.jpg)
ពលរដ្ឋក្នុងតំបន់អង្គរពេលបំពេញឯកសារសុំជួសជុលផ្ទះនៅក្នុងឆ្នាំនេះ។ រូបថត អាជ្ញាធរជាតិអប្សរា
សៀមរាបៈ អាជ្ញាធរជាតិអប្សរាបានឱ្យដឹងថា នៅក្នុងឆមាសទី ១ ឆ្នាំ ២០២១ នេះ ក្រុមការងារសហគមន៍អាជ្ញាធរជាតិអប្សរាបានអនុញ្ញាតឱ្យពលរដ្ឋក្នុងតំបន់អង្គរជួសជុលផ្ទះ និងសាងសង់សំណង់ស្រាលជាង ៨០០ ករណី ខណៈដែលសំណើជិត ១ ៤០០ ករណី ត្រូវបានចុះពិនិត្យ។
អាជ្ញាធរជាតិអប្សរាបានសរសេរនៅលើទំព័រហ្វេសប៊ុករបស់ខ្លួនកាលពីថ្ងៃទី ២៣ មិថុនាថា ករណីអនុញ្ញាតទាំងនោះរួមមាន នៅស្រុកប្រាសាទបាគង បានចំនួន ១១៩ ករណី ស្រុកអង្គរធំ បានចំនួន ២១៣ ករណី ស្រុកពួកបានចំនួន ១២០ ករណី ក្រុងសៀមរាបបានចំនួន ១៩១ ករណី និងស្រុកបន្ទាយស្រីបានចំនួន ១៩៣ ករណី ខណៈអ្នកនៅក្រៅឧទ្យានអង្គរក្រុមការងារបានអនុញ្ញាតចំនួន ២៩ សំណើ។
អាជ្ញាធរនេះបានបញ្ជាក់ថា៖ «លទ្ធផលការងាររបស់ក្រុមការងារសហគមន៍នៃអាជ្ញាធរជាតិអប្សរាប្រចាំឆមាសទី ១ ក្នុងឆ្នាំ ២០២១ ដែលបានចុះផ្សព្វផ្សាយអប់រំ និងចុះពិនិត្យការស្នើសុំអនុញ្ញាតការជួសជុល និងសាងសង់តូចតាចទាំង ៥ គោលដៅស្រុក/ក្រុង ក្នុងតំបន់ឧទ្យានអង្គរ និងក្រៅតំបន់ឧទ្យានអង្គរបានចំនួន ១ ៣៩៩ សំណើ ដែលក្នុងនោះបានអនុញ្ញាតជូនប្រជាពលរដ្ឋចំនួន ៨៦៥ សំណើ»។
ក្រៅពីផ្តល់ការអនុញ្ញាតនេះ ក្រុមការងារសហគមន៍អាជ្ញាធរជាតិអប្សរាក៏បានចូលរួមក្នុងការងារមនុស្សធម៌ និងកិច្ចការសាសនា ដូចជា ជួយឧបត្ថម្ភថវិកា និងសម្ភារប្រើប្រាស់ដល់ចាស់ជរា ជនពិការ កុមារមានជំងឺ គ្រួសារខ្វះខាតមួយចំនួន និងចូលរួមក្នុងកម្មវិធីផ្សេងៗនៅក្នុងសហគមន៍ រួមទាំងសំណេះសំណាលដល់ខ្នងផ្ទះប្រជាពលរដ្ឋ ដោយបានដោះស្រាយសំណើតាមភូមិទាំង ១១២ ភូមិក្នុងតំបន់អង្គរ និងក្រៅតំបន់អង្គរផងដែរ។
អាជ្ញាធរជាតិអប្សរាបានសង្កត់ធ្ងន់ថា «គោលដៅបន្ត ក្រុមការងារសហគមន៍នៃអាជ្ញាធរជាតិអប្សរានឹងបន្តផ្សព្វផ្សាយ អប់រំប្រជាពលរដ្ឋឱ្យយល់កាន់តែច្បាស់ពីតួនាទី ភារកិច្ចរបស់អាជ្ញាធរជាតិអប្សរា ការប្រើប្រាស់ដីធ្លីក្នុងតំបន់ការពារនៃរមណីយដ្ឋានអង្គរ នីតិវិធីនៃការដាក់ពាក្យស្នើសុំជួសជុល និងសាងសង់ផ្ទះក្នុងឧទ្យានអង្គរឱ្យកាន់តែមានប្រសិទ្ធភាព ទាន់ពេលវេលា»។
លោក ឡុង កុសល អ្នកនាំពាក្យអាជ្ញាធរជាតិអប្សរាបានថ្លែងថា យោងតាមច្បាប់ ប្រជាពលរដ្ឋ ដែលមានលំនៅឋានរស់នៅយូរលង់មកហើយ ក្នុងតំបន់ការពារទី ១ និងទី ២ នៃឧទ្យានអង្គរអាចបន្ដរស់នៅតទៅទៀតបានដោយមិនមានការដេញឱ្យចាកចេញពីភូមិឋានឡើយ។
លោកបន្តថា ចំពោះអ្នកភូមិទាំងនោះ គឺអាចរុះរើ ជួសជុល ផ្ទះចាស់ទ្រុឌទ្រោម ដើម្បីសាងសង់ផ្ទះថ្មីជំនួសផ្ទះចាស់បាន ដោយមានការអនុញ្ញាតពីអាជ្ញាធរអប្សរា ហើយរាល់ការស្នើសុំច្បាប់ជួសជុល គឺពុំមានការបង់ប្រាក់ទេ។ ក៏ប៉ុន្តែលោកអះអាងថា រាល់ការសាងសង់ផ្ទះថ្មីត្រូវបានហាមដាច់ខាត។
លោកបានបញ្ជាក់ថា៖ «មកទល់ពេលនេះ គឺល្អ ព្រោះប្រជាពលរដ្ឋ គាត់ដាក់ពាក្យស្នើសុំតាមសម្រួល និងតាមនីតិវិធីច្បាប់ ដោយមានការយល់ដឹងស៊ីជម្រៅ។ ចំពោះការស្នើសុំនេះ គឺយើងទទួលបានត្រឹមត្រូវ ព្រោះយើងមានក្រុមការងារ ដើម្បីតាមដានករណីនេះ ប៉ុន្តែនៅតែមានអ្នកល្មើសលួចសង់សំណង់អ៊ីចឹង គ្រាន់តែក្រុមការងារយើងចុះហាមឃាត់ និងរុះរើភ្លាមៗតាមគោលការណ៍ច្បាប់»។
បើតាមលោក ឡុង កុសល ក្នុងពេលបច្ចុប្បន្នសំណង់លំនៅឋានក្នុងតំបន់អង្គរគឺមានលក្ខណៈកើតឡើងច្រើនជាងមុន ដោយសារពលរដ្ឋ ដែលកំពុងរស់នៅក្នុងតំបន់អង្គរ មានកំណើនច្រើន ខណៈដែលអាជ្ញាធរជាតិអប្សរាកំពុងស្រង់ស្ថិតិដើម្បីធ្វើបច្ចុប្បន្នភាព៕
