បន្ទាយមានជ័យៈ រដ្ឋបាល​ក្រុង​ប៉ោយប៉ែត​បាន​ជូនដំណឹង​ដល់​ម្ចាស់​ផ្សារ អាជីវករ និង​ពលរដ្ឋ ដែល​កំពុង​យក​ចំណីផ្លូវ​ធ្វើ​អាជីវកម្ម ឱ្យ​បញ្ឈប់​ការលក់ដូរ និង​ដាក់តាំង​ទំនិញ​លើ​​ចំណីផ្លូវ​សាធារណៈ​បន្ត​ទៀត ហើយ​​ត្រូវ​រុះរើ​សំណង់​ដែល​បាន​សង់​រំលោភ​ចំណីផ្លូវ​ចេញ​វិញ ដោយ​ទុកពេល​ឱ្យ​ ១៤ ​ថ្ងៃ គិត​ចាប់ពី​ថ្ងៃទី​ ២៤ ​មិថុនា​ដល់​​ថ្ងៃទី​ ៧ ខែកក្កដា ឆ្នាំនេះ​ជា​កំហិត​។

យោង​តាម​សេចក្ដី​ជូនដំណឹង​របស់​រដ្ឋបាល​ក្រុង​ប៉ោយប៉ែត​កាលពី​ថ្ងៃទី​ ២៣ ខែមិថុនា បាន​ឱ្យ​ដឹងថា កន្លងមក​​នេះ អាជ្ញាធរ​ក្រុង​បាន​សង្កេតឃើញ​មាន​ម្ចាស់​ផ្សារ អាជីវករ និង​ពលរដ្ឋ​មួយចំនួន​បាន​យក​ចំណីផ្លូវ​ធ្វើ​អាជីវកម្ម​​ និង​អ្នក​ខ្លះទៀត​បាន​ដាក់​តាំង​ទំនិញ​លក់ដូរ​លើ​ចំណីផ្លូវ​សាធារណៈ​ ដែល​បង្ក​ឱ្យ​ប៉ះពាល់​ដល់​សណ្តាប់ធ្នាប់​សាធារណៈ​របៀបរៀបរយ និង​សោភណភាព​ក្នុង​ទីប្រជុំជន​ក្រុង​ថែមទៀត​ផង​។

រដ្ឋបាល​ក្រុង​បញ្ជាក់ថា ចំពោះមុខ​​ដើម្បី​រៀបចំ​សណ្តាប់ធ្នាប់ និង​បញ្ចៀស​​ការកកស្ទះ​ចរាចរណ៍​តាម​ដងផ្លូវ រដ្ឋបាល​ក្រុង​ប៉ោយប៉ែត​តម្រូវឱ្យ​ម្ចាស់ផ្សារ អាជីវករ និង​ពលរដ្ឋ​ដែល​កំពុង​យក​ចំណីផ្លូវ​ធ្វើ​អាជីវកម្ម​ទាំងអស់​ត្រូវ​បញ្ឈប់​ការលក់ដូរ ឬ​ដាក់តាំង​ទំនិញ​លើ​ចំណីផ្លូវ​សាធារណៈ​បន្ត​​ទៀត​។ ​រីឯ​ម្ចាស់​ផ្សារ ត្រូវ​បញ្ឈប់​ការអនុញ្ញាត​ឱ្យ​អាជីវករ​ ឬ​ពលរដ្ឋ​លក់ដូរ ដាក់តាំង​ទំនិញ​បន្លែ​ផ្លែឈើ និង​ត្រីសាច់​ចេញ​ក្រៅពី​បរិវេណ​ផ្សារ​ហើយ​ត្រូវ​រៀបចំ​កន្លែង​លក់ដូរ​ឱ្យមាន​សណ្តាប់ធ្នាប់​របៀបរៀបរយ និង​មាន​អនាម័យ​។

ជាមួយ​គ្នា​នេះ ម្ចាស់​ផ្សារ អាជីវករ និង​ពលរដ្ឋ​ដែល​កំពុង​យក​ចំណីផ្លូវ​​ធ្វើ​អាជីវកម្ម ត្រូវ​រុះរើ​តូប រាន ដែល​សាងសង់ និង​ដាក់តាំង​នៅលើ​ចំណីផ្លូវ​​សាធារណៈ​រៀបចំ​កន្លែង​ទុកដាក់​​សំរាម​ឱ្យ​បាន​ត្រឹមត្រូវ ចៀសវាង​បង្ក​ការប៉ះពាល់​ដល់​សុខុមាលភាព​ពលរដ្ឋ ហើយ​ត្រូវ​សហការ​ជាមួយ​អាជ្ញាធរ​មូលដ្ឋាន​ក្នុង​ការរៀបចំ​សណ្តាប់ធ្នាប់​របៀបរៀបរយ​ផ្សេងៗ​។

រដ្ឋបាល​ក្រុង​បញ្ជាក់ថា​៖ «​សូម​អស់លោក-លោកស្រី​ជា​ម្ចាស់​ផ្សារ​អាជីវករ​​ និង​ប្រជាពលរដ្ឋ​ដែល​កំពុង​យក​ចំណី​ផ្លូវ​ ដើម្បី​ធ្វើ​អាជីវកម្ម​ទាំងអស់​ត្រូវ​​អនុវត្តតាម​ខ្លឹមសារ​សេចក្តី​ជូនដំណឹង​​នេះ​ ដោយ​ទុក​រយៈពេល​ ១៤ ​ថ្ងៃ ចាប់ពី​ថ្ងៃ​ទី​ ២៤ ខែមិថុនា ដល់​ថ្ងៃទី​ ៧ ខែកក្កដា ឆ្នាំ​ ២០២១ ​ជា​កំហិត​»​។

ក្រៅពីនេះ រដ្ឋបាល​ក្រុង​ព្រមាន​ថា​៖ «​ផុត​រយៈ​ពេលនេះ​រដ្ឋបាល​ក្រុង​ប៉ោយប៉ែត​នឹង​ចាត់វិធានការ​រដ្ឋបាល​ដោយ​ពុំ​ទទួល​ខុសត្រូវ​រាល់​ការខូចខាត ឬ​បាត់បង់​ណាមួយ​ឡើយ​»​។

លោក គាត ហ៊ុល អភិបាលក្រុង​ប៉ោយប៉ែត​បានបញ្ជាក់​បន្ថែម​កាលពី​ម្សិលមិញ​ថា ជាទូទៅ​ពលរដ្ឋ​នៅ​​ក្រុង​ប៉ោយប៉ែត​បាន​ធ្វើ​សំយាប​ថ្មី​ចូល​មកលើ​ចំណីផ្លូវ​សាធារណៈ​​ហើយ​ប្រកបរបរ​លក់ដូរ​នៅតាម​ទីសាធារណៈ​នោះ​។ ចំណែក​ទីប្រជុំជន​តាម​ផ្សារ​មួយចំនួន​គឺ​មាន​ការលក់ដូរ និង​ធ្វើ​សំយាប​ចូលមក​លើ​ចំណីផ្លូវ​ច្រើន​ដែល​នាំឱ្យ​មាន​ការស្ទះចរាចរណ៍ និង​ប៉ះពាល់​ដល់​សោភណភាព​ទីក្រុង​។

លោក​បាន​ថ្លែងថា​៖ «​សាលាក្រុង​យើង​ជូនដំណឹង​ដល់​ពួកគាត់​ឱ្យ​ថយ​ចេញពី​ចំណីផ្លូវ រុះរើ​សំយាប​ដែល​ធ្វើ​ចូល​មកលើ​ចំណីផ្លូវ​សាធារណៈ​ចេញ​ ដើម្បី​រក្សា​នូវ​សោភណភាព​ទីក្រុង រក្សា​នូវ​អនាម័យ​បរិស្ថាន និង​បញ្ចៀស​ការកកស្ទះ​ចរាចរណ៍​ផងដែរ​»​។

លោក​អភិបាលក្រុង​បានឱ្យ​ដឹងថា រដ្ឋបាល​ក្រុង​ជូនដំណឹង​ឱ្យ​រុះរើ​សំណង់​តូប សំយាប ដែល​សាងសង់​ចូល​​មក ចំណីផ្លូវ ឬ​ទីសាធារណៈ ក៏​ដើម្បី​បញ្ចៀស​ផល​លំបាក​ទៅ​ថ្ងៃមុខ​នៅពេល​មានការ​អភិវឌ្ឍ​ក្រុង ពង្រីក​ផ្លូវ ចៀសវាង​ការប៉ះពាល់​ជាមួយ​ប្រជាពលរដ្ឋ​។

លោក ស៊ុំ ចន្ទគា មន្ដ្រី​សម្របសម្រួល សមាគម​ការពារ​សិទ្ធិមនុស្ស​អាដហុក​ប្រចាំ​ខេត្ដ​បន្ទាយមានជ័យ​គាំទ្រ​ចំពោះ​ការរៀបចំ​ហេដ្ឋារចនាសម្ព័ន្ធ​សណ្ដាប់ធ្នាប់ និង​សោភណភាព​ទីក្រុង​ឱ្យបាន​ស្អាត ព្រោះ​ប្រទេស​ជាតិ​កំពុងស្ថិត​នៅក្នុង​ពេល​អភិវឌ្ឍ​។ ប៉ុន្ដែ​លោក​ស្នើឱ្យ​អាជ្ញាធរ​ពិនិត្យ​ឱ្យបាន​ហ្មត់ចត់​ចំពោះ​ការអនុវត្ដ​ច្បាប់​ ដើម្បី​កុំឱ្យ​មាន​ការប៉ះពាល់​ដល់​សិទ្ធិ​រស់រាន​មាន​ជីវិត​របស់​ពលរដ្ឋ​។

លោក​បាន​ថ្លែងថា​៖ «​ប្រទេសមួយ​ត្រូវការ​រៀបចំ​ទីក្រុង​ឱ្យបាន​ស្អាត ត្រូវមាន​ផ្លូវ និង​ហេដ្ឋារចនាសម្ព័ន្ធ​នានា​ជាច្រើន​ទៀត​ ដើម្បី​កុំឱ្យ​ទីក្រុង​មួយ​ក្លាយជា​ទីក្រុង​អនាធិបតេយ្យ​គ្មាន​សណ្ដាប់ធ្នាប់​។ ​ប៉ុន្ដែ​ការរៀបចំ​នេះ តើ​អាជ្ញាធរ​រៀបចំ​នៅពេល​ណា ក្រោយពេល​ពលរដ្ឋ​មក​រស់​លើ​ទីតាំង​នោះ​​រយៈពេល​ប៉ុន្មាន​ឆ្នាំ​? អាជ្ញាធរ​ត្រូវ​ពិនិត្យមើល​លើ​ចំណុច​ទាំងនេះ​ដើម្បី​កុំឱ្យ​មាន​ការប៉ះពាល់​ដល់​ពលរដ្ឋ​ដែល​រស់នៅ​ច្រើន​ឆ្នាំ​។ បើ​គាត់​ជា​​ពលរដ្ឋ​រស់នៅ​ជាក់ស្ដែង​ច្រើន​ឆ្នាំ តើ​អាជ្ញាធរ​មាន​គោលនយោបាយ​បែបណា​ក្នុង​ការប៉ះប៉ូវ​ដល់​ពួកគាត់​»៕