The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​ខណ្ឌ​កំបូល​កំពុង​ស្តារ​ប្រឡាយ​មេ ២ ខ្សែ ដើម្បី​រំដោះ​ជំនន់​ទឹក​ភ្លៀង

អាជ្ញាធរ​ខណ្ឌ​កំបូល​កំពុង​ស្តារ​ប្រឡាយ​មេ ២ ខ្សែ ដើម្បី​រំដោះ​ជំនន់​ទឹក​ភ្លៀង

Content image - Phnom Penh Post
សកម្មភាព​ស្តារ​ប្រឡាយ​មេនៅខណ្ឌ​កំបូល​ ដែល​នៅ​អម​សង​ខាង​ផ្លូវ​ជាតិ​លេខ ៤ និង​អម​សង​ខាង​ផ្លូវ​រថភ្លើង។ រូបថត សហការី

អាជ្ញាធរ​ខណ្ឌ​កំបូល​កំពុង​ស្តារ​ប្រឡាយ​មេ ២ ខ្សែ ដើម្បី​រំដោះ​ជំនន់​ទឹក​ភ្លៀង

ភ្នំពេញ៖ អាជ្ញាធរ​ខណ្ឌ​កំបូល​កំពុង​ស្តារ​ប្រឡាយ​មេ ២ ខ្សែ ដែល​នៅ​អម​សង​ខាង​ផ្លូវ​ជាតិ​លេខ ៤ និង​អម​សង​ខាង​ផ្លូវ​រថភ្លើង នាំ​ទឹក​ទៅ​កាន់​ទំនប់​កប់​ស្រូវ ដើម្បី​រំដោះ​ជំនន់​ទឹក​ភ្លៀង លិច​លង់​ភូមិដ្ឋាន​ប្រជាពលរដ្ឋ​នារដូវ​វស្សា​នេះ។

លោក ឃឹម ស៊ុនសូដា អភិបាល​ខណ្ឌ​កំបូល​ថ្លែង​ប្រាប់ ភ្នំពេញ ប៉ុស្តិ៍ តាមរយៈ​ទូរស័ព្ទ​នៅ​រសៀល​ថ្ងៃ​ទី ២៦ ខែ​មិថុនា​នេះ​ថា នៅ​ឆ្នាំ​នេះ រដ្ឋបាល​រាជធានី​ភ្នំពេញ​ឲ្យ​ធ្វើ​ការ​កាយ​ស្ដារ​ប្រឡាយ​មេ ២ ខ្សែ ដែល ១ ខ្សែ នៅ​អម​សង​ខាង​ផ្លូវ​ជាតិ​លេខ ៤ និង ១ ខែ្ស​ទៀត នៅ​អម​សង​ខាង​ផ្លូវ​រថភ្លើង។ លោក​ថា ប្រឡាយ​ដែល​នៅ​អម​សង​ខាង​ផ្លូវ​លេខ ៤ ស្តារ​ពី​ឃុំ​ឆក់​ឈើ​នាង​ព្រំ​ប្រទល់​ស្រុក​អង្គស្នួល នាំ​ទឹក​ហូរ​ធ្លាក់​មក​កាន់​ប្រឡាយ​អម​សង​ខាង​ផ្លូវ​រថភ្លើង និង​ធ្លាក់​ទៅ​កាន់​បឹង​ទំនប់​កប់​ស្រូវ​ទាំង​អស់។

លោក​ថ្លែង​ថា៖ «ខ្ញុំ​គិត​ថា ឆ្នាំ​ថ្មី​នេះ លែង​មាន​ការ​លិច​លង់​ទៀត​ហើយ​នៅ​តាម​បណ្តោយ​ផ្លូវ​ជាតិ​លេខ ៤ ព្រោះ​អី​ខ្ញុំ​បាន​ធ្វើ​តេស្ត​សាកល្បង​បណ្តើរៗ​ហើយ មាន​ភ្លៀង​ខ្លាំង​ច្រើន​មេ​ដែរ​កន្លង​មក​តែ​មិន​មាន​ការ​លិច​ទេ ហ្នឹង​យើង​ស្តារ​មិន​ទាន់​ហើយ​អស់​ផង។ ចំពោះ​ប្រឡាយ​សង​ខាង​ផ្លូវ​រថភ្លើង​មួយ​ចំហៀង ៥ គីឡូ អ៊ីចឹង​សង​ខាង​វា​ចូល ១០ គីឡូ ហើយ​ពី​ព្រំ​ប្រទល់​ស្រុក​អង្គស្នួល​នោះ មួយ​ចំហៀង ៨ គីឡូ អ៊ីចឹង​សង​ខាង ១៦ គីឡូ ចំណែក​ជម្រៅ​កន្លែង​ខ្លះ ៣ ម៉ែត្រ ខ្លះ ៤ ម៉ែត្រ​តាម​ជាក់​ស្តែង»។

Content image - Phnom Penh Post

លោក ម៉ៅ ប៊ុនធឿន ប្រធាន​មន្ទីរ​ធនធាន​ទឹក​ និង​ឧតុនិយម​រាជធានី​ភ្នំពេញ បាន​ថ្លែង​ថា ដើម​ឡើយ​ទីនេះ ជា​ប្រឡាយ​មេ​ចាស់ ប៉ុន្តែ​ត្រូវ​បាន​គោក​រាក់ ដោយ​ការ​ចាក់​ដី សំរាម​ហូរ​ចូល និង​ស្មៅ​ដុះ​ជាច្រើន​ឆ្នាំ រហូត​ដល់​លុប​បាត់​ប្រឡាយ​ទាំង​មូល​តែ​ម្ដង។ លោក​ថា ទឹក​មិន​អាច​ហូរ​កាត់​ទី​នេះ ទៅ​កាន់​បឹង​ទំនប់​កប់​ស្រូវ​បាន បង្ក​ឱ្យ​មាន​ការ​លិចលង់ ហេដ្ឋា​រចនា​សម្ព័ន្ធ លំនៅឋាន​បងប្អូន​ប្រជាពលរដ្ឋ​ជា​រៀងរាល់​ឆ្នាំ នៅ​ប៉ែក​ខាង​លិច​រាជធានី​ភ្នំពេញ ជាពិសេស​ក្នុង​ទឹកដី​ខណ្ឌ​កំបូល និង​មួយ​ផ្នែក​នៃ​ខណ្ឌ​ពោធិ៍សែនជ័យ។

លោក​ថ្លែង​ថា៖ «ក្រោយ​ពី​ប្រឡាយ​មេ​ទាំង​ពីរ​ខ្សែ​នេះ​ឲ្យ​ដំណើរការ​ឡើង​វិញ វា​នឹង​មាន​តួនាទី​រំដោះ​ទឹក​ភ្លៀង​ហូរ​មក​ពី​ស្រុក​អង្គស្នួល បែកចាន នៃ​ខេត្ត​កណ្ដាល ខណ្ឌ​កំបូល និង​ពោធិ៍សែនជ័យ។ ហើយ​ទន្ទឹម​ហ្នឹង​នៅ​ក្នុង​រដូវ​វស្សា​ឆ្នាំ​នេះ នឹង​ជួយ​កាត់​បន្ថយ​បាន​យ៉ាង​ប្រសើរ​នូវ​ការ​ជន់​លិច​ដោយ​ជំនន់​ទឹក​ភ្លៀង​នា​ប៉ែក​ខាង​លិច​រាជធានី​ភ្នំពេញ»៕

វីដេអូ៖

អត្ថបទគួរចាប់អារម្មណ៍