ភ្នំពេញៈ រាជរដ្ឋាភិបាលកម្ពុជា បានចំណាយថវិកាជាង ៣៥០ លានដុល្លារ ក្នុងការឧបត្ថម្ភសាច់ប្រាក់ ជូនប្រជាជនក្រីក្រ និងជនងាយរងគ្រោះ ដោយវិបត្តិកូវីដ១៩ ជាង ២លាននាក់ ក្នុងរយៈពេល ១ ឆ្នាំ។
ប្រធាននាយកដ្ឋានសុខុមាលភាពសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា លោក ឈួរ សុបញ្ញា បានឱ្យដឹងនៅថ្ងៃទី២៥ មិថុនានេះថា រយៈពេល ១ ឆ្នាំ រដ្ឋាភិបាលបានចំណាយថវិការដ្ឋជាង ៣៥១,៧៧ លានដុល្លារ សម្រាប់គ្រួសារក្រីក្រចំនួនប្រមាណ ជិត៧០ម៉ឺន គ្រួសារ ឬប្រជាជនក្រីក្រចំនួនប្រមាណ ជាង ២,៧លាននាក់។
លោកបន្តថា ការចំណាយនេះ ធ្វើឡើងតាមរយៈការអន្តរាគមន៍ក្នុងការអនុវត្តកម្មវិធីឧបត្ថម្ភសាច់ប្រាក់ជូនប្រជាជនក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ១៩ ចាប់ពីថ្ងៃទី២៥ ខែមិថុនា ឆ្នាំ ២០២០ ដល់ថ្ងៃទី២៤ ខែមិថុនា ឆ្នាំ ២០២១។
លោក ឈួរ សុបញ្ញា បានឱ្យដឹងថា សម្រាប់ការឧបត្ថម្ភដល់ជនក្រីក្រត្រូវបានចែកចេញជា ៣ ប្រភេទ គឺជនក្រីក្រនៅទីប្រជុំជន ក្នុងរាជធានីភ្នំពេញ ជនក្រីក្រនៅទីប្រជុំជនក្រៅរាជធានីភ្នំពេញ និងជនក្រីក្រនៅជនបទ។ ចំណែកគ្រួសារនីមួយៗទទួលបានសាច់ប្រាក់ទៅតាមទំហំគ្រួសារ។
អ្នកស្រី សេង គីមលី អាយុ ៥៣ ឆ្នាំ រស់នៅខណ្ឌមានជ័យ រាជធានីភ្នំពេញ ជាអ្នករងគ្រោះក្នុងចំណោមអ្នករងគ្រោះដោយសារវិបត្តិកូវីដ ១៩ ផ្សេងទៀត បានថ្លែងថា ថវិកាដែលរដ្ឋាភិបាលបានផ្តល់នេះ ពិតជាបានជួយរំលែកការលំបាកក្នុងគ្រួសារសម្រាប់ជីវភាពប្រចាំថ្ងៃ។
អ្នកស្រីថា៖ «រដ្ឋាភិបាល់ផ្តល់ជំនួយផ្នែកកូវីដនេះ ខ្ញុំអរខ្លាំងណាស់ ពីមុនខ្វះមុខខ្វះក្រោយ ដល់ពេលបានលុយនេះមកជួយសម្រាលបន្ទុកខ្លះ បង់ភ្លើង ទឹក ទិញម្ហូបខ្លះ»៕
វីដេអូ៖