The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ទទួល​បាន​វ៉ាក់សាំង​បង្ការ​ជំងឺ​កូវីដ ១៩ ចំនួន ១០ លាន​ដូស​ហើយ បូក​ទាំង​វ៉ាក់សាំង​ដែល​ទើប​មកដល់​នៅ​ព្រឹក​នេះ ១ លាន​ដូស

កម្ពុជា​ទទួល​បាន​វ៉ាក់សាំង​បង្ការ​ជំងឺ​កូវីដ ១៩ ចំនួន ១០ លាន​ដូស​ហើយ បូក​ទាំង​វ៉ាក់សាំង​ដែល​ទើប​មកដល់​នៅ​ព្រឹក​នេះ ១ លាន​ដូស

Content image - Phnom Penh Post
កម្ពុជា​ទទួល​បាន​វ៉ាក់សាំង ១០ លាន​ដូស​ហើយ បើ​គិត​បូករួម​ជាមួយ​វ៉ាក់សាំង​ដែល​ទើប​មកដល់​កម្ពុជា​នៅ​ព្រឹក​នេះ ១ លានដូស​ទៀត នៅសល់ ១០ លានដូស​ទៀត​នឹង​មកដល់​កម្ពុជា​ជា​បន្តបន្ទាប់​រហូត​ដល់​គ្រប់ ២០ លាន​ដូស​នៅ​ចុង​ខែ​សីហា​ខាងមុខ​នេះ។ ហេង ជីវ័ន

កម្ពុជា​ទទួល​បាន​វ៉ាក់សាំង​បង្ការ​ជំងឺ​កូវីដ ១៩ ចំនួន ១០ លាន​ដូស​ហើយ បូក​ទាំង​វ៉ាក់សាំង​ដែល​ទើប​មកដល់​នៅ​ព្រឹក​នេះ ១ លាន​ដូស

ភ្នំពេញៈ កម្ពុជា​ទទួល​បាន​វ៉ាក់សាំង ១០ លាន​ដូស​ហើយ បើ​គិត​បូករួម​ជាមួយ​វ៉ាក់សាំង​ដែល​ទើប​មកដល់​កម្ពុជា​នៅ​ព្រឹក​នេះ ១ លានដូស​ទៀត នៅសល់ ១០ លានដូស​ទៀត​នឹង​មកដល់​កម្ពុជា​ជា​បន្តបន្ទាប់​រហូត​ដល់​គ្រប់ ២០ លាន​ដូស​នៅ​ចុង​ខែ​សីហា​ខាងមុខ​នេះ។

លោក វង្ស៊ី វិសុទ្ធ រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ​ថ្លែង​ក្នុង​ឱកាស​ទៅ​ទទួល​វ៉ាក់សាំង ១ លាន​ដូស​បន្ថែមទៀត នៅ​ព្រឹក​ថ្ងៃទី ២៦ ខែមិថុនា​នេះ បានឱ្យ​ដឹងថា កម្ពុជា​ត្រូវការ​វ៉ាក់សាំង ២០ លានដូស​ ដើម្បី​ចាក់​ជូន​ប្រជាពលរដ្ឋ​ចំនួន ១០ លាន​នាក់។ គិត​ត្រឹម​ម៉ោង ១០ ព្រឹក​នេះ កម្ពុជា​ទទួល​បាន​វ៉ាក់សាំង​ចំនួន ១០ លានដូស​ហើយ នៅសល់ ១០ លាន​ដូស​ទៀត​នឹង​បន្ត​មក​នៅ​ខែកក្កដា និង​ខែសីហា​ខាងមុខ។ លោក​បន្ថែមថា នៅ​ព្រឹក​នេះ ក្រៅពី​វ៉ាក់សាំង ១ លានដូស កម្ពុជា​ក៏​នឹង​ទទួល​បាន​ឧបករណ៍​តេស្ត​កូវីដ​រហ័ស​ចំនួន ១ លានដូស​ទៀតផង​ដែរ​នៅ​រសៀល​ថ្ងៃទី ២៦ ខែ​មិថុនា​នេះ។

លោក​ថ្លែងថា៖ «យើង​គ្រោង​ចាក់​វ៉ាក់សាំង​ឱ្យបាន​គ្រប់ ២០ លានដូស​នៅ​ចុងឆ្នាំ​នេះ ហើយ​គិត​មកដល់​ថ្ងៃនេះ យើង​ទទួលបាន ១០ លាន​ដូស​ហើយ នៅសល់ ១០ លានដូស​ទៀត​ ដើម្បី​ចាក់​ឲ្យ​បាន ១០ លាន​នាក់។ ១០ លានដូស​ទៀត​នោះ ប្រហែល​មកដល់​នៅ​ចុងខែ​សីហា​ខាងមុខ​នឹង​ទទួលបាន​អស់ហើយ»។

បើតាម​លោក វង្ស៊ី វិសុទ្ធ កម្ពុជា​គ្រោង​ទិញ​វ៉ាក់សាំង ២០ លានដូស​រហូតដល់​តែ​ដាច់​ឆ្នាំ​ឯណោះ ប៉ុន្តែ​ពេលនេះ​ការមក​ដល់​នៃ​វ៉ាក់សាំង​លើស​ផែនការ​កំណត់ ហេតុនេះ​តាម​ផែនការ​ថ្មី​នឹង​ចប់​ត្រឹម​ខែសីហា។ លោក​ថា ក្នុង​ខែ​នេះ​កម្ពុជា​ទទួល​វ៉ាក់សាំង ៥ លានដូស ខែកក្កដា ចំនួន ៥ លានដូស និង​ខែសីហា ចំនួន ៤ លានដូស។ លោក​ថ្លែងថា «វ៉ាក់សាំង​បានមក​ដល់​មុន​ផែនការ ហេតុដូច្នេះ​យើង​នឹង​ពិនិត្យ​ផែន​ការចាក់​វ៉ាក់សាំង​ឡើងវិញ​ដោយ​ពន្លឿន​ការចាក់​វ៉ាក់សាំង​ឱ្យ​បាន​ឆាប់»។

លោក វង្ស៊ី វិសុទ្ធ បញ្ជាក់ថា នេះ​ជា​កត្តា​ល្អ​មួយ​សម្រាប់​ប្រទេស​កម្ពុជា​ដែលមាន​តម្រូវ​ការចាក់​វ៉ាក់សាំង​ឲ្យ​បាន​ឆាប់ ក្នុង​បរិការ​មួយ​ដែល​កម្ពុជា​កំពុង​ជួ​ប្រទះ​នឹង​ការផ្ទុះ​រាតត្បាត​កូវីដ​កាន់តែខ្លាំង និង​ម្ខាង​ទៀត​តម្រូវ​ការចាំបាច់ ក្នុង​ការទប់ស្កាត់​ជំងឺ​កូវីដ​កុំ​ឲ្យ​រាលដាល​លឿន​ពេក ដើម្បី​ផ្តល់​ឱកាស​ឱ្យ​រាជរដ្ឋាភិបាល បើក​សេដ្ឋកិច្ច​ឡើងវិញ​ឱ្យ​ប្រជាជន​មាន​ការងារ​ធ្វើ​ឡើងវិញ ជា​ប្រក្រតី។

លោក​ថា ដើម្បី​ការពារ​កូវីដ​កម្ពុជា​មាន ៤ ការដ្ឋានធំៗ ទី ១ គឺ​ការទិញ​វ៉ាក់សាំង​សម្រាប់​ចាក់​ដែល​ត្រូវ​ធ្វើ​ឱ្យបាន​លឿន​បាន​ឆាប់​បំផុត ទី ២ ជា​ការដ្ឋាន​បង្ការ គឺ​វិធានការ ៣កុំ ៣ការពារ​ និង​ការជួប​ជុំគ្នា​ត្រូវ​រក្សា​គម្លាត​សង្គម ព្រោះ​វា​ជា​កត្តា​សំខាន់​ ដែល​នាំឱ្យ​មាន​ការឆ្លង​ខ្លាំង ទី ៣ គឺ​ការទប់ស្កាត់ ដែល​ពេលនេះ​ក្រសួង​សុខាភិបាល​កំពុង​ពង្រឹង​ច្រក​ ដើម្បី​ចៀសវាង​ការនាំ​ចូល​ជំងឺ មក​ក្នុងស្រុក និង​ពង្រឹង​គ្រប់គ្រង​ការផ្ទុះ​នៅតាម​ស្រុក ចំណែក​ទី ៤ គឺ​បញ្ហា​ព្យាបាល ដែល​ត្រូវ​ត្រៀម​សមត្ថភាព​ឆ្លើយតប​ឲ្យ​បាន​ទាន់​ពេលវេលា៕

អត្ថបទគួរចាប់អារម្មណ៍