.jpg)
គបផក អំពាវនាវដល់អ្នកដែលបានទិញអាល់កុលជាង ៧ ម៉ឺនលីត្រ បញ្ឈប់ការចែកចាយ និងប្រើប្រាស់ព្រោះជាអាល់កុលក្លែងក្លាយ។ រូបថត គបផក
ភ្នំពេញៈ គណៈកម្មាធិការប្រយុទ្ធប្រឆាំងផលិតផលក្លែងក្លាយ (គបផក) នៃក្រសួងមហាផ្ទៃអំពាវដល់អ្នកដែលបានទិញអាល់កុលជាង ៧ ម៉ឺនលីត្រ ឱ្យបញ្ឈប់ការចែកចាយ និងបញ្ឈប់ប្រើប្រាស់ជាបន្ទាន់ ព្រោះវាជាអាល់កុលក្លែងក្លាយ ដែលមានសារធាតុមេតាណុលលើសកម្រិត ដែលធ្វើឱ្យប៉ះពាល់ដល់សុខភាពអ្នកប្រើប្រាស់។
គបផក បានឱ្យដឹងនៅថ្ងៃទី ២៥ ខែមិថុនានេះ តាមរយៈសេចក្តីជូនដំណឹងថា អាល់កុលក្លែងក្លាយដែលប្រើសារធាតុមេតាណុលលើសកម្រិត ចំនួន ៧៤ ០៦០ លីត្រ ដែល គបផក បានធ្វើការបង្ក្រាបនៅទីតាំងស្ថិតនៅភូមិព្រែក ទាល់១ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញកាលពីថ្ងៃទី ០១ ខែមិថុនា គឺជាប្រភេទអាល់កុលក្លែងក្លាយ ដែលបង្កផលប៉ះពាល់ដល់សុខភាពអ្នកប្រើប្រាស់ គ្មានគុណប្រយោជន៍ខាងផ្លូវវេជ្ជសាស្ត្រ សម្រាប់សម្លាប់មេរោគផ្សេងៗ ជាពិសេសមេរោគកូវីដ ១៩ អ្វីទាំងអស់ និងពុំមានច្បាប់អនុញ្ញាតពីក្រសួង ស្ថាប័នមានសមត្ថកិច្ចពាក់ព័ន្ធឡើយ។
គបផក បញ្ជាក់ថា៖ «ដូចនេះដើម្បីធានាសុវត្ថិភាពអ្នកប្រើប្រាស់ ក៏ដូចជាទប់ស្កាត់ការចរាចរអាល់កុលក្លែងក្លាយ ដែលប៉ះពាល់ដល់សុខភាពប្រជាពលរដ្ឋ និងដើម្បីអនុវត្តតាមនីតិវិធីតុលាការ គណៈកម្មាធិការ សូមជម្រាបជូនដល់មន្ទីរពេទ្យ គ្រឹះស្ថានឱសថស្ថាន ឱសថស្ថានរង ទីកន្លែងប្រកបអាជីវកម្មនានា និងសាធារណជន ដែលបានបញ្ជាទិញអាល់កុលក្លែងក្លាយពីទីតាំងខាងលើ បញ្ឈប់ការចែកចាយ និងប្រើប្រាស់អាល់កុលក្លែងក្លាយទាំងនេះជាបន្ទាន់»។
លើសពីនេះ គបផក ក៏បានអំពាវនាវដល់អ្នកដែលបានទិញអាល់កុលក្លែងក្លាយទាំងនេះសូមប្រគល់ជូន គបផក ដែលស្ថិតក្នុងក្រសួងមហាផ្ទៃ (អគារ H) ក្នុងអំឡុងពេល ១ សប្តាហ៍ចាប់ពីថ្ងៃជូនដំណឹងនេះ ដើម្បីយកទៅកម្ទេចចោលតាមនីតិវិធីតុលាការ៕
វីដេអូ៖
