​រដ្ឋបាល​ខេត្តកោះកុង ប្រកាស​មោឃភាព និង​ណែនាំ​ឱ្យ​បញ្ឈប់​ជាបន្ទាន់​នូវ​រាល់​ការចុះហត្ថលេខា ឬ​ការបញ្ជាក់​ទទួលស្គាល់​លើ​លិខិត​ប្រើប្រាស់ ឬ​ទិញ​លក់​ដី​រដ្ឋ​

រដ្ឋបាលខេត្តកោះកុង ប្រកាសមោឃភាព និងណែនាំឲ្យបញ្ឈប់ជាបន្ទាន់នូវរាល់ការចុះហត្ថលេខា ឬការបញ្ជាក់ទទួលស្គាល់លើលិខិតប្រើប្រាស់ ឬទិញលក់ដីរដ្ឋ ដែលធ្វើឡើងនៅលើដីក្នុងតំបន់ការពារធម្មជាតិ និងរបៀងអភិរក្សជីវៈចម្រុះក្នុងភូមិសាស្ត្រខេត្តកោះកុង។

ការប្រកាសមោឃភាព និងណែនាំឱ្យបញ្ឈប់ជាបន្ទាន់នូវសកម្មភាពល្មើសទាំងនេះ បន្ទាប់ពីក្រសួងបរិស្ថានបានដាក់លិខិតមួយច្បាប់កាលពីខែឧសភា ឆ្នាំ ២០២១ ពីករណីដែលនៅតែមានការចុះហត្ថលេខាបញ្ជាក់ទទួលស្គាល់លើលិខិតផ្ទេរសិទ្ធិ ពាក្យស្នើសុំកាន់កាប់ ប្រើប្រាស់ដី លិខិតទិញលក់ដីរដ្ឋ ឬការបញ្ជាក់លើប្លង់បង្ហាញទីតាំងដីនៃដីស្ថិតក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ខណៈទង្វើទាំងអស់នេះ គឺជាទង្វើខុសច្បាប់។

រដ្ឋបាលខេត្តកោះកុងបានបញ្ជាក់នៅក្នុងលិខិតរបស់ខ្លួនចុះថ្ងៃទី ២៤ មិថុនាថា៖ «ដើម្បីចូលរួមទប់ស្កាត់ និងបដិសេធចោលនូវអានុភាពនានារបស់ឯកសារខាងលើនេះដែលចុះហត្ថលេខាដោយរដ្ឋបាលឃុំ សង្កាត់, រដ្ឋបាលខេត្តស្នើឱ្យលោកអភិបាលនៃគណៈអភិបាលក្រុង ស្រុក ចាត់វិធានការឱ្យបានម៉ឺងម៉ាត់ក្នុងដែនសមត្ថកិច្ចគ្រប់គ្រងរដ្ឋបាលរបស់ខ្លួន»។

លោកស្រី មិថុនា ភូថង អភិបាលខេត្តកោះកុងបានសង្កត់ធ្ងន់ថា គ្រប់អាជ្ញាធរដែនដីដែលមានសមត្ថកិច្ច ត្រូវបដិសេធ និងមោឃភាព រាល់លិខិត និងឯកសារទាំងឡាយណាដែលមានពាក់ព័ន្ធនឹងការកាន់កាប់ និងការផ្ទេរសិទ្ធិទាំងឡាយលើដីធ្លី ដែលស្ថិតក្នុងតំបន់ការពារធម្មជាតិ និងរបៀងអភិរក្សជីវៈចម្រុះ ដែលរដ្ឋបាលឃុំ សង្កាត់ បានចុះហត្ថលេខាបញ្ជាក់នាពេលកន្លងមក។

ជាងនេះទៅទៀតលោកស្រីក៏បានណែនាំដល់រដ្ឋបាលឃុំ សង្កាត់ ឱ្យបញ្ឈប់ជាបន្ទាន់នូវរាល់ការចុះហត្ថលេខាបញ្ជាក់លើលិខិតស្នើសុំកាន់កាប់ ប្រើប្រាស់ដីធ្លី លិខិតផ្ទេរសិទ្ធិ លិខិតទិញលក់ ឬការបញ្ជាក់លើប្លង់បង្ហាញទីតាំងដី ជាដើម នៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះ។

លោកស្រីបានបញ្ជាក់ថា៖ «ត្រូវផ្ដល់កិច្ចសហការ និងចាត់វិធានការតាមផ្លូវច្បាប់ ចំពោះរដ្ឋបាលឃុំ សង្កាត់ណាដែលនៅតែបន្តចុះ ហត្ថលេខាបញ្ជាក់លើលិខិតផ្ទេរសិទ្ធិ ពាក្យស្នើសុំកាន់កាប់ ប្រើប្រាស់ដីធ្លី លិខិតទិញលក់ ឬការបញ្ជាក់ លើប្លង់បង្ហាញទីតាំងដី ជាដើម នៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះ»៕

វីដេអូ៖

ព័ត៌មានជាតិ

ព័ត៌មានថ្មីៗ

វីដេអូ