ភ្នំពេញៈ ក្នុងទិវាអន្តរជាតិប្រយុទ្ធប្រឆាំងគ្រឿងញៀននៅថ្ងៃទី ២៥ ខែមិថុនានេះ លោកនាយករដ្ឋមន្ត្រី ហ៊ុន សែន ណែនាំឱ្យមន្ត្រីក្រោមឱវាទរបស់លោក ពង្រឹងកិច្ចសហប្រតិបត្តិការអន្តរជាតិបន្ថែមទៀត ដើម្បីទប់ស្កាត់ការចរាចរ គ្រឿងញៀន ចូលមកក្នុងប្រទេសឱ្យមានប្រសិទ្ធភាព ខណៈលោកទទួលស្គាល់ថា គ្រឿងញៀននៅតែជាបញ្ហាគំរាមកំហែងដល់ការអភិវឌ្ឍប្រទេសជាតិ។
លោក ហ៊ុន សែន បានថ្លែងតាមរយៈសារលិខិត ដើម្បីអបអរទិវានេះថា៖ «ក្រសួងស្ថាប័ន និងអង្គភាពពាក់ព័ន្ធទាំងអស់ ត្រូវបន្តយកចិត្តទុកដាក់ក្នុងការពង្រឹង និងពង្រីកបន្ថែម ឱ្យបានទូលំទូលាយនូវកិច្ចសហប្រតិបត្តិការអន្តរជាតិ ទាំងក្នុងក្របខ័ណ្ឌទ្វេភាគី ពហុភាគីតំបន់ និងជាសកល ដើម្បីទប់ស្កាត់ ការចរាចរជួញដូរ គ្រឿងញៀនខុសច្បាប់ឱ្យកាន់តែមានប្រសិទ្ធភាពខ្ពស់»។
លោក ហ៊ុន សែន ក៏អំពាវនាវដល់អ្នកពាក់ព័ន្ធនានាសូមឱ្យបន្តចូលរួមគាំទ្រ និងឧបត្ថម្ភឱ្យបានកាន់តែសកម្មថែមទៀត ដើម្បីបង្ការទប់ស្កាត់ និងដោះស្រាយនូវរាល់បញ្ហាគ្រឿងញៀន ដែលអាចកើតមាននៅក្នុងសហគមន៍។
លោកក៏បានអំពាវនាវដល់មាតាបិតា និងអាណាព្យាបាលសូមបន្តយកចិត្តទុកដាក់ថែទាំ និងអប់រំកូនចៅឱ្យបានល្អ ដើម្បីកុំឱ្យមានការពាក់ព័ន្ធនឹងបញ្ហាគ្រឿងញៀន កុំឱ្យឆ្លងជំងឺកូវីដ ១៩ និងចៀសឱ្យផុតពីបញ្ហាអវិជ្ជមានផ្សេងៗនៅក្នុងសង្គម។
លោក ហ៊ុន សែន បញ្ជាក់ថា៖ «ក្នុងករណីដឹងថា កូនចៅរបស់ខ្លួនជាប់ពាក់ព័ន្ធនឹងបញ្ហាទាំងនេះត្រូវយកចិត្តទុកដាក់ផ្តល់កិច្ចសហការ ឬរាយការណ៍ជូនអាជ្ញាធរមូលដ្ឋាន ឬសមត្ថកិច្ចជំនាញដើម្បីសុំកិច្ចអន្តរាគមន៍ ដោយមិនត្រូវព្យាយាមលាក់បាំង ឬរក្សាទុកដែលអាចបង្កគ្រោះថ្នាក់ និងភាពឈឺចាប់កាន់តែធ្ងន់ធ្ងរដល់ខ្លួនគាត់ផ្ទាល់ ក្រុមគ្រួសារ អ្នកដទៃ និងសហគមន៍ទាំងមូលឡើយ»។
លោកបន្តថា៖ «បញ្ហាគ្រឿងញៀន នៅតែជាបញ្ហាសង្គមដ៏ស្មុគស្មាញមួយ ដែលបានគំរាមកំហែងដល់សុខភាព សាធារណៈសន្តិសុខសណ្តាប់ធ្នាប់សាធារណៈ និងការអភិវឌ្ឍសង្គមរបស់យើង»។
បើតាមសារលិខិតរបស់លោក ហ៊ុន សែន បទល្មើសគ្រឿងញៀនចំនួន ១០ ៤៦១ ករណី ត្រូវបានបង្ក្រាបក្នុងឆ្នាំ ២០២០ គឺបង្ក្រាប បានច្រើនជាងឆ្នាំ ២០១៩ ប្រមាណ ៦,៧៩%។
ជនសង្ស័យដែលពាក់ព័ន្ធនឹងបទល្មើសគ្រឿងញៀនចំនួន ២១ ៥៦៦ នាក់ ត្រូវបានឃាត់ខ្លួន គឺច្រើនជាងឆ្នាំ ២០១៩ ប្រមាណ ៥,២៥% និងចាប់យកគ្រឿងញៀនគ្រប់ប្រភេទបានជាង ៣ ៨៧៥ គីឡូក្រាម ដែលបរិមាណនេះ មានការកើនឡើងប្រមាណ ៥១៦% បើប្រៀបធៀបទៅនឹងបរិមាណដែលចាប់យកបានក្នុងឆ្នាំ ២០១៩៕