ភ្នំពេញៈ រដ្ឋបាលរាជធានីភ្នំពេញ បានរំឭកដល់ពលរដ្ឋរស់នៅរាជធានីភ្នំពេញដែលមានអាយុចាប់ពី ១៨ ឆ្នាំឡើងទៅ ហើយមិនទាន់បានចាក់វ៉ាក់សាំងបង្ការជំងឺកូវីដ ១៩ ត្រូវប្រញាប់រួសរាន់មកចាក់ចាប់ពីថ្ងៃទី ២៧ មិថុនាទៅ ខណៈកាលបរិច្ឆេទនៃការចាក់ចុងក្រោយគ្រោងនឹងបិទបញ្ចប់នៅសប្ដាហ៍ទី ១ ខែក្រោយ។
យោងតាមសេចក្ដីជូនដំណឹងរបស់រដ្ឋបាលរាជធានីកាលពីម្សិលមិញ បានលើកឡើងថា យុទ្ធនាការនៃការចាក់វ៉ាក់សាំងនៅរាជធានីភ្នំពេញដែលមានកិច្ចសហការពីក្រុមគ្រូពេទ្យនៃកងយោធពលខេមរភូមិន្ទក្រសួងការពារជាតិ,ក្រុមគ្រូពេទ្យស្ម័គ្រចិត្តសម្ដេចតេជា (TYDA), ក្រុមគ្រូពេទ្យស្ម័គ្រចិត្តលោក ទៀ បាញ់, ក្រុមគ្រូពេទ្យស្ម័គ្រចិត្ត ស.ស.យ.ក. និងក្រុមគ្រូពេទ្យស្ម័គ្រចិត្តផ្សេងទៀតបានដំណើរការទៅយ៉ាងរលូន។
សេចក្ដីជូនដំណឹងនេះបានឱ្យដឹងថាមានពលរដ្ឋអាយុចាប់ពី ១៨ ឡើងទៅបានចូលរួមចាក់វ៉ាក់សាំងយ៉ាងសស្រោកសស្រាំតាមគោលដៅនៃខណ្ឌនីមួយៗ ដែលគិតមកទល់ថ្ងៃទី ២៣ មិថុនាគឺមានពលរដ្ឋនៅក្នុងរាជធានីចំនួន ១ ៦៦២ ៣៥៦ នាក់ បានចាស់ដូសទី ១ និងចំនួន ១ ៤៩៨ ៧៨៧ នាក់បានចាក់ដូសទី ២ រួចរាល់។
យ៉ាងណាក្ដី រដ្ឋបាលរាជធានីភ្នំពេញបានបញ្ជាក់ថានៅមានពលរដ្ឋមួយចំនួនតូចមិនទាន់បានមកទទួលវ៉ាក់សាំងនៅឡើយ។ ហេតុដូច្នេះហើយដើម្បីឱ្យដំណើរការចាក់វ៉ាក់សាំងបានជោគជ័យ ១០០ ភាគរយ សាលារាជធានីភ្នំពេញ «សូមអំពាវនាវដល់ប្រជាពលរដ្ឋដែលកំពុងរស់នៅ ស្នាក់នៅ ប្រកបអាជីវកម្មមុខរបរផ្សេងៗនៅក្នុងភូមិសាស្ត្ររាជធានីភ្នំពេញដែលពុំទាន់ទទួលបានការចាក់វ៉ាក់សាំងសូមអញ្ជើញរួសរាន់មកចាក់វ៉ាក់សាំងចាប់ពីថ្ងៃទី ២៧ ខែមិថុនា ដល់ថ្ងៃទី ៨ ខែកក្កដា ឆ្នាំ ២០២១ កុំបីខាន»។
បើតាមរដ្ឋបាលរាជធានីភ្នំពេញ អ្នកមានអាយុពី ១៨ ឆ្នាំឡើងដែលនៅមិនទាន់បានមកចាក់វ៉ាក់សាំងក្នុងខណ្ឌទាំង ១៤ គឺមានសរុបចំនួន ១៩ ៣៩៩ នាក់ ក្នុងនោះខណ្ឌកំបូលមាន ៩៨៧នាក់ ខណ្ឌពោធិ៍សែនជ័យមាន ៤ ៩៨០ នាក់ ខណ្ឌទួលគោកមាន ១ ២៩៧ នាក់ ខណ្ឌ ៧ មករាមាន ៧៥៥ នាក់ ខណ្ឌដូនពេញមាន ៥២១ នាក់ ខណ្ឌបឹងកេងកងមាន ៧០២ នាក់ ខណ្ឌចំការមនមាន ២២២ នាក់ ខណ្ឌដង្កោមាន ១ ៨៨៧ នាក់ ខណ្ឌជ្រោយចង្វារមាន ២ ៥៩០ នាក់ ខណ្ឌឫស្សីកែវមាន ៣០០ នាក់ ខណ្ឌច្បារអំពៅមាន ១ ៨៧៣ នាក់ ខណ្ឌមានជ័យមាន ០ នាក់[ ចាក់អស់] ខណ្ឌ សែនសុខមាន ១ ៧៦១ នាក់ និងខណ្ឌព្រែកព្នៅ ១ ៥២៤ នាក់។
ជាមួយនឹងការអំពាវនាវដល់ពលរដ្ឋដែលមិនទាន់បានទទួលចាក់វ៉ាក់សាំងឱ្យរួសរាន់ទៅចាក់នៅតាមទីតាំងដែលបានកំណត់នៅក្នុងខណ្ឌនីមួយៗ រដ្ឋបាលរាជធានីភ្នំពេញក៏បានក្រើនរំឭកផងដែរថា ក្នុងករណីដែលពលរដ្ឋមានការខកខាន ក្រោយបិទបញ្ចប់នឹងមិនទទួលខុសត្រូវក្នុងការចាក់វ៉ាក់សាំងជូនទៀតឡើយ៕
វីដេអូ៖