ភ្នំពេញៈ ក្រសួងសុខាភិបាលបានចេញសេចក្ដីណែនាំស្ដីពីការតាមដានរោគសញ្ញា និងការថែទាំ ព្យាបាលអ្នកជំងឺកូវីដ ១៩ នៅតាមផ្ទះ និងការអនុវត្តវិធានសុខាភិបាល ដើម្បីឱ្យដំណើរការមានប្រសិទ្ធភាព និងចៀសវាងការចម្លងទៅអ្នកដទៃ ជាពិសេសសមាជិកក្នុងគ្រួសារ។
នៅក្នុងសេចក្ដីណែនាំនេះក្រសួងបានលើកឡើងថា ក្នុងករណីគ្មានរោគសញ្ញា ដូចជា ក្អក កម្ដៅក្រោម ៣៧,៥ អង្សា គ្មានហៀរសំបោរ គ្មានឈឺបំពង់ក និងសភាពទូទៅធម្មតា គឺពុំចាំបាច់ប្រើឱសថព្យាបាលទេ។
ក៏ប៉ុន្តែករណីមានរោគសញ្ញាស្រាល ដូចជា មានកម្ដៅលើស ៣៧,៥ អង្សា មានឈឺសាច់ដុំ មានឈឺបំពងក សម្រាប់មនុស្សពេញវ័យ ឬកុមារដែលមានទម្ងន់ចាប់ពី ៣០ គីឡូក្រាមឡើង ត្រូវប្រើថ្នាំ ប៉ារ៉ាសេតាម៉ុល (Paracetamol ) ៥០០ មិល្លីក្រាម ៣ ដងក្នុង ១ ថ្ងៃ រីឯកុមារទម្ងន់ចាប់ពី ២០ ដល់ ២៩ គីឡូក្រាមត្រូវប្រើប៉ារ៉ាសេតាម៉ុល ៣០០ មិល្លីក្រាម ៣ ដងក្នុង ១ ថ្ងៃ។
ចំពោះករណីមានរោគសញ្ញាបន្ថែមដូចជា តឹងច្រមុះ ឬហៀរសំបោរ ឬក្អក (មាន ឬគ្មានស្លេស) សម្រាប់មនុស្សពេញវ័យ ឬកុមារអាយុចាប់ពី ៦ ឆ្នាំឡើង ត្រូវប្រើថ្នាំប្រូម៉ិចស៊ីន (Bromhexine) ៨ មិល្លីក្រាម ៣ ដងក្នុង ១ ថ្ងៃ ឬថ្នាំ សេទីរីហ្ស៊ីន(Cetirizine) ១០ មិល្លីក្រាម ១ ដងក្នុង ១ ថ្ងៃ។
ដោយឡែកចំពោះវិធានសុខាភិបាលនៅតាមផ្ទះត្រូវអនុវត្តតាមវិធីមួយចំនួនដូចជា ការស្នាក់នៅបន្ទប់ដាច់ដោយឡែក មានអនាម័យស្អាត មានខ្យល់ចេញ-ចូលល្អ,ត្រូវពាក់ម៉ាស់ លាងសម្អាតដៃឱ្យបានញឹកញាប់ជាមួយសាប៊ូ និងទឹក ឬអាល់កុល និងរក្សាគម្លាតយ៉ាងតិច ២ ម៉ែត្រ, បរិភោគអាហារមានជីវជាតិគ្រប់គ្រាន់ (សាច់បន្លែ ផ្លែឈើ) និងពិសាទឹកឱ្យបានច្រើន,តាមដានសុខភាពខ្លួនឯងឱ្យបានញឹកញាប់ទៀងទាត់ជាប្រចាំ,ថែរក្សាសុខភាពផ្លូវចិត្ត និងធ្វើលំហាត់ប្រាណឱ្យបានទៀងទាត់, ហាមជក់បារី ផឹកស្រា និងគ្រឿងស្រវឹងផ្សេង,ប្រើប្រាស់សម្ភារ និងបោកគក់ដាច់ដោយឡែកពីសមាជិកគ្រួសារ និងវេចខ្ចប់សំរាមចោលឱ្យបានត្រឹមត្រូវ និងដាច់ដោយឡែក។
គួរបញ្ជាក់ដែរថា ការណែនាំរបស់ក្រសួងសុខាភិបាលនេះគឺបន្ទាប់ពីលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងប្រយុទ្ធនឹងជំងឺកូវីដ ១៩ បានចេញសេចក្ដីសម្រេចមួយកាលពីយប់ថ្ងៃទី ២០ ខែមិថុនាឆ្នាំ ២០២១ ដោយបានកំណត់ដាក់រាជធានីភ្នំពេញជាតំបន់ដំបូងក្នុងការប្រើនីតិវិធីប្រតិបត្តិស្ដង់ដាសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ ១៩ កម្រិតស្រាលនៅតាមផ្ទះ ចាប់ពីថ្ងៃទី ២០ មិថុនាតទៅ ក៏ប៉ុន្តែសម្រាប់បណ្ដាខេត្តនានានៅមិនទាន់បានសម្រេចនៅឡើយទេ៕
វីដេអូ៖