.jpg)
ដោយសារវិបត្តិជំងឺកូវីដជាសកលបានធ្វើឲ្យលេខាធិការដ្ឋានគណៈកម្មាធិការអាយស៊ីស៊ី-អង្គរ ខកខានរៀបចំកិច្ចប្រជុំឱ្យបានទៀងទាត់ និងពេញលេញ ប៉ុន្តែការរៀបគម្រោងចុះពិនិត្យការដ្ឋានជួសជុលប្រាសាទក្នុងរមណីយដ្ឋានអង្គរគឺនៅបន្ត។ រូបថត ក្រសួងព័ត៌មាន
អាជ្ញាធរជាតិអប្សរា បានឲ្យដឹងថា ដោយសារវិបត្តិជំងឺកូវីដជាសកលបានធ្វើឲ្យលេខាធិការដ្ឋានគណៈកម្មាធិការអាយស៊ីស៊ី-អង្គរ ខកខានរៀបចំកិច្ចប្រជុំឱ្យបានទៀងទាត់ និងពេញលេញ ប៉ុន្តែការរៀបគម្រោងចុះពិនិត្យការដ្ឋានជួសជុលប្រាសាទក្នុងរមណីយដ្ឋានអង្គរគឺនៅបន្ត។
ទំព័រហ្វេសប៊ុករបស់អាជ្ញាធរជាតិអប្សរាបានឱ្យដឹងនៅថ្ងៃទី ២៦ មិថុនាថា ដោយសារវិបត្តិជំងឺកូវីដជាសកលចាប់ពីឆ្នាំ ២០២០ គណៈកម្មាធិការអាយស៊ីស៊ី-អង្គរ បានខកខានរៀបចំកិច្ចប្រជុំឱ្យបានទៀងទាត់ និងពេញលេញនោះទេ។
ស្ថាប័ននេះ បានបន្តថា៖ «ការណ៍នេះបណ្តាលឱ្យមានការរៀបចំកិច្ចប្រជុំតាមរយៈប្រព័ន្ធអេឡិចត្រូនិក ហើយអ្នកជំនាញការចំពោះកិច្ចនៃគណៈកម្មាធិការនេះបានត្រឹមតែពិនិត្យ វាយតម្លៃអំពីការវិវត្តនៃគម្រោងដែលកំពុងអនុវត្តពីចម្ងាយប៉ុណ្ណោះ»។
ដូចគ្នាដែរ អាជ្ញាធរជាតិអប្សរា បានអះអាងថា នៅឆ្នាំ ២០២១ នេះ លេខាធិការដ្ឋានអាយស៊ីស៊ី-អង្គរ បានប្រើយន្តការបន្ថែមទៀត ដើម្បីជួយដោះស្រាយបញ្ហាបន្ទាន់ចំពោះមុខ ទាក់ទងនឹងកិច្ចការមួយចំនួនដែលកំពុងប្រឈមនឹងគ្រោះថ្នាក់។
បន្ថែមពីនេះ ជំនួសឱ្យមានអ្នកជំនាញការចំពោះកិច្ចដែលមានមូលដ្ឋាននៅក្រៅប្រទេសកម្ពុជា លេខាធិការដ្ឋានអាយស៊ីស៊ី-អង្គរ បានអញ្ជើញអ្នកជំនាញការបរទេស ដែលកំពុងជួសជុលនៅតាមការដ្ឋានប្រាសាទនានាក្នុងតំបន់រមណីយដ្ឋានអង្គរ ឱ្យជួយផ្តល់យោបល់ទៅវិញទៅមកជាមួយអ្នកជំនាញរបស់អាជ្ញាធរជាតិអប្សរា ដែលកំពុងបំពេញភារកិច្ចនៅតាមការដ្ឋាននានាជាច្រើនក្នុងរយៈពេលចុងក្រោយនេះ។ នេះបើតាមហ្វេសប៊ុករបស់អាជ្ញាធរមួយនេះ។
សូមបញ្ជាក់ថា លេខាធិការដ្ឋានគណៈកម្មាធិការអាយស៊ីស៊ី-អង្គរ បានចុះពិនិត្យការដ្ឋានក្នុងតំបន់រមណីយដ្ឋានអង្គររយៈពេល ២ ថ្ងៃ គឺថ្ងៃទី ២៤-២៥ ខែមិថុនា ឆ្នាំ ២០២០។ ក្រោយពីការចុះពិនិត្យរួចរាល់ លេខាធិការដ្ឋានគណៈកម្មាធិការអាយស៊ីស៊ី-អង្គរ នឹងត្រូវធ្វើរបាយការណ៍រួម ដើម្បីដាក់ជូនទៅគណៈកម្មាធិការអន្ដរជាតិអាយស៊ីស៊ី-អង្គរ ដើម្បីត្រួតពិនិត្យ និងផ្តល់អនុសាសន៍បន្ត៕
