ភ្នំពេញ៖ ក្រសួងកសិកម្មតាមរយៈគម្រោងផ្សព្វផ្សាយបច្ចេកទេសកសិកម្មថ្មីដែលធន់ទៅនឹងការប្រែប្រួលអាកាសធាតុ (ASPIRE) និងក្រុមហ៊ុន BRONX Technology បានដាក់ឲ្យដំណើរការកម្មវិធីទូរស័ព្ទ ចម្ការ (Chamka App) ក្នុង ១៥ រាជធានី-ខេត្ត ដែលមានអ្នកប្រើប្រាស់ប្រមាណ ៤៣ ០០០ នាក់ ដើម្បីផ្តល់ជំនួយបច្ចេកទេសផ្សេងៗ ហើយកសិករក៏អាចដាក់លក់ទិន្នផលកសិកម្មរបស់ខ្លួនបានផងដែរ។
កម្មវិធី Chamka ផ្តល់ជូននូវមុខងារជាច្រើនសម្រាប់កសិករ។ វាដើរតួជាទីផ្សារអេឡិចត្រូនិក ដែលអាចឱ្យអ្នកផ្គត់ផ្គង់អាចផ្សព្វផ្សាយអំពីទំនិញធាតុចូលកសិកម្ម និងកសិករអាចដាក់លក់ទិន្នផលកសិកម្មរបស់ពួកគេ។
សេចក្តីប្រកាសព័ត៌មានរបស់អង្គការ Swisscontact បញ្ជាក់នៅថ្ងៃទី ២៥ ខែមិថុនាថា រហូតមកដល់ពេលនេះ មានអ្នកជំនាញបច្ចេកទេសចំនួន ៦ នាក់ សម្រាប់ផ្តល់ជាជំនួយបច្ចេកទេសដល់កសិករ និងមានអ្នកផ្គត់ផ្គង់ទំនិញធាតុចូលកសិកម្មចំនួន ៣០ រួចមកហើយ លើកម្មវិធីចម្ការនេះ។
ថ្លែងក្នុងសិក្ខាសាលាតាមអនឡាញស្តីពីការវាយតម្លៃបច្ចេកទេសគមនាគមន៍ និងព័ត៌មានសម្រាប់កសិករខ្នាតតូច កាលពីថ្ងៃទី ២៣ ខែមិថុនា ដែលមានការណែនាំអ្នកចូលរួមឱ្យស្គាល់ពីកម្មវិធីទូរស័ព្ទចម្ការដែរនោះ លោក Rajiv Pradhan នាយកនៃអង្គការ Swisscontact ប្រចាំប្រទេសកម្ពុជា បានបញ្ជាក់ថា កម្មវិធី ChamkaApp ដែលជាដំណោះស្រាយថ្មីមួយ ប្រកបដោយភាពច្នៃប្រឌិត ចំពោះកសិករខ្នាតតូចក្នុងការទទួលបានព័ត៌មានបច្ចេកទេស និងទទួលបានជំនួយបច្ចេកទេសពីអ្នកជំនាញកសិកម្មនៅពេលដែលពួកគេ មានបញ្ហាចំពោះការងារកសិកម្មប្រចាំថ្ងៃរបស់ពួកគេ។
លោក VisalKith ជានាយកប្រតិបតិ្តនៃក្រុមហ៊ុន Bronx Technology ថ្លែងក្នុងសិក្ខាសាលានេះថា កម្មវិធី ChamkaApp ផ្តល់អត្ថប្រយោជន៍សំខាន់នៃបច្ចេកវិទ្យាក្នុងការលើកកម្ពស់វិស័យកសិកម្មនៅក្នុងប្រទេស ដែលវាបានអនុញ្ញាតឱ្យកសិករស្វែងរកជំនួយបច្ចេកទេសដោយផ្ទាល់ពីអ្នកជំនាញកសិកម្មសម្រាប់ការធ្វើកសិកម្មរបស់ពួកគេ។
លោកថ្លែងថា៖ «កម្មវិធី ChamkaApp គឺកាន់តែមានសារៈប្រយោជន៍នៅកំឡុងពេលនៃការរាតត្បាតជំងឺកូវីដ ១៩ ព្រោះថា កសិករនៅតែអាចទាក់ទងជាមួយអ្នកជំនាញបានតាមរយៈកម្មវិធី ChamkaApp»។
កម្មវិធីទូរស័ព្ទចម្ការ គឺជាកម្មវិធីសូហ្វវែរ (Software) មួយដែលដំណើរការនៅលើទូរស័ព្ទដៃឆ្លាតវៃគ្រប់ប្រភេទ។
កម្មវិធីនេះ ផ្ដល់នូវចំណេះដឹងអំពីការធ្វើកសិកម្ម និងសេវាប្រឹក្សាយោបល់ពីអ្នកជំនាញបច្ចេកទេសកសិកម្មដល់កសិករខ្នាតតូច។
កម្មវិធីចម្ការនេះ ក៏ជាទីផ្សារអេឡិចត្រូនិកដែលកសិករខ្នាតតូចអាចភ្ជាប់ទំនាក់ទំនងជាមួយរវាងអ្នកផ្គត់ផ្គង់ និងអ្នកទិញ ដើម្បីអាចធ្វើការលក់ និងទិញទំនិញធាតុចូល និងទិន្នផលកសិកម្មបាន៕