.jpg)
ប្រជាពលរដ្ឋរស់នៅខេត្តកោះកុងទទួលបានការចាក់វ៉ាក់សាំង នាពេលកន្លងទៅ។ រូបថត រដ្ឋបាលខេត្តកោះកុង
កោះកុង៖ រដ្ឋបាលខេត្តកោះកុងនៅព្រឹកថ្ងៃទី ២៦ មិថុនានេះ បានប្រកាសពីការរកឃើញអ្នកឆ្លងជំងឺកូវីដ ១៩ ចំនួន ៨៥ នាក់ បន្ថែមទៀត បន្ទាប់ពីបានវិភាគសំណាក កាលពីថ្ងៃម្សិលមិញ ខណៈអ្នកជាសះស្បើយថ្មីរកឃើញមានចំនួន ៣ នាក់។
យ៉ាងណាក្ដី នៅក្នុងចំណោមស្រុកទាំង ៦ និងក្រុងចំនួន ១ នៃខេត្តនេះ គឺមានតែស្រុក និងក្រុងចំនួន ២ ប៉ុណ្ណោះ ដែលរកឃើញមានករណីឆ្លងនៅថ្ងៃនេះ គឺក្រុងខេមរភូមិន្ទចំនួន ៤៩ នាក់ និងស្រុកមណ្ឌលសីមា មាន ៣៦ នាក់ ហើយសុទ្ធសឹងជាជនជាតិខ្មែរ។ ក៏ប៉ុន្តែទន្ទឹមនឹងការរកឃើញអ្នកឆ្លងជំងឺកូវីដ ១៩ បន្ថែមនេះ រដ្ឋបាលខេត្តក៏បានរកឃើញអ្នកជាសះស្បើយចំនួន ៣ នាក់ (ស្រី ២ នាក់) ផងដែរ តែសុទ្ធតែជាអ្នកមានអាសយដ្ឋាននៅក្នុងស្រុកស្រែអំបិលទាំងអស់ ក្នុងនោះមានម្នាក់ជាគ្រូបង្រៀន ម្នាក់ជាកម្មកររោងចក្រ និងម្នាក់ទៀតជាកសិករ។
ទាក់ទងនឹងករណីរកឃើញអ្នកឆ្លងជំងឺកូវីដ ១៩ រហូតដល់ជាង ៨០ នាក់ថ្មីនេះ រដ្ឋបាលខេត្តក៏បានអំពាវនាវឱ្យសាធារណជន និងពលរដ្ឋដែលបានប៉ះពាល់ផ្ទាល់ជាមួយអ្នកជំងឺ ត្រូវប្រញាប់រួសរាន់មកជួបគ្រូពេទ្យ ដើម្បីយកសំណាកទៅពិនិត្យ និងធ្វើចត្តាឡីស័កជាចាំបាច់។ រីឯអ្នកប៉ះពាល់ដោយប្រយោលត្រូវធ្វើចត្តាឡីស័កនៅផ្ទះរៀងៗខ្លួន ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។
ម្យ៉ាងវិញទៀត ក្នុងករណីមានរោគសញ្ញាដូចជា ផ្ដាសាយ ក្អក ហៀរសំបោរ ឈឺបំពង់ក និងថប់ដង្ហើម ឬមានរោគសញ្ញាផ្សេងទៀតដែលសង្ស័យត្រូវទៅមន្ទីរពេទ្យ ឬមណ្ឌលសុខភាពដែលនៅជិតផ្ទះនិងត្រូវរាយការណ៍ជូនអាជ្ញាធរមូលដ្ឋានជាបន្ទាន់។ ចំពោះអ្នកជាសះស្បើយត្រូវបន្តធ្វើចត្តាឡីស័កនៅផ្ទះរយៈពេល ១៤ ថ្ងៃ ជាមួយនឹងការអនុវត្តវិធានការ ៣ ការពារ ៣ កុំ របស់រាជរដ្ឋាភិបាល និងការណែនាំរបស់ក្រសួងសុខាភិបាល ដើម្បីចូលរួមទប់ស្កាត់ការឆ្លងរាលដាលនៃជំងឺកូវីដ ១៩ កុំឱ្យឆ្លងទៅក្រុមគ្រួសារ និងសហគមន៍៕
