ៊ី នាយផ្នែកព្រហ្មទណ្ឌនៃអធិការដ្ឋាននគរបាលក្រុងខេមរភូមិន្ទឱ្យដឹង ពីម្សិលមិញដែរថា ចំពោះយុវជនរងគ្រោះឈ្មោះ លី ម៉ា អាយុ ១៨ ឆ្នាំមានរបរជាកម្មករសំណង់ត្រូវជនដៃដល់ប្រើកាំបិតប៉័ងតោ ១ ដើមកាប់ត្រូវចំកណ្តាលក្បាល ១ កាំបិត ផ្នែកខាងក្រោយក្បាល ១ កាំបិត និងលើដងខ្លួនចំនួន ៤ កន្លែងទៀត។
រីឯជនរងគ្រោះម្នាក់ទៀតឈ្មោះ ប៉ាក់ រ៉ាវុធ អាយុ ១៩ ឆ្នាំជាកម្មករដូចគ្នា របួសធ្ងន់កំពុងសម្រាកព្យាបាលនៅមន្ទីរពេទ្យបង្អែកខេត្តកោះកុង។ ពួកគេរស់នៅភូមិ-ឃុំពាមក្រសោប ស្រុកមណ្ឌលសីមា ខេត្តកោះកុងជាមួយគ្នា។
លោក សាំងហ៊ី បញ្ជាក់ថា៖ «រឿងនេះ យើងកំពុងស្រាវជ្រាវប្រមូលវត្ថុតាងបន្ថែមទៀតពាក់ព័ន្ធអំពើមនុស្សឃាតនេះ ដើម្បីធ្វើកំណត់ហេតុ និងស្រង់សាវតារជាតិរបស់ជនសង្ស័យម្នាក់ៗ។ យើងក៏កំពុងតែដំណើរការនីតិវិធីបន្តមុនសម្រេចបញ្ជូនពួកគេឡើងតុលាការ»។
បើតាមមន្ត្រីនគរបាលប៉ុស្តិ៍រដ្ឋបាលសង្កាត់ដងទង់សុំមិនឱ្យបញ្ចេញឈ្មោះ ១ រូប ដែលនិយាយយោងសម្តីសាក្សីគឺនៅវេលាម៉ោងជាង ៩ យប់ថ្ងៃទី ២២ មិថុនា គេបានឃើញយុវជន ២ នាក់ជិះម៉ូតូ ១ គ្រឿងឌុបគ្នាតាមបណ្តោយផ្លូវស្ថិតក្នុងភូមិ ១ សង្កាត់ដងទង់។ លុះពួកគេជិះម៉ូតូដល់ចំណុចកើតហេតុស្រាប់តែមានមនុស្ស ១ ក្រុមជិះម៉ូតូពី ៥ ទៅ ៦ គ្រឿងបានបើកកៀរម៉ូតូរបស់ជនរងគ្រោះ ដែលកំពុងជិះស្របទិសគ្នា។
មន្ត្រីរូបនោះបន្តថា នៅពេលនោះគេបានឮសំឡេងឈ្លោះប្រកែកគ្នាប្រមាណជា ១០ នាទី ហើយក៏មានការវាយតប់គ្នាតែម្តង។ បន្ទាប់មកគេបានឃើញក្រុមជនសង្ស័យប្រញាប់ប្រញាល់នាំគ្នាស្ទុះឡើងជិះម៉ូតូគេចខ្លួនបាត់អស់ដោយបន្សល់ទុកតែមនុស្ស ២ នាក់ដេកស្តូកស្តឹងនៅកន្លែងកើតហេតុ។
មន្ត្រីនោះបន្ថែមថា៖ «ប្រជាពលរដ្ឋនៅទីនោះគាត់រាយការណ៍មកសមត្ថកិច្ចយើង។ ពេលនោះយើងចុះដល់កន្លែងកើតហេតុឃើញយុវជនម្នាក់ត្រូវគេកាប់ស្លាប់ ហើយម្នាក់ទៀតត្រូវគេកាប់ចំខ្លួនពី ៣ ទៅ ៤ កាំបិតមុតជ្រៅ យើងដឹកគាត់ទៅមន្ទីរពេទ្យ បង្អែក ខេត្តភ្លាមៗនោះដែរ»។
ពាក់ព័ន្ធនឹងការដាក់ពាក្យបណ្តឹងពីក្រុមសាច់ញាតិរបស់ជនរងគ្រោះវិញ មន្ត្រីនគរបាលដដែលបញ្ជាក់ថា៖ «រឿងនេះបទល្មើសកើតមានជាក់ស្តែងហើយ។ បើក្រុមគ្រួសារជនរងគ្រោះប្តឹង ឬមិនប្តឹង គឺខាងនគរបាលខ្ញុំកសាងកំណត់ហេតុទៅតុលាការជាស្វ័យប្រវត្តិហើយ»៕
