ព្រះសីហនុ៖ ថ្នាក់ដឹកនាំ និងមន្ត្រីជំនាញពាក់ព័ន្ធនៃខេត្តព្រះសីហនុ ជួបពិភាក្សាគ្នាជុំវិញការរៀបចំក្របខ័ណ្ឌ ដើម្បីឈានទៅបង្កើតទីក្រុងឆ្លាតវៃសម្រាប់ក្រុងព្រះសីហនុ សំដៅជំរុញការទាញយកអ្នកវិនិយោគ និងលើកកម្ពស់ជីវភាពរស់នៅរបស់ប្រជាពលរដ្ឋ។
ការពិភាក្សានេះ បានធ្វើឡើងក្នុងសិក្ខាសាលារយៈពេល ២ ថ្ងៃ កាលពីថ្ងៃទី ២៤ និង ២៥ ខែមិថុនា នៅសណ្ឋាគារឯករាជ្យ ក្រុងព្រះសីហនុ ដើម្បីបានដាក់បញ្ចូលអំពីទស្សនទាន “ទីក្រុងឆ្លាតវៃ ឬ Smart City“ និងការបង្ហាញមេរៀន បទពិសោធន៍ពីបណ្តាប្រទេសនានាទាំង អឺរ៉ុប និងអាស៊ី អំពីការរៀបចំ “ទីក្រុងឆ្លាតវៃ”។
ក្នុងនោះថ្នាក់ដឹកនាំ និងមន្ត្រីជំនាញពាក់ព័ន្ធនៃខេត្តព្រះសីហនុ បានពិភាក្សាគ្នាពីនិយមន័យ និងទស្សនទានទីក្រុងឆ្លាតវៃ និងស្វែងរកវិស័យផ្សេងៗទាក់ទងនឹងទីក្រុងឆ្លាតវៃក្នុងក្តីសុបិនរបស់ប្រជាពលរដ្ឋក្នុងក្រុងព្រះសីហនុ រួមទាំងបានពិភាក្សាពីកត្តាចាំបាច់មួយចំនួន ដើម្បីក្លាយជាទីក្រុងឆ្លាតវៃ ប្រកបដោយចីរភាព និងបរិយាប័ន ដើម្បីបង្កើតគំនិតផ្តួចផ្តើមសំខាន់ៗ មួយចំនួនក្នុងការរៀបចំក្របខ័ណ្ឌទីក្រុងឆ្លាតវៃផងដែរ។ នេះបើតាមទំព័រហ្វេសប៊ុករបស់រដ្ឋបាលខេត្តនេះ។
រដ្ឋបាលខេត្តព្រះសីហនុបាននិយាយថា តាមរយៈគម្រោងនេះ នឹងជួយដល់រដ្ឋបាលខេត្តព្រះសីហនុ ក្នុងការបង្កើតគោលនយោបាយអភិវឌ្ឍន៍ទីក្រុងឆ្លាតវៃ សំដៅជំរុញការទាញយកឱកាសពីសកម្មភាពវិនិយោគ និងលើកកម្ពស់ជីវភាពរស់នៅរបស់ប្រជាពលរដ្ឋគ្រប់ៗរូប ដែលរួមបញ្ចូលទាំងប្រជាពលរដ្ឋងាយរងគ្រោះផងដែរ។
រដ្ឋបាលខេត្តព្រះសីហនុបានអះអាងថា៖ «អ្នកចូលរួមទាំងអស់បានចូលរួមពិភាក្សាពិគ្រោះយោបល់យ៉ាងល្អិតល្អន់ទៅលើប្រធានបទចំនួន ៣ ដែលជាធាតុចូលដ៏សំខាន់ ក្នុងការអភិវឌ្ឍក្រុងព្រះសីហនុឱ្យក្លាយជាទីក្រុងឆ្លាតវៃ»។
សូមជម្រាបថា ក្រៅពីថ្នាក់ដឹកនាំ មន្ត្រីជំនាញខេត្ត កិច្ចពិភាក្សានេះ គឺមានការសម្របសម្រួលពីអង្គការសហប្រជាជាតិប្រចាំកម្ពុជា ក្នុងនោះក៏មានការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (UN Human Rights) សហការជាមួយអង្គការសហប្រជាជាតិ ដើម្បីលំនៅឋានមនុស្សជាតិ (UN-Habitat) ខណៈពួកគេបានពិភាក្សាពីការរៀបចំ និងអនុវត្តគម្រោងឈ្មោះថា ទីក្រុងព្រះសីហនុសម្រាប់យើងទាំងអស់គ្នា ដោយជំរុញការអភិវឌ្ឍជាទីក្រុងឆ្លាតវៃ ប្រកបដោយចីរភាព និងបរិយាប័ន៕