ភ្នំពេញៈ រដ្ឋាភិបាលកម្ពុជាតាមរយៈគណៈរដ្ឋមន្ត្រីកាលពីម្សិលមិញបានសម្រេចដាក់បេក្ខភាពទីក្រុងបាត់ដំបងជាសមាជិកបណ្ដាញទីក្រុង ដែលមានភាពច្នៃប្រឌិតរបស់អង្គការយូណេស្កូ ( UNESCO Creative Cities Network) ទាក់ទងនឹងការច្នៃប្រឌិតលើម្ហូបអាហារ។
ការសម្រេចនេះបានធ្វើឡើង បន្ទាប់ពីមានការឯកភាពពីលោកនាយករដ្ឋមន្ត្រី ហ៊ុន សែន កាលពីថ្ងៃទី ២២ ខែមិថុនា ឆ្នាំ ២០២១ ក្រោយពេលមានការស្នើសុំពីក្រសួងទេសចរណ៍កាលពីថ្ងៃទី ១៦ ខែមិថុនា ឆ្នាំនេះ។
នៅក្នុងលិខិតរបស់ទីស្ដីការគណៈរដ្ឋមន្ត្រីចុះហត្ថលេខាដោយលោក កែន សត្ថា ជារដ្ឋមន្ត្រីស្ដីទីគណៈរដ្ឋមន្ត្រីជម្រាបជូន លោករដ្ឋមន្ត្រីក្រសួងទេសចរណ៍ រដ្ឋមន្ត្រីក្រសួងវប្បធម៌ និងវិចិត្រសិល្បៈ និងលោកអភិបាលខេត្តបាត់ដំបងបានបញ្ជាក់ថា រាជរដ្ឋាភិបាលបានយល់ព្រមឱ្យដាក់បេក្ខភាពទីក្រុងបាត់ដំបងចូលជាសមាជិកបណ្ដាញទីក្រុងដែលមានភាពច្នៃប្រឌិតរបស់អង្គការយូណេស្កូ «ក្នុងប្រភេទទីក្រុងដែលមានភាពច្នៃប្រឌិតលើផ្នែកម្ហូបអាហារ (Gastronomy)»។
ទាក់ទងនឹងការដាក់បេក្ខភាពទីក្រុងបាត់ដំបងចូលជាសមាជិកបណ្ដាញទីក្រុងដែលមានភាពច្នៃប្រឌិតរបស់អង្គការយូណេស្កូនេះលោក ថោង ខុន រដ្ឋមន្ត្រីក្រសួងទេសចរណ៍បានលើកឡើងនៅថ្ងៃទី ២៦ មិថុនានេះថា ការជ្រើសរើសនេះគឺដោយសារផ្អែកតាមការវាយតម្លៃរបស់ក្រុមការងារជំនាញទីក្រុងបាត់ដំបងថា ខេត្តបាត់ដំបងសម្បូរទៅដោយម្ហូបអាហារជាច្រើនប្រភេទ និងច្រើនទម្រង់ ដែលត្រូវបានរៀបចំ និងកែច្នៃ ដើម្បីចែករំលែក និងផ្សព្វផ្សាយលើឆាកអន្តរជាតិ។ នេះបើតាមទំព័រហ្វេសប៊ុកក្រសួងទេសចរណ៍។
បើតាមក្រសួងនេះការចូលជាសមាជិកបណ្តាញនេះនឹងអនុញ្ញាតឱ្យកម្ពុជាមានសិទ្ធិប្រើប្រាស់និមិត្តសញ្ញា (Logo) របស់បណ្តាញ ដើម្បីផ្សព្វផ្សាយសក្តានុពល និងភាពពិសេសៗរបស់ទីក្រុងខ្លួនទៅកាន់ទីក្រុងនានាជាសមាជិកបណ្តាញ និងក្នុងក្របខ័ណ្ឌរបស់អង្គការយូណេស្កូ ក្នុងការលើកស្ទួយនូវវប្បធម៌ សក្តានុពលទេសចរណ៍ទីក្រុង និងមុខមាត់របស់ទីក្រុងជយលាភី ក៏ដូចជាប្រទេសជាតិទាំងមូល ពិសេសការតម្រង់ឆ្ពោះទៅរកការផ្សព្វផ្សាយទេសចរណ៍ម្ហូបអាហារ (Gastronomy Tourism) ដែលជានិន្នាការថ្មីរបស់ពិភពលោក ហើយដែលកម្ពុជា ជាពិសេសទីក្រុងបាត់ដំបងតែម្តង ដែលមានសក្តានុពលសម្បូរបែប។
គួរបញ្ជាក់ថា បណ្តាញទីក្រុងដែលមានភាពច្នៃប្រឌិតរបស់អង្គការយូណេស្កូ ត្រូវបានបង្កើតឡើងក្នុងឆ្នាំ ២០០៤ ក្នុងគោលបំណងលើកកម្ពស់កិច្ចសហប្រតិបត្តិការក្នុងចំណោមទីក្រុងមានភាពច្នៃប្រឌិតលើសមាសភាពសំខាន់ៗមួយចំនួន ដែលជាកត្តាគន្លឹះសម្រាប់ការអភិវឌ្ឍទីក្រុងប្រកបដោយចីរភាព ដែលបច្ចុប្បន្នបណ្តាញនេះមានទីក្រុងចំនួន ២៤៦ នៅជុំវិញពិភពលោក។
ដោយឡែកនៅតំបន់អាស៊ានបច្ចុប្បន្នមានទីក្រុងចំនួន ៦ ក្នុងប្រទេសចំនួន ៤ ដែលជាសមាជិកក្នុងបណ្តាញទីក្រុងរបស់អង្គការយូណេស្កូនេះ រួមមាន៖ ប្រទេសថៃមានទីក្រុងភូកេត និងទីក្រុងឈាងម៉ៃ, ប្រទេសឥណ្ឌូនេស៊ី មានទីក្រុងបានឌុង (Bandung) និងទីក្រុងផេកាឡុងហ្កាន (Pekalongan),ប្រទេសសិង្ហបុរី មានទីក្រុងសិង្ហបុរី និងប្រទេសហ្វីលីពីនមានទីក្រុងបាកជីអូ (Baguio)។
លោក ងួន រតនៈ អភិបាលខេត្តបាត់ដំបង បានប្រាប់ ភ្នំពេញ ប៉ុស្តិ៍ នៅថ្ងៃទី ២៦ មិថុនាថា ការដាក់ទីក្រុងបាត់ដំបងជាបេក្ខភាពច្នៃប្រឌិតរបស់អង្គការយូណេស្កូ ផ្នែកម្ហូបអាហារ គឺជាជ្រុងមួយក្នុងការបង្ហាញពីភាពសម្បូរបែប និងលក្ខណពិសេសរបស់ខេត្តនេះ។ លោកបន្តថា នៅចំពោះមុខនេះ រដ្ឋបាលខេត្តបានបង្កើតក្រុមការងារស្រាវជ្រាវម្ហូបអាហារនៅក្នុងខេត្តនេះ ដើម្បីស្វែងរកមុខម្ហូបពិសេសប្រចាំខេត្ត និងមានដើមកំណើតនៅខេត្តបាត់ដំបងផ្ទាល់តែម្តង។
លោកបញ្ជាក់ថា៖ «ម្ហូបអាហារនេះ គឺមានកំណើតនៅបាត់ដំបង ដែលមានចាស់ទុំនៅទីនេះបង្កើត ដែលហៅថា បុកកន្ទុយហេសជាដើម ហើយនេះជាម្ហូបខ្មែរហើយ ក្រៅពីនេះ គឺសង្វាក់ត្រីអីនោះ។ យើងនឹងប្រឹងប្រែងធ្វើយ៉ាងម៉េចឲ្យទីក្រុងបាត់ដំបង ក្លាយជាបណ្តាញទីក្រុងដែលមានភាពច្នៃប្រឌិតផ្នែកម្ហូបអាហារ ហើយមានសកម្មភាពធ្វើទីផ្សារលើម្ហូបដែលក្រុមការងារបានជ្រើសរើស»។
បើតាមលោក ងួន រតនៈ បានអះអាងថា នៅពេលក្រុមការងារស្រាវជ្រាវបានជ្រើសរើសមុខម្ហូបប្រចាំទីក្រុងបាត់ដំបងរួចហើយ រដ្ឋបាលខេត្តនឹងបង្កើតទីតាំងចែកចាយមួយជាក់លាក់ ដើម្បីដាក់បង្ហាញលក់មុខម្ហូបទាំងនេះ ក្នុងពេលខាងមុខ។
លោកបញ្ជាក់ថា៖ «ដើម្បីឲ្យសេចក្តីសម្រេចដាក់ទីក្រុងបាត់ដំបងនេះ ជាបណ្តាញដែលភាពច្នៃប្រឌិតរបស់អង្គការយូណេស្កូ ផ្នែកម្ហូបអាហារ ខ្ញុំសូមឲ្យមានការចូលរួមពីប្រជាពលរដ្ឋ។ ឲ្យពួកគាត់នាំគ្នាចូលរួមតាមការអំពាវនាវរបស់អាជ្ញាធរដែនដី ដោយយើងនឹងជួបពួកគាត់ ដែលជាចាស់ទុំក្នុងខេត្ត បង្ហាញទេពកោសល្យ និងស្នាដៃខាងម្ហូបអាហារហ្នឹង»។
ក្រៅពីនេះ លោក ងួន រតនៈ ក៏អំពាវនាវដល់ប្រជាពលរដ្ឋចូលរួមបង្ហាញពីមុខម្ហូបផ្សេងៗ ដែលខ្លួនដឹងថា មុខម្ហូបទាំងនោះ មានដើមកំណើតនៅខេត្តបាត់ដំបង ដើម្បីឲ្យក្រុមការងារចុះស្រាវជ្រាវដាក់បញ្ចូនក្នុងបញ្ចីផ្នែកម្ហូបអាហាររបស់អង្គការយូណេស្កូនេះ៕