ភ្នំពេញៈ អ្នកនាំពាក្យក្រសួងមហាផ្ទៃបានចេញសេចក្តីប្រកាសព័ត៌មានមួយស្ដីពី «ការអនុវត្តច្បាប់ទៅលើបណ្ដាញសកម្មជនខុសច្បាប់ ជ្រកក្រោមផ្លាកនៃអង្គការមាតាធម្មជាតិ» ឆ្លើយតបទៅនឹងសេចក្ដីថ្លែងការណ៍រួមរបស់អង្គការសមាគមប្រមាណ ៧០ ដែលបានទាមទារឱ្យដោះលែងសកម្មជនចលនាមាតាធម្មជាតិចំនួន ៣ នាក់ដែលត្រូវបានតុលាការសម្រេចឱ្យឃុំខ្លួនជាបណ្តោះអាសន្ន ក្រោមការចោទប្រកាន់ពីបទរួមគំនិតក្បត់ប្រឆាំងនឹងរដ្ឋ និងបទប្រមាថចំពោះអង្គព្រះមហាក្សត្រ។
ក្នុងសេចក្តីប្រកាសចុះថ្ងៃទី ២៣ ខែ មិថុនា ឆ្នាំ ២០២១ អ្នកនាំពាក្យក្រសួងមហាផ្ទៃបានលើកយកពីប្រវត្តិរបស់អង្គការមាតាធម្មជាតិ ដែលត្រូវបានក្រសួងមហាផ្ទៃរំលាយចេញពីបញ្ជីអង្គការមិនមែនរដ្ឋាភិបាលកាលពីថ្ងៃទី ១៥ ខែ កញ្ញា ឆ្នាំ ២០១៧ តាមសំណើរបស់ព្រះតេជគុណព្រះនាម ព្រហ្ម ធម្មជាតិ ដែលជាប្រធានអង្គការនេះចុះថ្ងៃទី ២៣ ខែ សីហា ឆ្នាំ ២០១៧។
ក្រសួងមហាផ្ទៃបានប្រាប់ឱ្យមហាជន ស្វែងយល់ពីសកម្មភាពមិនស្របច្បាប់របស់កញ្ញា ស៊ុន រដ្ឋា លោក យឹម លាងហ៊ី និង លោក លី ចាន់ដារ៉ាវុត ក្រោមផ្លាកអង្គការមាតាធម្មជាតិ ដែលត្រូវបានសមត្ថកិច្ចចាប់បញ្ជូនខ្លួនទៅសាលាដំបូងរាជធានីភ្នំពេញកាលពីថ្ងៃទី ១៩ ខែ មិថុនា ឆ្នាំ ២០២១ ហើយ ១ ថៃ្ងក្រោយមក តុលាការបានចោទប្រកាន់ពួកគេពីបទ «រួមគំនិតក្បត់ និងបទប្រមាថចំពោះអង្គព្រះមហាក្សត្រ»។ អ្នកនាំពាក្យក្រសួងមហាផ្ទៃបានគូសបញ្ជាក់ថា៖
«អង្គការមាតាធម្មជាតិ ពុំមានអត្ថិភាព និងលែងមាននីតិសម្បទាផ្លូវច្បាប់ ក្នុងការបំពេញការងាររបស់ខ្លួននៅព្រះរាជាណាចក្រកម្ពុជាទៀតទេ។ ប៉ុន្តែដោយមានការជ្រោមជ្រែងពីឈ្មោះ Alexandro Gonzalez Davidson សញ្ជាតិអេស្ប៉ាញដែលត្រូវក្រសួងមហាផ្ទៃបណ្តេញចេញពីព្រះរាជាណាចក្រកម្ពុជាកាលពីថ្ងៃទី ២៣ ខែកុម្ភៈ ឆ្នាំ ២០១៥ នោះ ពួកគេទាំង ៣ នាក់បានធ្វើសកម្មភាពញុះញង់ បំបែកបំបាក់សាមគ្គីផ្ទៃក្នុងជាតិ និងរំលោភបំពានទៅលើរដ្ឋធម្មនុញ្ញនៃព្រះរាជាណាចក្រកម្ពុជាក្នុងចេតនាបង្កអសន្តិសុខសង្គម និងប៉ះពាល់ដល់ស្ថិរភាពជាតិ ដែលអាជ្ញាធរមានសមត្ថកិច្ចចាំបាច់ត្រូវចាត់វិធានការតាមច្បាប់ជាធរមាន»។
ទោះជាបែបណាក៏ដោយកាលពីថ្ងៃទី ២២ ខែ មិថុនា ឆ្នាំ ២០២១ ក្រុមអង្គការសមាគមប្រមាណ ៧០ បានធ្វើសេចក្ដីថ្លែងការណ៍រួមមួយ ដោយបានចាត់ទុកសកម្មភាពនៃការឃាត់ខ្លួនរបស់សមត្ថកិច្ច និងចំណាត់ការរបស់សាលាដំបូងរាជធានីភ្នំពេញទៅលើសកម្មជនទាំង ៣ ខាងលើនេះ ថាជាផ្នែកមួយនៃ «ការដាក់គោលដៅ» ទៅលើអ្នកការពារបរិស្ថាន និងសកម្មជនមូលដ្ឋានជួរមុខ។
ក្រុមអង្គការសង្គមស៊ីវិលទាំងនោះបានអំពាវនាវឱ្យអាជ្ញាធរបញ្ឈប់ការចាប់យុវជនជាសកម្មជនការពារធនធានធម្មជាតិដាក់ពន្ធនាគារ និងគួរចាប់ផ្ដើមស្ដាប់មតិយោបល់របស់ពួកគេ ដែលស្ថិតនៅជួរមុខក្នុងការចងក្រងឯកសារពីហានិភ័យដែលប្រទេសកម្ពុជា កំពុងប្រឈម ចំពោះការជញ្ជក់ផលប្រយោជន៍ពីធនធានធម្មជាតិ និងការបំផ្លិចបំផ្លាញបរិស្ថាន។ ក្រុមអង្គការសង្គមស៊ីវិលទាំងនោះបានលើកឡើងថា៖ «ការតស៊ូមតិសម្រាប់សិទ្ធិមនុស្ស និងការទាមទារឱ្យអាជ្ញាធរការពារបរិស្ថានមិនមែនជាបទល្មើសនោះទេ ហើយការចាប់ខ្លួនអ្នកការពារបរិស្ថាន ដែលជាយុវជនជំនាន់ក្រោយរបស់ប្រទេសជាតិ ដាក់ពន្ធនាគារ គឺធ្វើឱ្យមានគ្រោះថ្នាក់ដល់យើងទាំងអស់គ្នា»។
បើតាមរបាយការណ៍ព័ត៌មានក្នុងសេចក្ដីថ្លែងការណ៍រួមរបស់អង្គការសង្គមស៊ីវិល កញ្ញា ស៊ុន រដ្ឋា និងលោក ចាន់ ដារ៉ាវុត ត្រូវបានចាប់ខ្លួននៅតាមមាត់ទន្លេក្នុងរាជធានីភ្នំពេញ ខណៈកំពុងចងក្រងឯកសារពីការបង្ហូរទឹកស្អុយចូលទៅក្នុងទន្លេ។ ក្នុងពេលនោះដែរអាជ្ញាធរស្រុកកោះធំខេត្តកណ្ដាលបានកោះហៅ លោក យីម លាងហ៊ី សកម្មជនបរិស្ថាន ដើម្បីធ្វើការសាកសួរហើយចាប់ខ្លួនលោកបញ្ជូនមកភ្នំពេញ។
អង្គការសង្គមស៊ីវិលទាំងនេះលើកឡើងថាសមត្ថកិច្ចបានលាក់បាំងជាសម្ងាត់ពីទីតាំងឃុំខ្លួនរបស់ពួកគេអស់រយៈពេលយ៉ាងតិច ២៤ ម៉ោង បន្ទាប់ពីការចាប់ខ្លួនពួកគេ ដែលបានធ្វើឱ្យប៉ះពាល់ផ្លូវចិត្តក្រុមគ្រួសាររបស់ពួកគេយ៉ាងខ្លាំង ក៏ដូចជាដកហូតសិទ្ធិរបស់ពួកគេក្នុងការទទួលបានការប្រឹក្សាផ្លូវច្បាប់ក្នុងពេលចាប់ខ្លួន។
ក្រោយមក សកម្មជនបរិស្ថានទាំង ៣ នាក់ត្រូវបានបញ្ជូនខ្លួនទៅសាលាដំបូងរាជធានីភ្នំពេញ និងត្រូវបានចោទប្រកាន់នៅថ្ងៃទី ២០ ខែមិថុនា ឆ្នាំ ២០២១ ពីបទ «រួមគំនិតក្បត់ និងបទប្រមាថចំពោះអង្គព្រះមហាក្សត្រ» ដែលត្រូវបានទម្លាយទៅកាន់ប្រព័ន្ធផ្សព្វផ្សាយគាំទ្ររដ្ឋាភិបាល មុនពេលមេធាវីអ្នកទាំងនោះទទួលបានព័ត៌មានពីបទចោទទាំងនេះ។
អង្គការសង្គមស៊ីវិលទាំងនេះលើកឡើងថា សកម្មភាពនេះបានធ្វើឱ្យប៉ះពាល់ដល់សិទ្ធិរបស់សកម្មជនបរិស្ថានទាំងនេះ ក្នុងការទទួលបានការជំនុំជម្រះក្ដីដោយយុត្តិធម៌។ ជាមួយគ្នានេះពួកគេបានស្នើសុំឱ្យអាជ្ញាធររដ្ឋាភិបាលដោះលែង និងទម្លាក់បទចោទប្រកាន់ទាំងអស់ប្រឆាំងសកម្មជនបរិស្ថានដោយបានលើកឡើងក្នុងសេចក្ដីថ្លែងការណ៍រួមនោះថា៖ «យើងខ្ញុំ ជាសហគមន៍ និងសង្គមស៊ីវិល សូមស្នើសុំឱ្យដោះលែង សកម្មជនបរិស្ថានដែលត្រូវបានចាប់ខ្លួនឱ្យបានឆាប់រហ័សទម្លាក់ចោលបទចោទទាំងអស់ប្រឆាំងពួកគេ និងបញ្ឈប់ការរឹតត្បិត និងការផ្ដន្ទាទោសឥតឈប់ឈរទៅលើចលនាការពារបរិស្ថាន»។
ប៉ុន្តែក្រសួងមហាផ្ទៃបានលើកឡើងថា ផ្អែកតាមភ័ស្តុតាងឃ្លីបវីដេអូដែលសមត្ថកិច្ចចាប់បានកាលពីថ្ងៃទី ១៤ ខែឧសភា ឆ្នាំ ២០២១ ឈ្មោះ Alexandro Gonzalez Davidson បានដឹកនាំកិច្ចប្រជុំមួយតាមប្រព័ន្ធ Online ជាមួយសកម្មជនរបស់ខ្លួនចំនួន ៣ រូបដោយក្នុងកិច្ចប្រជុំនោះពួកគេបានប្រើពាក្យពេចន៍ប្រមាថយ៉ាងធ្ងន់ធ្ងរ មកលើអង្គព្រះមហាក្សត្រ និងប្រមុខរាជរដ្ឋាភិបាល។
ពោលគឺសកម្មភាពរបស់ពួកគេនាពេលកន្លងមកនេះ គឺមិនមែនធ្វើដើម្បីបុព្វហេតុស្មោះត្រង់ ចំពោះកិច្ចការពារធនធានធម្មជាតិ និងបរិស្ថាននោះទេ តែបានបង្កប់នូវឧបាយកលទុច្ចរិតក្នុងបំណងញុះញង់ អុជអាល កៀរគរកម្លាំង ឱ្យងើបបះបោរបង្កើតឱ្យមានចលាចលវឹកវរក្នុងប្រទេស។
ជាមួយគ្នានេះអ្នកនាំពាក្យក្រសួងមហាផ្ទៃក៏បានលើកយកចម្លើយសារភាពរបស់ជនសង្ស័យទាំង ៣ រូបក្នុងដំណាក់កាលនគរបាលយុត្តិធម៌ និងដំណាក់កាលអយ្យការមកបញ្ជាក់ផងដែរថា៖ «ពួកគេពិតជាបានធ្វើសកម្មភាព ក្រោមស្លាកអង្គការមាតាធម្មជាតិ ប៉ុន្តែការពិត គឺចង់ឱ្យមានការងើបបះបោរ ប្រឆាំងដើម្បីឈានទៅដល់ការផ្ដួលរំលំរាជរដ្ឋាភិបាលតាមវិធានការដែលផ្ទុយទៅនឹងគោលការណ៍នៃលទ្ធិប្រជាធិបតេយ្យ សេរីពហុបក្សដែលមានចែងនៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា»៕
វីដេអូ៖