.jpg)
ប្រជាសហគមន៍ និងមន្ត្រីពេលចុះពិនិត្យព្រំដីកាលពីកន្លងមក។ រូបថត ហ្វេសប៊ុក
កំពង់ធំៈ អយ្យការអមសាលាដំបូងខេត្តកំពង់ធំបានកោះហៅប្រជាសហគមន៍ព្រៃឈើ និងមេភូមិ ៤ រូប ឱ្យចូលបំភ្លឺជាបន្តបន្ទាប់ពាក់ព័ន្ធពាក្យបណ្តឹងរបស់ដើមចោទ ៣ រូប ដោយបានចោទពួកគេថា ជាប់ពាក់ព័ន្ធនឹងបទល្មើសលួចយកដីកម្មសិទ្ធិអ្នកដទៃដាក់ចូលក្នុងសហគមន៍ ប៉ុន្តែសហគមន៍ទាំងនោះបានបដិសេធ និងបានប្តឹងបកវិញ។
តាមដីកាកោះចេញដោយលោក ស៊ិន វិរៈ ព្រះរាជអាជ្ញានៃអយ្យការអមសាលាដំបូងខេត្តកំពង់ធំចុះថ្ងៃទី ៩ មិថុនា ចំនួន ៤ ច្បាប់ផ្សេងគ្នាបានកោះហៅឈ្មោះ ឃួន ប៉ែត ឈ្មោះ អឿ សួ ឈ្មោះ ម៉ៃ ម៉ម និងឈ្មោះ ខៀវ ខូយ ដែលពួកគេម្នាក់ៗគឺជាប្រធានសហគមន៍ព្រៃឈើ ជាសមាជិកសហគមន៍ និងជាមេភូមិផងដែរឱ្យចូលបំភ្លឺនៅថ្ងៃទី ២៥ និងថ្ងៃទី ២៨ ខែមិថុនា។
តាមដីកាកោះដដែលបញ្ជាក់ថា៖ «ចូលខ្លួនដើម្បីសាកសួរ និងស្តាប់ចម្លើយពីដំណើររឿង ឈ្មោះ សួន ជា ឈ្មោះ ធ្លកប៊ុនថាន់ និងឈ្មោះ ម៉េង ហួយ ដែលបានប្តឹងពីបទលួចយកដីកម្មសិទ្ធិអ្នកដទៃដាក់ចូលក្នុងសហគមន៍ ប្រព្រឹត្តនៅភូមិដូនឈូក ឃុំនីពេជ្រ ស្រុកកំពង់ស្វាយ ខេត្តកំពង់ធំ កាលពីអំឡុងខែមិថុនា ឆ្នាំ ២០១៤»។
កាលពីដើមខែមិថុនានេះ ប្រជាសហគមន៍ព្រៃឈើអូរផ្លូវលោកចំនួន ១១ នាក់ ស្ថិតក្នុងឃុំនីពេជ្រ ស្រុកកំពង់ស្វាយបានរងការចោទប្រកាន់ពីសាលាដំបូងខេត្តកំពង់ធំរហូតមានការឃាត់ខ្លួនប្រជាសហគមន៍មួយចំនួនដាក់ពន្ធនាគារ រយៈពេល ៩ ថ្ងៃ ហើយត្រូវបានដោះលែងវិញនៅថ្ងៃទី ១៨ ខែមិថុនា។
ពាក់ព័ន្ធនឹងករណីនេះ លោក ខៀវ ខូយ ប្រធានសហគមន៍ព្រៃឈើត្រពាំងល្ពាក់ និងជាបណ្ដាញសហគមន៍ព្រៃឈើអូរផ្លូវលោកដែលត្រូវបានកោះហៅជាថ្មី និងធ្លាប់ត្រូវបានឃាត់ខ្លួនបានប្រាប់ភ្នំពេញប៉ុស្តិ៍កាលពីថ្ងៃទី ២៣ មិថុនាថា វិវាទនេះបានកើតឡើងកាលពីចុងខែមករា ឆ្នាំ ២០២១ ដោយប្រជាសហគមន៍បាននាំគ្នាទៅឃាត់គ្រឿងចក្រដែលបានឈូសឆាយកាយក្រវាត់ព្រំចូលដីសហគមន៍អូរផ្លូវលោកអស់ជាង ៧២ ហិកតា។
លោកបន្តថា សហគមន៍ព្រៃឈើអូរផ្លូវលោកមានការទទួលស្គាល់ស្របច្បាប់ពីក្រសួងកសិកម្ម រុក្ខាប្រមាញ់ និងនេសាទ ដោយមានកិច្ចព្រមព្រៀងពីខណ្ឌរដ្ឋបាលព្រៃឈើកាលពីឆ្នាំ ២០០៤ រួមទាំងមានការទទួលស្គាល់ពីអាជ្ញាធរដែនដី ដើម្បីការពារដីព្រៃសហគមន៍នេះផងដែរ។ ដូច្នេះលោកសង្ឃឹមថា តុលាការនឹងដោះស្រាយវិវាទនេះដោយយុត្តិធម៌ដល់ប្រជាសហគមន៍ និងផ្តល់សិទ្ធិកាន់កាប់ដីព្រៃរបស់សហគមន៍ត្រឡប់មកវិញកុំឱ្យមានការបំផ្លិចបំផ្លាញ។
លោកបញ្ជាក់ថា៖ «អយុត្តិធម៌ណាស់សម្រាប់រូបខ្ញុំ និងសហគមន៍ ព្រោះជាការងារស្ម័គ្រចិត្តបម្រើផលប្រយោជន៍រួម និងរក្សាការពារដីព្រៃជូនរដ្ឋស្របតាមកិច្ចព្រមព្រៀង និងប្រកាសរបស់ក្រសួង និងច្បាប់ស្តីពីព្រៃឈើ។ យើងខ្ញុំបានមកបំភ្លឺ និងបដិសេធការចោទចំនួន ២ លើករួចមកហើយ ដល់លើកទី ៣ សាលាដំបូងខេត្តកំពង់ធំបានឃាត់ខ្លួនដាក់ពន្ធនាគារតែម្តង»។
លោកបន្តថា៖ «គ្រាន់តែរូបខ្ញុំបានចេញពីពន្ធនាគារភ្លាម ស្រាប់តែមានដីកាកោះថ្មីលើសំណុំរឿងដដែល ដែលប្តឹងពីបទចោទថ្មីមួយទៀតមកលើរូបខ្ញុំរួមទាំងគណៈកម្មការ និងមេភូមិ ៣ នាក់ទៀត។ ករណីប្តឹងនេះខ្ញុំដឹងច្បាស់ណាស់ថា ក្នុងគោលបំណងចាប់សហគមន៍ទាំងអស់ដាក់ពន្ធនាគារដែលបានរារាំងមិនឱ្យបក្ខពួកខ្លួនយកដីព្រៃសហគមន៍មកធ្វើកម្មសិទ្ធិ»។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំនិងលោក កែវ អូម៉ាលីស្ស ប្រធានរដ្ឋបាលព្រៃឈើ មិនអាចសុំការអត្ថាធិប្បាយជុំវិញវិវាទដីធ្លីនេះបានទេកាលពីថ្ងៃទី ២៤ មិថុនា។ ចំណែកភាគីឈ្មោះ សួន ជា ឈ្មោះ ធ្លក ប៊ុនថាន់ និងឈ្មោះ ម៉េង ហួយ ក៏មិនអាចរកប្រភព ដើម្បីបកស្រាយពីករណីនេះបានដែរ។
លោក សាយ វាសនា អ្នកនាំពាក្យអយ្យការអមសាលាដំបូងខេត្តកំពង់ធំ បានប្រាប់ភ្នំពេញប៉ុស្តិ៍កាលពីថ្ងៃទី ២៣ មិថុនាថា ករណីនេះគឺជាវិវាទប្តឹងគ្នាទៅវិញទៅមករបស់ភាគីទាំងសងខាង ខណៈសំណុំរឿងរបស់ភាគីវិវាទទាំង ២ កំពុងស្ថិតក្នុងដៃរបស់តុលាការ។
លោកបានអះអាងថា ក្នុងនាមតំណាងឱ្យតុលាការ តំណាងអយ្យការនឹងស្រាវជ្រាវករណីនេះឱ្យបានស៊ីជម្រៅ និងជំរុញឱ្យភាគីពាក់ព័ន្ធចូលខ្លួនមកបំភ្លឺ ដោយបង្ហាញភ័ស្តុតាងការពារខ្លួនឱ្យបានត្រឹមត្រូវ។
លោកបញ្ជាក់ថា៖ «ខាងដើមបណ្តឹងគេថា គេមានឯកសារទិញលក់តាមច្បាប់ ចំណែកខាងសហគមន៍ គេប្តឹងវិញដែរថា មានការលួចឈូសឆាយដីព្រៃសហគមន៍។ រឿងនេះគ្រាន់តែកោះហៅដើម្បីឱ្យចូលបំភ្លឺយោងតាមពាក្យបណ្តឹងទេ ប្រសិនបើគាត់មានសំអាង មានអី ហើយការប្តឹងចោទប្រកាន់នេះ មិនត្រឹមត្រូវនោះតំណាងអយ្យការនឹងចេញសេចក្តីសម្រេចបន្តទៀត»។
លោកបន្ថែមថា៖ «តាមពិតវិវាទនេះ ភាគីមានសំអាងរៀងខ្លួន ប៉ុន្តែក្នុងនាមយើង គឺមិនវាយតម្លៃថាភាគីណាមួយត្រឹមត្រូវ ឬមិនត្រឹមត្រូវនោះទេ គឺយើង នឹងពិនិត្យទៅលើឯកសាររបស់ជំនាញរដ្ឋបាលព្រៃឈើ ក៏ដូចជា ក្រសួងកសិកម្មថែមទៀត។ អ៊ីចឹងចំណុចនេះស្ថិតក្នុងភាពប្រទាញប្រទង់គ្នា ហើយភាគីមានសំអាងរៀងខ្លួន ដូច្នេះយើងនឹងសួរនាំបន្តដល់អ្នកពាក់ព័ន្ធទៀត»។
ជាមួយនឹងការកោះហៅប្រជាសហគមន៍ និងមេភូមិចំនួន ៤ រូប លោក សាយ វាសនា បានឱ្យដឹងថា តុលាការក៏បានកោះហៅ បុគ្គល ៣ រូបដែលអះអាងថាជាម្ចាស់ដីឱ្យចូលខ្លួនបំភ្លឺតាមពាក្យបណ្តឹងរបស់សហគមន៍ដែលបានប្តឹងបកវិញក្នុងថ្ងៃដូចគ្នានាពេលខាងមុខផងដែរ។ ករណីនេះប្រសិនបើរឿងហេតុស៊ីចង្វាក់គ្នា តុលាការនឹងបញ្ចូលសំណុំរឿងប្តឹងទៅ ប្តឹងមកក្នុងវិវាទនេះបញ្ចូលគ្នា ទៅជាសំណុំរឿងតែមួយ ដើម្បីឱ្យតុលាការងាយស្រួលចាត់ការ៕
