មន្ត្រី CMAC ត្រៀមហ្វឹកហ្វឺនបំពាក់ជំនាញសុនខហិតអ្នកផ្ទុកវីរុសកូវីដ បន្ទាប់ពីទទួលបានឧបករណ៍ចាប់ក្លិន។ រូបថត CMAC
ភ្នំពេញ៖ មន្ត្រីមជ្ឈមណ្ឌលសកម្មភាពកំចាត់មីនកម្ពុជា (CMAC) កំពុងត្រៀមហ្វឹកហ្វឺនបំពាក់ជំនាញសុនខហិតអ្នកផ្ទុកវីរុសកូវីដ រួមមានបរិវេណ អគារ និងបន្ទប់ហ្វឹកហ្វឺនសុនខជាដើម បន្ទាប់ពីទទួលបានឧបករណ៍ចាប់ក្លិនអ្នកជំងឺផ្ទុកវីរុសកូវីដ ១៩។
លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) ថ្លែងលើបណ្តាញសង្គមហ្វេសប៊ុករបស់លោកនៅថ្ងៃទី ២៦ ខែមិថុនានេះថា កាលពីថ្ងៃទី ២៥ ខែមិថុនា លោកបានចុះទៅពិនិត្យមណ្ឌលសុនខអង្គភាពស៊ីម៉ាក់កំពង់ឆ្នាំង ដើម្បីពិនិត្យសកម្មភាពត្រៀមបម្រុងហ្វឹកហ្វឺនបំពាក់ជំនាញសុនខហិតអ្នកផ្ទុកវីរុសកូវីដ ១៩ រួមមានបរិវេណ អាគារ និងបន្ទប់ហ្វឹកហ្វឺនសុនខជាដើម។
លោក រតនា បញ្ជាក់ថា ក្រោយពីបានទទួលគំនិតផ្តួចផ្តើមក្នុងការស្រាវជ្រាវ និងអភិវឌ្ឍន៍សុនខហិតវីរុសកូវីដ ១៩ របស់ ប្រមុខរាជរដ្ឋាភិបាលរួចមក អង្គភាពបានរៀបចំអគារ បន្ទប់ ទីលានហ្វឹកហ្វឺនមានលក្ខណពិសេសសម្រាប់បម្រើឱ្យការស្រាវជ្រាវ និងអភិវឌ្ឍន៍សុនខជំនាញហិតវីរុសកូវីដ ១៩។ ក្នុងនោះក៏មានការជ្រើសរើសបេក្ខភាពសុនខចំនួន ១០ ក្បាល អ្នកកាន់សុនខចំនួន ១០ នាក់ គ្រូបង្វឹក និងសម្ភារមួយចំនួន ដើម្បីគាំទ្រការដំណើរការនេះ។
លោកបន្តថា ទន្ទឹមនឹងនេះ ក៏បានចងក្រងឯកសារ នីតិវិធីប្រតិបត្តិការ ការសិក្សាស្រាវជ្រាវ ហ្វឹកហ្វឺន និងការអនុវត្តសាកល្បង ការសិក្សាវិភាគទិន្នន័យ ប្រព័ន្ធវាយតម្លៃសមត្ថភាព និងប្រសិទ្ធភាពសុនខជាដើម។ល។ នេះធាតុទន់យ៉ាងសំខាន់ ដើម្បីកំណត់កត្តាជោគជ័យនៃការងារស្រាវជ្រាវ និងអភិវឌ្ឍន៍។
បន្ទប់ហ្វឹកហ្វឺនសម្រាប់សុនខហិតអ្នកផ្ទុកវីរុសកូវីដ។ រូបថត CMAC
បើតាមលោក ហេង រតនា ជាមួយនេះដែរ CMAC ក៏បានសហការជាមួយក្រសួងសុខាភិបាល និងសាកលវិទ្យាល័យវិទ្យាសាស្ត្រសុខាភិបាល បានរៀបចំនីតិវិធីមួយចំនួន ហើយខាងអ្នកវិទ្យាសាស្ត្រសុខាភិបាលក៏បានខិតខំប្រឹងប្រែងបញ្ចប់ពិធីសាបច្ចេកទេសមួយចំនួន ដើម្បីយកក្លិនពីអ្នកជំងឺប្រកបដោយសុវត្ថិភាព និងប្រកបដោយក្រមសីលធម៌វិជ្ជាជីវ:។
លោកថា អង្គភាព CMAC ក៏បានទទួលជំនួយពីក្រុមហ៊ុនស៊្វីស នូវឧបករណ៍ចាប់ក្លិនអ្នកជំងឺផ្ទុកវីរុសកូវីដ ១៩ ហើយថ្មីៗនេះ ខាងសុខាភិបាលបានចាប់ផ្តើមអនុវត្តយកឧបករណ៍នោះទៅចាប់ក្លិនពីអ្នកជំងឺកូវីដ និងបន្តពិនិត្យបញ្ជាក់គ្មានហានិភ័យវីរុសកូវីដលើឧបករណ៍ ដើម្បីបម្រើឱ្យការស្រាវជ្រាវ និងហ្វឹកហ្វឺននេះ គ្មានប៉ះពាល់ហានិភ័យឆ្លងកូវីដឡើយ។
លោកថ្លែងថា៖ «ជាមួយបទពិសោធន៍ក្នុងការប្រើប្រាស់ និងហ្វឹកហ្វឺនសុនខ ព្រមទាំងការប្តេជ្ញាចិត្តខ្ពស់របស់អ្នកវិទ្យាសាស្ត្រសុខាភិបាល និងអ្នកបច្ចេកទេសសុនខ ដែលបានធ្វើឱ្យការស្រាវជ្រាវ និងអភិវឌ្ឍន៍នេះ កំពុងដំណើរការទៅមុខបានឆាប់រហ័សទាន់ពេលវេលា និងធ្វើដំណើរតម្រង់សំដៅទៅរកក្តីសង្ឃឹមរបស់យើង គឺមានសុនខប្រយុទ្ធប្រឆាំងកូវីដ ១៩ នៅកម្ពុជា»៕
.jpg)
