.jpg)
លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងថ្មី។ រូបថត ក្រសួងព័ត៌មាន
ព្រះមហាក្សត្រ ប្រកាសតែងតាំង លោក ស៊ុន សុវណ្ណារិទ្ធិ ជាអភិបាលខេត្តកំពង់ឆ្នាំងថ្មី ជំនួសឲ្យលោក ឈួរ ច័ន្ទឌឿន ដែលត្រូវបានត្រាស់បង្គាប់តែងតាំងឲ្យក្លាយជាអនុរដ្ឋលេខាធិការនៃក្រសួងអភិវឌ្ឍន៍ជនបទ។
ព្រះរាជក្រឹត្យចំនួន ២ ច្បាប់ដាច់ដោយឡែកពីគ្នា ចុះថ្ងៃទី ២៥ មិថុនា ដែលចុះព្រះហត្ថលេខាដោយសម្ដេចព្រះបរមនាថ នរោត្តម សីហមុនី បានឲ្យដឹងថា៖ «លោក ឈួរ ច័ន្ទឌឿន ត្រូវបានតែងតាំងជាអនុរដ្ឋលេខាធិការនៃក្រសួងអភិវឌ្ឍន៍ជនបទ។ ចំណែកលោក ស៊ុន សុវណ្ណារិទ្ធិ ដែលមានឋានន្តរស័ក្តិឧត្តមមន្ត្រីថ្នាក់លេខ ៥ ជាអភិបាលខេត្តកំពង់ឆ្នាំងថ្មី»។
លោក ឈួរ ច័ន្ទឌឿន អតីតអភិបាលខេត្តកំពង់ឆ្នាំងបានប្រាប់ភ្នំពេញប៉ុស្តិ៍នៅថ្ងៃទី ២៦ មិថុនាថា លោក ពិតជាមោទនភាពក្នុងរយៈពេលដែលលោកបានដឹកនាំខេត្តកំពង់ឆ្នាំង។ លោកសង្ឃឹមជឿជាក់ថា អភិបាលខេត្តថ្មីនឹងបន្តសកម្មភាពក្នុងការដឹកនាំ គ្រប់គ្រងខេត្តកំពង់ឆ្នាំង ឲ្យមានការរីកចម្រើនបន្តទៀត។
លោកបញ្ជាក់ថា៖ «ខ្ញុំពិតជាមានមោទនភាពហើយ ព្រោះរាជរដ្ឋាភិបាល លោកផ្តល់សេចក្តីទុកចិត្តដល់ខ្ញុំឲ្យបំពេញការងារដឹកនាំកំពង់ឆ្នាំងរយៈពេលកន្លងមកនេះ។ ខ្ញុំសប្បាយរីករាយដែលមានកិត្តិយសផ្ទាល់ខ្លួនក្នុងការបំពេញការងារទាំងអស់នេះ»៕
