ភ្នំពេញៈ គិតចាប់តាំងពីថ្ងៃទី ១០ ខែកុម្ភៈឆ្នាំ ២០២១ រហូតមកដល់ត្រឹមថ្ងៃទី ២៤ ខែមិថុនា ឆ្នាំ ២០២១ កម្ពុជាបានចាក់វ៉ាក់សាំងជូនពលរដ្ឋសរុបទូទាំងប្រទេសបានចំនួន ៣ ៧១៥ ៧៥១ នាក់ស្មើនឹង ៣៧,១៦% ក្នុងចំណោមគោលដៅដែលត្រូវចាក់ ១០ លាននាក់។ នេះបើតាមរបាយការណ៍អ្នកចាក់វ៉ាក់សាំងបង្ការជំងឺកូវីដ ១៩ ទូទាំងប្រទេស (រួមទាំងក្រសួងការពារពារជាតិ) ។
របាយការណ៍ ដែលរៀបរៀងដោយអនុគណៈកម្មការ តាមដាន និងវាយតម្លៃនៃគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសចេញនៅថ្ងៃទី ២៤ ខែមិថុនា ក៏បានឱ្យដឹងដែរថា ក្រៅពីនេះមានអ្នកដែលត្រូវគ្រូពេទ្យ មិនអនុញ្ញាតឱ្យចាក់វ៉ាក់សាំង ដោយសារបញ្ហាសុខភាពមានចំនួន ៥៨ ០៣៣ នាក់ (ស្រី ២៩ ៣៩១ នាក់)។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ ១៩ ក្នុងក្របខ័ណ្ឌទូទាំងប្រទេសបានថ្លែងកាលពីថ្ងៃទី ២២ ខែមិថុនា ថា៖ «ប្រហែលជា ១ សប្តាហ៍ទៀត យើងនឹងមានប្រជាពលរដ្ឋចំនួន ៤ លាននាក់ទទួលបានការចាក់វ៉ាក់សាំង។ វ៉ាក់សាំងមានអត្ថប្រយោជន៍ក្នុងការជួយជីវិតមនុស្ស។ ចាក់វ៉ាក់សាំងនៅពេលនេះ ដើម្បីការពារជំងឺធ្ងន់ធ្ងរ និងអាចកាត់បន្ថយបាននូវអត្រាមរណភាព ដោយសារវីរុសកូវីដ ១៩ បាន»។
លោកស្រីបានគូសបញ្ជាក់ទៀតថា ប្រសិនបើការវាយលុករបស់វីរុសកូវីដ ១៩ លឿន ហើយការចាក់វ៉ាក់សាំងមិនបានលឿន នោះវាមិនស៊ីគ្នាទេ «ដូចនេះយើងត្រូវធ្វើយ៉ាងណា ដើម្បីឱ្យការចាក់វ៉ាក់សាំងរបស់យើងឱ្យបានលឿនដែរ»៕